MANAAKAR si Elias diad Lawak na Jordan. Pigay simba to lan manaakar, manlapud Palandey Horeb, sikatoy amaarap ed norte. Akapawil a siansia ed Israel tan natan et nanenengneng to la ray pananguman ed baley to. Onggagapo lan naandi iray epekto na andukey a kelang. Onuuran-uran la tan manbabaka la ray dumaralos ed kaumaan da. Nayarin anggan panon et makakaliket so propeta ya nanengneng so iyaabig na dalin, balet say talagan pampapagaan to et saray totoo. Agni ra inmabig ed espiritual. Dakel nin siansia so mandadayew ed si Baal kanian dakel ni so kaukolan ya gawaen nen Elias. *

Diad asingger ed baley na Abel-mehola, sankanengneng nen Elias so baleg ya trabaho na panagdalus. Walay 24 a baka ya sanderwan aka-pako, tan sayan 12 paris et bansag ya manbabaka, tan manggugulis ed anlemek ya dalin. Samay lakin walad sampot ya paris so toon aanapen nen Elias. Si Eliseo iman, say pinili nen Jehova ya magmaliw a kasalat nen Elias. Say amta nen Elias et bukbukor to lay matoor ed Dios, kanian seguradon labalabay to lan nanengneng iyan too.—1 Arari 18:22; 19:14-19.

Kasin anggan panon et talawan met si Elias ya iter ed arum so pigarad saray responsabilidad to, inabang iray pribilehyo to, odino onsabi panaon et walay onsalat ed sikato? Agtayo nibaga, balet posible ya naisip to met iratan. Lalo la ta si Elias et “sakey a toon walaan na liknaan a singa sikatayo.” (Santiago 5:17) Antokaman so agawa, ibabaga na Biblia ya: “Si Elias linmabas ed sikato tan [imbuntok] to so sukbong to ed sikato.” (1 Arari 19:19) Say sukbong nen Elias odino kawes ton parad propeta—a nayarin gawad katat na karnero odino kanding—et ikokolibemben, tan pakapatnagan itan ya sikatoy tinuro nen Jehova. Say impangibuntok tod satan ed si Eliseo et makabkabaliksan. Mabulos ya inunor nen Elias so ganggan nen Jehova ya turoen si Eliseo ya onsalat ed sikato. Nanmatalek si Elias ed Dios to tan inunor to.

Diad biang nen Eliseo, labalabay ton tulongan so matatken lan propeta. Agmet salatan ya tampol nen Eliseo si Elias. Imbes, manga anem taon ya mapaabeba ton inibaan tan tinulongan so mas matatken ya propeta, tan sikatoy akabat bilang samay ‘mangiyiibung na danum ed saray lima nen Elias.’ (2 Arari 3:11) Seguradon maliket si Elias ya nawalaay marunong tan matulong ya lingkor! Nayarin tampol iran nagmaliw a maapit ya sankaaro. Seguradon akatulong ed sikaran dua so pampapasesegan dad sakey tan sakey ya mansungdo anggaman naiimatonan da ray graben ag-inkahustisya. Sakey la et say iloloor na kaugsan na ari ya si Ahab.

Nipapaarap ka kasi ed ag-inkahustisya? Ontan so nai-eksperiensya na maslak ed sikatayo diad sayan mauges ya mundo. No walay kaarom ya mangaarod si Jehova, natulongan to kan mansungdo. Dakel met so naaralan mod pananisia nen Elias no antoy gawaen mo no nipaarap kad ag-inkahustisya.

Nanseet a maong si Elias tan Eliseo pian pabiskegey espiritualidad na totoo. Mapatnag ya indaulo day panangipasal ed arum nin propeta, a nayarin inorganisa ira a singa manaaral ed eskuelaan. Balet sinmabi panaon, akaawat si Elias na balon asainmin manlapud si Jehova: “Onalagey ka, onlasor ka ya onabet ed Ahab ya ari ed Israel.” (1 Arari 21:18) Anto kasi ginawa nen Ahab?

Apostata la so ari, say sankaugesan ya ari na Israel ed saman ya panaon. Inasawa toy Jezebel, kanian kinmayat so panagdayew ed si Baal, ya anggan say ari et mibibiang met. (1 Arari 16:31-33) Kaibad panagdayew ed si Baal iray ritual ed inkamabuna, ritual ed prostitusyon, tan anggan say panagbagat na ugaw. Kaaruman ni, kakkayarin sinumlang nen Ahab si Jehova diad agto impamatey ed mauges ya ari na Sirya a si Ben-hadad. Mapatpatnag ya ag-inmunor si Ahab lapud iilaloan ton walay napinabangan ton kuarta. (1 Arari, kapitulo 20) Natan balet et mas linmoor so inkaagum, inka-materyalistiko, tan inkaruksa nen Ahab tan Jezebel.

