Tel Arad​—Mangiiter na Baleg a Paneknek

Sakey ya abalang a syudad. Sakey a misteryoson templo. Dakerakel a kadaanan a sulsulat. Agta singa onia iray nababantayan tayo’d pelikulan adventure? Diad katuaan to, aliwa labat a saraya so atabon-tabonan ed kabueran na Tel Arad ed Israel diad loob na pigapigay siglo, anggad ginapoan na saray arkeologo so mangotkot ditan.

NATAN, say modernon Arad et ipapasen na dakel a turista bilang sakey labat ed saray baley na Israel. Say Arad et walaay 27,000 a populasyon, tan saya et naromog ed desierto na Judea diad sagur na Dead Sea. Balet, say syudad na Arad diad Israel nensaman et walad manga 8 kilometro ed sagur. Ditan maal-alwar ya ineekal tan kinukoykoy na saray arkeologo so tinmatabon a buer, tan aromog day amayamay a karaanan ya estruktura tan inskripsion odino niyukit a sulsulat.

Sarayan inskripsion et walad saray ostraka, odino langan sinulatan. Diad saraman a panaon et ontan so kaslakan a paraan na panagsulat. Nibagan sayan pasen ed Tel Arad ya angotkotan na saray arkeologo, so akadiskobrian na sankarakelan lan koleksion na ontan iran ostraka diad Israel. Ingen, anto ta so kana na sarayan adiskobre?

Saray adiskobre ed Tel Arad et mangiiter na impormasyon nipaakar ed saray agawgawan akarekord ed Biblia, salanti, samay manlapud panaon na saray Ukom ed Israel anggad panaoy inlusob na Babilonia ed Juda nen 607 B.C.E. Sirin, kokompirmaen na sarayan adiskobre so inkasusto na Biblia. Mangiiter met iraya na alimbawa ya ontulong ed sikatayon naamtaan no panon ya impasen na saray Israelita nensaman so ngaran na Dios.

Arad tan Say Biblia

On, tua a daiset labat so ibabaga na Biblia nipaakar ed Arad. Balet ta sayan syudad a walad balibalin lokasyon et kontrolado toy sakey a manunan rota na komersyo nensaman. Agpankelawan sirin ya ipapabitar na saray rekord na agawgawa ed apalabas tan saray adiskobre na arkeologo a  sayan syudad et aminpigan sinakop, dineral, tan impaalagey lamet diad adalan ton maaligwas tan mauddiem iran panaon. Lapud satan ya aminpigapigan impampaalagey, sayan syudad et nagmaliw a singa abalbaleg a pukdol odino tell.

Say sankaunaan ya impakasalambit na Biblia ed Arad et sanen isasalaysay toy kasampotan a parte na 40 taon ya impanakar-akar na saray Israelita ed kalawakan. Ag-abayag kayari na impatey na agi nen Moises a si Aaron, akasabi iray totoo na Dios ed bandad mamaabalaten a ketegan na Insipan a Dalin. Mapatnag ya inisip na Canaanitan ari na Arad a main-inomay a taloen iray Israelita, kanian inataki to ra. Balet diad tulong nen Jehova a Dios, linmaban iray Israelita tan sigpot iran analo. Dineral-deral day Arad, ingen mapatnag a wala met iray akaliktar.​—Numeros 21:1-3.

Nipaalagey lamet a tampol na saray Canaanita iyan syudad da. On, ta kalabas na pigaran taon, sanen akabanda ditan si Josue, a manasakop manlapud amianen tan sistematikon manguupot ed saray Canaanita a walad ‘kapugaroan, tan ed Abalaten [odino say Negeb],’ say sakey ed saray akalaban to et “say ari ed Arad.” (Josue 10:40; 12:14) Diad saginonor, diad sayan parte na Negeb nanayam iray kapolian nen Hobab a Cineo, ya akiiba ed saray Israelita ed impankampo ra’d kalawakan.​—Uko-ukom 1:16.

Saray Adiskobre na Saray Arkeologo

Saray geray ed Tel Arad et mangiiter na kaaruman ni ran makapainteres ya impormasyon nipaakar ed sinmublay ya agawgawa a nirekord ed Biblia. Singa bilang, ditan et akadiskobre iray arkeologo na doble-doblin padir. Nayarin impaalagey so arum ed saraya diad samay panaon a nanuley si Arin Solomon, a kabkabat ed dakel a proyekton impapaalagey to. (1 Arari 9:15-19) Diad pangokotkot na saray arkeologo et wala met so asabi ran parte a pakapatnagan a sayan syudad et pinoolan. Nibagan agawa itan nen kagapoy komasamplon siglo B.C.E, nayarin diad samay panaoy inlusob nen Arin Sisac na Ehipto, limay taon labat kayari impatey nen Solomon. Diad Karnak a walad abalaten na Ehipto et walay padir ya inukitan a nipaalagey bilang pakanodnonotan ed satan ya inlusob. Ditan et akasulat so Arad bilang sakey ed saray dineral a syudad.​—2 Awaran 12:1-4.

