1, 2. Antoy ginawa nen Jesus diad labi na Nisan 14, 33 C.E.? (Nengnengen so litratod sayan pahina.)

LABI la, balet maliwawa nid Jerusalem ta managaag so bulan. Nisan 14 ed saman, taon 33 C.E. Sinelebraan nen Jesus tan na saray apostol to so Paskua pian nodnonoten so inkibulos na saray Israelita ed panangaripen na Ehipto manga 1,500 taon lay apalabas. Nen saray 11 a matoor ya apostol labat lay kaiba nen Jesus, inggapo to so espisyal ya pangdem—ya magmaliw a pakanodnonotan ed ipatey to ya nagawa antis ya nasumpal so agew na Nisan 14. *—Mat. 26:1, 2.

² Nampikasi si Jesus tan impasa tod saray apostol to so andi-lebaduran tinapay, ya inkuan to: “Ala yo tan akan yo.” Insan angala na kopa na alak, akisalamat ed Dios, tan inkuan to: “Inum kayon amin ed satan.” (Mat. 26:26, 27) Anggapo lay arum ya naakan ya impasa nen Jesus ed saray apostol to, balet dakel ni imbaga tod sikara ed satan ya agnalinglingwanan ya labi.

3. Anto ran tepet so ebatan ed sayan artikulo?

 ³ Ontan so impangigapo nen Jesus ed Memoryal na impatey to, ya tatawagen met ya “pangdem na Katawan.” (1 Cor. 11:20) Ompan wala ray mantepet: Akin ya nepeg a nodnonoten so impatey nen Jesus? Antoy irerepresenta na tinapay tan alak? Panon itayon makapanparaan parad Memoryal? Siopay mangan tan oninum ed saray emblema? Tan antoy nepeg ya panmoria na saray Kristiano ed ibabaga na Kasulatan ya ilalo ra?

4. Antoy nagmaliw ya posible lapud impatey nen Jesus?

⁴ Lapud ananak itayo nen Adan, atawir tayoy kasalanan tan patey. (Roma 5:12) Kanian anggapoy imperpekton too ya makapangiter ed Dios na panondon ed sarili to odino ed arum. (Sal. 49:6-9) Balet panamegley na impatey nen Jesus, imbayar to so alenleneg ya bili na dondon ya awaten na Dios—say perpekton laman to tan say niyibung ya dala to. Nen inter tod Dios so bili na satan ya dondon, nagmaliw ya posible so kibulos tayod kasalanan tan patey tan say pakaawat tayoy andi-anggaan ya bilay.—Roma 6:23; 1 Cor. 15:21, 22.

5. (a) Akin ya nibaga tayon inaro na Dios tan nen Jesus iray totoo? (b) Akin ya nepeg tayoy onatendi ed Memoryal?

⁵ Say dondon et paneknek ya inaro na Dios so amin ya totoo. (Juan 3:16) Say impangisakripisyo nen Jesus ed bilay to et prueba met ya inaro to itayo. Diad tua, antis ni ya linmay Jesus diad dalin et ‘saray anak na totoo so panggagayagaan to’! (Uli. 8:30, 31) Agaylay pisalsalamat tayod si Jehova tan ed si Jesus. Atan so mamakiwas ed sikatayon onatendi ed pannodnonot ed impatey nen Jesus, tan unoren iyan ganggan: “Itultuloy yon gawaen iya bilang pakanodnonotan ed siak.”—1 Cor. 11:23-25.

6. Antoy nepeg ya pangipasen tayod tinapay tan alak ed Memoryal?

⁶ Nen inggapo nen Jesus so Memoryal, samay tinapay tan alak et agto pinagmaliw ya literal ya laman tan dala to. Imbes, oniay imbaga to nipaakar ed samay tinapay: “Saya so mankabaliksay laman ko.” Tan oniay imbaga to nipaakar ed samay alak: “Saya so mankabaliksay ‘dalak nipaakar ed sipanan,’ a nepeg ya iyibung nisengeg ed dakel a totoo.” (Mar. 14:22-24) Malinew sirin ya say tinapay tan alak et simbolo, odino emblema.