Walay palasyo nen Ahab diad Samaria—tan talagan balbaleg itan! Wala met so palasyo tod Jezreel, manga 37 kilometro manlapu ditan. Diad abay na sayan komaduan palasyo, walay sakey ya ubasan. Talagan labalabay a naala nen Ahab itan ya melag a dalin ya kayarian na laki a manngaray Nabot. Sikatoy impatawag nen Ahab pian saliwen odino salatan so ubasan to. Balet, oniay imbaga nen Nabot: “Si Jehova insebel to ed siak, ya iter ko ed sika so tawir na saray ateng ko.” (1 Arari 21:3) Kasin mairap ya katalosan si Nabot? Odino palpalaran? Ontan so iisipen na dakel. Balet diad tua, inunor toy Ganggan nen Jehova ya agnepeg a permanentin ilako na saray Israelita so kayarian dan dalin ya tawir na pamilya da. (Levitico 25:23-28) Parad si Nabot, agton balot sarag ya sumlangen so Ganggan na Dios. Talagan mabiskeg so pananisia to tan makpel, ta seguradon amta to ya mapeligro so onkontrad si Ahab.

Siempre anggapoy pibabali nen Ahab ed Ganggan nen Jehova. Sinmempet ya say liknaan to et “ambelabelat tan maermen” ta agto nalay labay to. Nabasa tayo ya sikatoy “dinmukol ed dukolan to, tan inlingaw to so lupa to, tan ag angan.” (1 Arari 21:4) Nen anengneng nen Jezebel so asawa ton akasibangot ya singa ugaw, tampol ya nanisip no panon ya naala na asawa to so labay to—tan kaiba met lay pamatey ed sakey a matunong a pamilya.

No basaen moy nipaakar ed impanplano to, seguradon nabigla kad inkauges to. Amta nen Reyna Jezebel ya kakaukolanen na Ganggan na Dios so testimonya na duaran tasi pian napekderan so sakey a seryoson akusasyon. (Deuteronomio 19:15) Kanian sikatoy nansulat ya inusar toy ngaran nen Ahab, tan ingganggan to ray gagalangen ya totoo na Jezreel ya mananap na duaran lalaki a malabay ya mangakusad si Nabot—ya ibaga ran inayew toy ngaran na Dios, tan say dusa na satan et patey. Makapaermen ta agawa so implano to. Duaran andi-kakanaan a lalaki so palson nantestigo sumpad si Nabot, kanian sikatoy tinupak na bato ya anggad inatey.  Aliwan satan labat—saray anak a lalaki nen Nabot et pinatey met! * (1 Arari 21:5-14; Levitico 24:16; 2 Arari 9:26) Singa binenegan nen Ahab so inkaulo to lapud pinaulyan toy asawa ton gawaen so labay to tan pateyen iray inosentin totoo.

Isipen pa labat so alikna nen Elias nen impaamta ed sikato nen Jehova so ginawa na ari tan reyna. Talagan makapadismaya no singa ontatalona iray mauges ya totoo ed panaglames dad saray inosente. (Salmo 73:3-5, 12, 13) Natan et mabetbet tayon nanengneng so graben ag-inkahustisya—no maminsan et gagawaen iya na anggan saray totoon walaay pakayari tan mangibabagan representanti ra na Dios. Balet, nayarin naligliwa itayo ed sayan salaysay. Diad saya et ipapanengneng ed sikatayo na Biblia ya anggapoy niyamot ed si Jehova. Nanenengneng ton amin. (Hebreos 4:13) Tan antoy gagawaen to ed saray kaugsan ya nanenengneng to?

Imbaki nen Jehova si Elias ed si Ahab. Direktan imbaga na Dios ya: “Sikato so wala ed kaubasan nen Nabot.” (1 Arari 21:18) Sanen imbaga nen Jezebel ed si Ahab ya gawa to la may ubasan, binmangon tan linmad satan ya balon kayarian to. Agto labat inisip ya sikatoy sankanengneng nen Jehova. Imadyinen pay itsura to legan ton liliberen so ubasan, amayamay lay plaplanoen to pian magmaliw itan ya balibalin hardin. Balet biglan sinmabi si Elias! Binmilunget so lupa nen Ahab, asalatan na sanok tan pambusol imay liket to legan ton ibabaga iray salitan: “Aromog mo ak, O kabusol ko!”—1 Arari 21:20.