Say nagkalalon makapainteres et maslak ed saramay aromog dan manga 200 ya ostraka et walay akasulat a kangaranan a Hebreo a naromog met ed Biblia, singa say Pasur, Meremot, tan saray anak a lalaki nen Kore. Balet, say mas makapalikliket et akasulat ed arum ed sarayan ostraka so mismon ngaran na Dios. Sayan ngaran et irerepresenta na apatiran Hebreo a letra a יהוה (YHWH)​—a tatawagen met a Tetragrammaton​—ngaran a para labat ed Makapanyarin-amin a Dios. Ingen diad saginonor, nisengeg ed anito et anisiaan na dakel a say pamitla odino pangisulat ed ngaran na Dios et singa la panag-ayew ed satan. Anggaman ontan, saray adiskobre ed Tel Arad, a singa met ed arum ni ra et mangokompirma a diad samay panaon ya isusulat ni labat so Biblia, say ngaran na Dios et bibitlaen ed inagew-agew, sano mangibabano tan mamebendisyon. Alimbawa, oniay inkuan na sakey ya inskripsion: “Parad Katawan kon Elyashib. Imanoen komon nen Yahweh [Jehova] so pankaabigan mo.”

Komusta balet so nipaakar ed samay misteryoson templon atukoy ed gapo? Sayan templo ed Tel Arad, a kompleto anggad altar, tan sani nen panaon na Judea, et amalesay amayamay ya espikulasyon.  Anggaman memelag itan a templo nen samay templo nen Solomon ed Jerusalem, walay pamparpara ra. Kapigan ta impaalagey iyan templo na Arad tan akin ya impaalagey itan? Panon so impangusar ed satan? Say nagawaan labat na saray arkeologo tan historyador et say manpalbeng.

Malinlinew ya ingganggan nen Jehova a Dios a say templo ed Jerusalem labat so pasen a naabobonan a panselebraan ed saray tinaon a piesta tan pambagatan na saray apay. (Deuteronomio 12:5; 2 Awaran 7:12) Kanian sumlang ed Ganggan na Dios so impampaalagey tan impangusar ed templo na Arad, a nayarin diad samay panaon a manbabagat iray Israelita ed arum iran altar tan akibiang ira’d arum a ritual imbes a dayewen komon si Jehova ed dugan paraan. (Ezequiel 6:13) No bilang ta tua itan, sayan sentro na palson panagdayew et posiblin aderal legan na samay pasyaan a reporma a ginawa nen Hezekias odino si Josias nen komawalo tan komapiton siglo B.C.E.​—2 Awaran 31:1; 34:3-5, 33.

Mabitabitar sirin a sarayan akeran kabiangan na Arad et mangiiter na importantin leksion ed sikatayo. Anggaman nitabon ed buer diad dakel lan siglo, sarayan adeskobrin ebidensya et mamepekder ed inkasusto na Biblia tan mamapaneknek ed inkiwala tan inkaderal na sakey a panagdayew ya alig-alig lambengat. Ontan met, mangiiter iya na ebidensya a say ngaran na Dios a Jehova et marespeton inusar ed inagew-agew.

[Mapa/Litrato ed pahina 23]

(Parad aktual a format, nengnengen so publikasyon)

JERUSALEM

Dead Sea

Arad

Tel Arad

[Credit Line]

Pictorial Archive (Near Eastern History) Est.

[Litrato ed pahina 24]

Saraya so niyukit ed pakanodnonotan a padir diad Karnak, Ehipto

[Credit Line]

Pictorial Archive (Near Eastern History) Est.

[Litrato ed pahina 25]

Onia so nabasan kabiangan na inskripsion: “Imanoen komon nen Yahweh [Jehova] so pankaabigan mo”

[Credit Line]

Photograph © Israel Museum, Jerusalem; courtesy of Israel Antiquities Authority

[Litrato ed pahina 25]

No wala ka’d bukig, onia so itsura na apadiran a Tel Arad

[Litrato ed pahina 25]

Sakey a kabiangan na templo ed Tel Arad

[Picture Credit Line ed pahina 25]

Todd Bolen/Bible Places.com