7. Antoy irerepresenta na tinapay ya uusaren no Memoryal?

⁷ Diad satan ya importantin okasyon nen 33 C.E., inusar nen Jesus so andi-lebaduran tinapay ya akerad Paskua. (Exo. 12:8) Diad Kasulatan, no maminsan et irerepresenta na lebadura so kasalanan. (Mat. 16:6, 11, 12; Luc. 12:1) Kanian dugaruga so impangusar nen Jesus ed andi-lebaduran tinapay pian irepresenta so laman to ya andiay kasalanan. (Heb. 7:26) Atan so rason no akin ya ontan ya tinapay so uusaren no Memoryal.

8. Antoy irerepresenta na alak ya uusaren no Memoryal?

⁸ Say alak ya inusar nen Jesus nen Nisan 14, 33 C.E. et mangirerepresentad dala to. Ontan met ed alak ya uusaren ed Memoryal natan. Diad lugar a walad paway na Jerusalem a tatawagen ya Golgotha, say dala nen Jesus et niyibung “parad kaperdona na saray kasalanan.” (Mat. 26:28; 27:33) Isisimbolo na tinapay tan alak ed Memoryal so mabmablin bagat ya inyapay nen Jesus parad matulok ya totoo tan aapresyaen tayo itan ya probisyon. Kanian manepeg labat ya  iparaan tayoy sarili tayo parad tinaon ya Pangdem na Katawan.

9. (a) Akin ya importantin tumboken so eskedyul na babasaen ed Biblia parad Memoryal? (b) Antoy naliliknam ed dondon bagat nen Jesus?

⁹ No tumboken tayoy eskedyul na babasaen ed Biblia parad Memoryal ya walad Usisaen so Kasulatan ya Inagew-agew, nadalepdep tayo ray ginawa nen Jesus antis ya inatey. Makatulong itan pian niparaan tayoy puso tayo parad Pangdem na Katawan. * “Pitalaran mi so Memoryal,” so insulat na sakey a sister. “Kada taon et lalo itan ya magmamaliw ya espisyal. Nanonotan ko may nen wala kamid punerarya . . . a sankanengneng koy inad-arok ya ama tan diad saman ko naap-apresya so tuan kablian na dondon. . . . Kabisadok pa ray teksto tan sarag kon ipaliwawa iratan! Balet nen aliknak so makapasinagem ya epekto na ipapatey, diman labat talaga linmeppua so liket ed pusok lapud saray bendisyon ya iter na mablin dondon.” On, sano manpaparaan tayo parad Memoryal, maabig no dalepdepen tayo no panon itayon nibulos ed kasalanan tan patey panamegley na bagat nen Jesus.

10. Anto ni nagawaan tayo bilang preparasyon ed Memoryal?

¹⁰ Kaibad preparasyon tayod Memoryal so pamplano pian mas dakel so panaon tayod ministeryo, ya nayarin makapan-auxiliary payunir tayo. Diad pangimbita tayod saray iyaaralan tayo tan arum ni ya onatendid Memoryal, nalikna tayoy liket ed pangitongtong tayo nipaakar ed Dios, ed Anak to, tan ed saray bendisyon ed arapen parad saray mamapaliket tan mangidadayew ed si Jehova.—Sal. 148:12, 13.

11. Akin ya imbaga nen Pablo ya agmakanepegan so arum ya agagid Corinto ya angan tan inminum ed saray emblema ed Memoryal?

¹¹ Legan kan manpaparaan parad Pangdem na Katawan, nonoten imay insulat nen apostol Pablo ed kongregasyon diad Corinto. (Basaen so 1 Corinto 11:27-34.) Indanet nen Pablo ya no say sakey et mangan na tinapay tan oninum na alak anta agmakanepegan, “sikatoy mankasalanan nipaakar ed laman tan dala na Katawan” a Jesu-Kristo. Kanian nepeg ya ‘usisaen ni na sakey a too  so inkasikaton dili no kasin makanepegan’ antis ya mangan tan oninum na emblema. Ta no andi, ‘sikatoy naukom no mangan tan oninum.’ Lapud mauges ya kondukta, dakel ed saray agagid Corinto so “makapuy tan masakit, tan amayamay la so inatey [ed espiritual].” Posible ya say arum ed sikara et mamangan tan oniinum na dakel antis o legan na Memoryal kanian makakaugip ira. Anggapoy respeto dad satan ya okasyon, kanian nen angan tan inminum iray emblema, ag-ira inabobonan na Dios.

