Pitoran Paraan Pian Minabang a Maong ed Pambasay Biblia

“Say Biblia so sankasaliwan a libro anggan kapigan, tan kada taon et siansia nin satan so sankasaliwan.”​—TIME MAGAZINE.

“Manbabasa ak met na Biblia sagpaminsan, balet ta makapasawa.” ​—KEITH, SIKAT A MUSIKERON TAGA ENGLAND.

ANGGANO dakel so totoon walaay Biblia, singa anggapo met lanlamang so naaala ra’d pambabasa da ed satan. Walara met balet so makakaapresya ed nababasa ra’d Biblia. Singa bilang, oniay imbaga nen Nancy: “Manlapu la nen kinabuasan kon babasaen tan momolimolien so Biblia, sarasarag kon arapen so antokaman a nagawa’d sanagew. Sayan rotinak et mas baleg ni nitulong to ed tubat-tubat a pakaka-depress ko nen say arum nin paraan a ginawak ed apalabas a 35 taon.”

No bilang ta agmo ni asalin balot a binasay Biblia, agmo ta pankelawan no panon ya atulongan so arum lapud satan? No manbabasa ka lay Biblia, labay mo ta’n lalon minabang ed pambabasam? No on so ebat mo, salim irayay pitoran paraan a wadiad sayan artikulo.

STEP 1​—Nepeg a duga so rason mo

▪ Nayarin say rason no akin a basaen moy Biblia et lapud parad sika, balibali itan a basaen odino lapud singa obligado kan basaen itan odino ompan manaanap kay simbawan mangigiya’d sika ed sayan magulon mundo. Balet, minabang kan maong no say rason mo et lapud labay mon naamtaan so katuaan ed Dios. Ontan met, maabig so resulta no say sakey nin rason mo et pian nanengneng mo no panon ya say mensahe na Biblia et apektaen toy bilay mo.

Pian nipanengneng a nepeg ya duga so rason tayo’d pambasa ed Biblia, nikompara so Biblia ed espiho. Onia so nabasa ed Santiago 1:23-25: “No say sakey et dumerengel na salita balet  agmananumpal, sikatoy singa samay toon nenengnengen toy lupa to ed espiho. Ta ninengneng toy inkasikaton dili insan kaalis to et alingwanan to lan tampol no antoy itsura to. Balet samay manuusisan maong ed ayadyarin ganggan a mangitonton ed kawayangan tan pampepelengan ton gawaen itan, sayan too et magmaliw a maliket ed panggagawa to ed satan lapud sikatoy mananumpal na kimey, aliwan mililingwan a dumerengel.”

Diad sayan alimbawa, nan-espiho ya tua imay too balet ta agto met lanlamang inayos so itsura to. Nayarin agano labat so innengneng to’d espiho, odino talagan agto labay so man-ayos. Ontan met ed panagbasay Biblia. Dagdaiset labat so napinabangan tayo no paspasaray so panagbasa tayo odino agtayo met lanlamang iyaaplikay nababasa tayo. Balet, nalikna tayoy tuan liket no say rason tayo’d pangusisa ed Biblia et lapud labay tayon unoren so Dios, a diad kanonotan tan aksion tayo et paigiya tayo’d sikato.

STEP 2​—Pilien so bersion a susto tan mainomay a talosan

▪ Nayarin diad lenguahem et dakel so napampilian mon bersion na Biblia. Napinabangan mo so dinanman ed saratan, balet say arum a bersion et angusar na dagdaan odino araldalem iran salita kanian mairap a talosan. (Gawa 4:13) Walara ni ingey pigaran bersion ya nauman so mensahe na Biblia lapud tradisyon. Alimbawa, nabasa ed bandad gapo na sayan magasin a diad arum a bersion et sinalatan so ngaran na Dios a Jehova na saray titulo a singa say “Dios” odino “Katawan.” Kanian say anap mo et amay bersion a susto so inkipatalos to tan mainomay a talosan iray salitan inusar pian labalabay mon basaen.

Apaneknekan a mismo na saray minilyon a manbabasa’d New World Translation (Balon Mundo a Patalos) a satan et susto so inkipatalos to tan mainomay a talosan. * Walay maedad lan laki ed Bulgaria ya inmatendi ed aral na saray Tasi nen Jehova tan diman et inikdan day New World Translation. Kayari to et imbaga ton: “Abaybayag ak lan manbabasay Biblia balet ta natan ak labat akabasa na bersion ya mas mainomay a talosan tan nasabi toy puso.”

STEP 3​—Manpikasi

▪ Mas natalosan moy Biblia no kerewen moy tulong na samay Autor to, a singa samay ginawa na salmista: “Lukasan mo pa ray matak pian nanengneng ko iray makapakelaw a katuaan a walad ganggan mo.” (Salmo 119:18, Maung a Balita) Manpikasi ka ed Dios kada no manbasa kay Biblia, a kerewen mon tulongan to ka pian natalosan moy Salita to. Sarag mo met ya ibalikas so pisasalamat mo lapud inter toy Biblia, ta no anggapo itan, agtayo nakabat so Dios.​—Salmo 119:62.