12. (a) Antoy angikomparaan nen Pablo ed Memoryal, tan antoy impasakbay tod saray mibibiang ed emblema? (b) Antoy nepeg ya gawaen na sakey ya mibibiang ed emblema no sikatoy akagawa na seryoson kasalanan?

¹² Inkompara nen Pablo so Memoryal ed pandurungo, tan oniay impasakbay tod saray mibibiang ed emblema: “Agkayo nayarin oninum ed kopa nen Jehova tan ed kopa na saray demonyo; agkayo nayarin mangan ed ‘lamisaan nen Jehova’ tan ed lamisaan na saray demonyo.” (1 Cor. 10:16-21) No say sakey ya mibibiang ed saray emblema diad Pangdem na Katawan et akagaway seryoson kasalanan, nepeg ya onkerew na espiritual ya tulong. (Basaen so Santiago 5:14-16.) No satan ya alanaan et angipatnag la na saray “gawa a mamaneknek ed panagbabawi,” say pangan tan iyinum tod saray emblema et aliwan panagleglemew ed bagat nen Jesus.—Luc. 3:8.

13. Akin et maabig no ipikasi tayo so ilalon inter na Dios ed sikatayo?

¹³ Legan tayon manpaparaan parad Memoryal, maabig no ipikasi tan dalepdepen tayo so ilalon inter na Dios ed sikatayo. Agtayo labay ya leglemewen so bagat nen Jesus. Kanian agtayo mibibiang ed saray emblema ed Memoryal no anggapoy malinew ya ebidensya ya sakey itayod saray alanaan. Panon sirin ya naamtaan na sakey no kasin sikatoy nepeg ya mibiang ed saray emblema odino andi?

14. Antoy epekto na balon sipanan ed saray mibibiang ed emblema diad Memoryal?

¹⁴ Saray mibiang ed emblema ed Memoryal et nepeg ya seguradon kabiangan ira na balon sipanan. Oniay imbaga nen Jesus nipaakar ed alak: “Sayan kopa et mankabaliksay balon sipanan a pinaletan na dalak.” (1 Cor. 11:25) Panamegley nen propeta Jeremias, impropesiya na Dios ya Sikatoy manggawa na balon sipanan ya duma ed Ganggan a sipanan ya ginawa tod saray Israelita. (Basaen so Jeremias 31:31-34.) Ginawa na Dios so balon sipanan diad saray espiritual ya Israelita. (Gal. 6:15, 16) Sayan sipanan et pinaletan na bagat nen Kristo panamegley na niyibung ya dala to. (Luc. 22:20) Si Jesus so Manamegley ed balon sipanan, tan saray matoor ya alanaan a kabiangan ed satan et makaawat na tawir ed tawen.—Heb. 8:6; 9:15.

15. Siopa ray kabiangan ed sipanan parad Panarian, tan anton pribilehyo so naawat da no manmatoor ira?

¹⁵ Amta na saray makanepegan ya mibiang ed emblema ya kaiba irad sipanan parad Panarian. (Basaen so Lucas 12:32.) Say kabiangan ed sayan sipanan et si Jesus tan saray alanaan ya papatumbok to ya matoor ed sikato tan akasagmak met na saray irap to. (Fil. 3:10) Lapud kabiangan ira na satan ya sipanan, nakaiba ray Jesus ya manuley ed tawen diad andi-angga. (Apo. 22:5) Makanepegan iran mangan tan oninum na saray emblema diad Pangdem na Katawan.

16. Ipaliwawad antikey so Roma 8:15-17.

¹⁶ Say manepeg ya mibiang ed emblema no Memoryal et saramay seguradon ananak ira na Dios. (Basaen so Roma 8:15-17.) Imbaga nen Pablo ya onkekelyaw iran: “Abba,  Ama!” Say Aramaikon salita ya “Abba” et maaron pananawag ya singa say “tatay,” tan marespeto met, singa say salitan “ama.” Saray alanaan et ‘tinagibi bilang ananak na Dios panamegley na espiritu to.’ Say espiritu to so mantatasi a kaiba na espiritu da, kanian segurado ira ya ananak to ra. Agto labay ya ibagan ag-ira interesadon manayam ed dalin. Amta ran no manmatoor ira anggad patey, magmaliw iran tomatawir a kaiba nen Kristo diad Panarian ed tawen. Amta da met ya “nilanaan [ira] na Masanton Dios,” si Jehova. Diad panaon tayo, pigpigara labat lay akera diad dalin a kabiangan na 144,000 ya ananak na Dios. (1 Juan 2:20; Apo. 14:1) Say espiritu nen Jehova so mamapakiwas ed sikaran mangikelyaw na “Abba, Ama!” Talagan maap-apit so relasyon dad si Jehova!

17. Antoy ilalo na saray alanaan, tan panon dan amta ya alanaan ira?

¹⁷ No sakey kan alanaan ya Kristiano, naynay mon ipipikasi so ilalom ed tawen. No nabasam ed Biblia so nipaakar ed pankasal ed tawen nen Jesus tan say “nobya” to, antam ya kaiba kad satan tan pitalaran mo la itan. (2 Cor. 11:2; Juan 3:27-29; Apo. 21:2, 9-14) No ibabalikas na Dios so panangaro tod saray espiritual ya ananak to panamegley na Salita to, antam ya kakatongtongen to ka. Tan no nabasam ed Biblia iray instruksion nen Jehova ed saray alanaan ya ananak to, pakiwasen ka na masanton espiritu ya onunor tan ibagam ya, “Parad siak itan.” Say espiritu na Dios tan say espiritum so saniban mantatasi ya say ilalom et diad tawen.

18. Antoy ilalo na ‘arum a karnero,’ tan antoy naliliknam ed satan?

¹⁸ No kabiangan ka balet na “baleg ya ulop” na ‘arum a karnero,’ say ilalom ya inter na Dios et diad dalin. (Apo. 7:9; Juan 10:16) Labay moy manbilay na andi-angga diad Paraiso, tan labalabay mon dalepdepen so ibabaga na Biblia ya nagawad arapen. Pitalaran moy panaon ya wala lay kareenan kaibay pamilyam tan arum nin matunong. Labalabay mo lan nanengneng ya naandi eras, kairapan, sakit, tan patey. (Sal. 37:10, 11, 29; 67:6; 72:7, 16; Isa. 33:24) Eksayted ka lan nanengneng iray napaoli ya walaan met na ilalon manbilay na andi-angga diad dalin. (Juan 5:28, 29) Agaylay pisasalamat mo ta inikdan ka nen Jehova na ontan ya ilalo! Anggano agka mamangan tan oniinum na saray emblema ed Memoryal, onaatendi ka pian nipanengneng moy apresasyon ed dondon bagat nen Jesu-Kristo.

19, 20. (a) Panon ya ontua so ilalom ya inter na Dios? (b) Akin ya onatendi kad Pangdem na Katawan?

¹⁹ Balanglan say ilalom et diad dalin odino diad tawen, ontua labat itan no ipatnag moy pananisia ed Dios a Jehova, ed si Jesu-Kristo, tan ed dondon. Diad iyatendim ed Memoryal, walay pankanawnawam ya dalepdepen so ilalom tan say kablian na impatey nen Jesus. Kanian seguradoen mo ya sakey kad saray minilyon ya onatendi ed Pangdem na Katawan kaselek na agew no Biernes, Abril 3, 2015, diad saray Kingdom Hall tan arum nin lugar ed interon mundo.

²⁰ Onaralem so apresasyon mod dondon bagat nen Jesus no onatendi kad Memoryal. No dengelen mon maong so paliwawa, napakiwas kan ipanengneng so panangarom ed kaparam a too diad pangibagam ed sikara na nipaakar ed panangaro nen Jehova tan say balibalin gagala to parad totoo. (Mat. 22:34-40) Kanian gawam so anggaay nayarian mon onla ed Pangdem na Katawan.