Dedengelen kasi na Dios so ontan iran pikakasi? Imanoen pay naeksperiensya na sanagin tinedyer ed Uruguay. Agda natalosan so ibabaga na Biblia ed Daniel 2:44 kanian nampikasi ra’d Dios ya mangibaki komoy ontulong ed sikara pian natalosan da itan. Akabukay ni Biblia da ed satan a teksto sanen walay duaran Tasi nen Jehova ya linma’d abung da tan satan a mismon bersikulo so imbasa ra ed sanagi. Impaliwawa ran saray gobierno na too et salatan na Panarian na Dios. * Parad saramay sanagi, saya so ebat na Dios ed pikakasi ra.

STEP 4​—Manbasan inagew-agew

▪ Naimano na sakey a publisher na libro a biglan lalon dinmakel so alakon Biblia kayari na samay inyataki na terorista ed United States nen Setyembre 11, 2001. Dakel so manbabasa labat na Salitay Dios sano walaray onian nagagawa, odino sano walay problema ra. Balet, mismon say Biblia so mangibabagan nepeg ya inagew-agew tayo itan a basaen, a kuan to: “Nepeg a pampelengan mo a say libro na Ganggan et nibasa lawas no mangigalang kayo’d siak. Aral mo’d agew tan labi, tan pampelengan  mon unoren iray amin a nisulat. Diad satan onaligwas ka tan maong so pansumpalan mo.”​—Josue 1:8, MB.

Say kaimportantian na naynay a panagbasay Biblia et nayarin iyalimbawa ed laki ya naataki’d puso tan labay ton puro masustansia lay kanen to. Maong kasi resulta no alagaren to nin onsakit so pagew to insan labat mangan na masustansia? Andi. Kaukolan a say kanen ton naynay et masustansia pian talagan minabang. Ontan met, kaukolan ya inagew-agew so pambasam na Biblia pian “maong so pansumpalan mo.”

STEP 5​—Salien so arum a paraan

▪ Maabig met no basaen moy Biblia manlapud Genesis anggad Apocalipsis, balet nayarin mas naliketan ka’d pambasam no salien moy arum a paraan. Nia ray pigaran suhestion.

Basaen so nipaakar ed sakey a karakter. Basam so amin a kapitulo odino libro ed Biblia a nipaakar ed sakey a lingkor na Dios, a singa si:

• Jose: Genesis 37-50.

• Rut: Rut 1-3.

• Jesus: Mateo 1-28; Marcos 1-16; Lucas 1-24; Juan 1-21. *

Manpokus ed saksakey a topic. Basaen so amin a teksto nipaakar ed satan a topic. Singa bilang, manresearch nipaakar ed pikakasi, insan mo basaen iray bilin na Biblia nipaakar ed satan, tan ontan met ed saray dakel ya pikakasin akarekord ed Biblia. *

Manbasan maksil. Minabang kan maong no maksil so pambasam ed Biblia. (Apocalipsis 1:3) Sarag yo met so manbasan maksil bilang pamilya, a mansusublayan kayon manbasa ed saray bersikulo odino i-assign iray membro na pamilya a basaen so dialogue na nanduruman karakter. Walaray labalabay day ondengel ed rekording na Biblia. Oniay inkuan na sakey a bii: “Nairapan ak ya igapon basaen so Biblia, kanian sinalik nin dengelen so rekording na satan. Natan et mas naliliketan ak nin basaen so Biblia nen saray nobela.”

STEP 6​—Nonot mon maong so binasam

▪ Diad sayan panaon tayo, dakel so pakadisturboan tan mapmaples ya onlabas so oras kanian mairap so mangiganay panaon pian moli-molien odino nonoten a maong so binasa tayo ed Biblia. Balet ta kaukolan tayo itan pian minabang itayo, no panon ya kaukolan tayon gilingen so inakan tayo pian naala na laman tayoy sustansia na satan. Kanian diad isip mo et rebyum imay binasam tan nonot mo so onia ran tepet: ‘Antoy naaralan ko’d saya nipaakar ed Dios a Jehova? Panon kon nausar iya ed bilay ko? Panon kon usaren iya pian natulongan so arum?’

No ontan so gawaen tayo, onsabi’d puso tayo so mensahe na Biblia, tan mas naliketan itayo’d pambasa ed Salitay Dios. Ibabaga na Salmo 119:97 ya: “O agayla so panangarok ed ganggan mo! Sikato so dalepdep ko ed amin ya agew.” Naad-aron maong na salmista iray naaralan to lapud dinalepdep odino ninonot ton maong so walad Kasulatan.

STEP 7​—Manpatulong ka pian natalo-talosan mo

▪ Ag-iilaloan na Dios a diad sarili tayo et natalosan tayon maong so Salita to. Mismon say Biblia ingen so mangibabaga a walaray nabasa ditan a “mairap a talosan.” (2 Pedro 3:16) Isasalaysay na libro na Gawa so nipaakar ed opisyal a taga Ethiopia ya agto natalosan so sakey a parte na Biblia a binasa to. Imbaki na Dios so sakey a lingkor To pian natulongan, kanian saman a too et “nantultuloy ya amaarap ed dalan to a malikeliket.”​—Gawa 8:26-39.

Mas minabang ka met ed pambabasam na Biblia tan natalo-talosan mo itan no manpatulong ka. No labay moy paiyaralan na Biblia ya anggapoy bayar, sarag mon kontaken iray Tasi nen Jehova ed lugar yo odino mansulat ka’d address a walad pahina 4 na sayan magasin.

[Saray paimano ed leksab]