Napatnagan ed saray salita nen Ahab so inkamakulangkulang to. Singa bilang, nen imbaga tod si Elias ya “Aromog mo ak,” mapatpatnag ya agto ninonot si Jehova. Ta diad tua, sikatoy “aromog” la nen Jehova. Anengneng nen Jehova ya ginagala nen Ahab so manggaway mauges tan panliketan toy resulta na mauges ya plano nen Jezebel. Anengneng na Dios ed puso nen Ahab ya mas importante ed sikatoy materyal iran bengatla nen say panangasi, hustisya, odino panangabagey ed arum. Sakey ni, nen imbaga tod si Elias ya “O kabusol ko!,” napatnagan ed si Ahab so pambusol tod kaaro nen Jehova a Dios ya ontulong komon ed sikaton manguman ed mauges iran gagawaen to.

Nayarin walay naaralan tayod inkamakulangkulang nen Ahab. Naynay tayon tandaan ya amin et  nanenengneng nen Jehova a Dios. Bilang maaron Ama, amta to no aliwa lay gagawaen tayo, tan labalabay ton manguman tayo. Pian natulongan itayo, mabetbet ton usaren iray kaaro to—saray matoor ya totoon singa si Elias, ya ipapasabi day mensahe na Dios ed saray kapara dan totoo. Talagan baleg a lingo no ipasen tayon kabusol iray kaaro na Dios!—Salmo 141:5.

Imadyinen pay Elias ya ibabaga tod Ahab: “Aromog ta ka.” Naamtaan to no antoy inkatoo nen Ahab—sakey a matakew, managpatey, tan rebelde ed Jehova a Dios. Talagan kaukolan toy pakpel pian onarap ed satan ya mauges a too! Imbaga nen Elias so dusa na Dios ed si Ahab. Amta nen Jehova so amin ya nagagawa—onloloor so kaugsan na pamilya nen Ahab tan naiimpluensyaan iray totoo. Kanian imbaga nen Elias ed si Ahab ya “sigpot a panisen” na Dios so uley na pamilya to. Tan kaukolan met ya nadusa si Jezebel.—1 Arari 21:20-26.

Agmet inisip nen Elias ya basta labat natakasan na totoo iray mauges ya gagawaen da. Ontan so mabetbet ya iisipen na totoo ed mundo natan. Ipapanonot na sayan salaysay ed Biblia ya aglabat nanenengneng nen Jehova a Dios iray nagagawa noagta onaksion met ed dugan panaon pian niwalay hustisya. Ipapaseguro ed sikatayo na Salita to ya asingger to lan panganggaen so amin ya ag-inkahustisya! (Salmo 37:10, 11) Balet ompan isipen mo: ‘Kasin saray panangukom na Dios et puro labat dusa? O mapangasi met?’

Nayarin abigla si Elias ed reaksion nen Ahab ed dusa na Dios. Oniay nabasa tayo: “Sanen si Ahab nadngel to so saraman a salita, pinilat to so saray aysing to, tan angiyan na magaspang ya abel ed laman to, tan nanayunal, tan dinmukol ed magaspang ya abel, tan linma a makalkalna.” (1 Arari 21:27) Kasin magbabawi lay Ahab ed saray ginawa to?

Say nibaga tayo et sikatoy anguman. Nampaabeba si Ahab—seguradon mairap iman parad sakey ya mapaatagey tan matangas ya too. Balet kasin talagan magbabawi? Ikompara tayo pay Manases, sakey ya arin pinalumbasan toy inkauges nen Ahab. Nen dinusa nen Jehova si Manases, sikatoy nampaabeba tan kinmerew na tulong ed si Jehova. Balet aliwan satan labat, inuman to met so bilay to diad impaneral ed saray imahen ya ginawa to, nansagpot ya manlingkor ed si Jehova, tan pinaseseg to ray totoo ya mandayew met. (2 Awaran 33:1-17) Ontan met kasi ginawa nen Ahab? Makapaermen ta andi.

Naimano kasi nen Jehova so impangipanengneng nen Ahab na panermen to? Oniay imbaga nen Jehova ed si Elias: ‘Anengneng mo no panon a si Ahab nampaabeba ed arap ko? Lapud’no nampaabeba ed arap ko; agko yakar so mauges dia ed saray agew to; balet dia ed saray agew na anak to yakar ko so mauges ed abung to.’ (1 Arari 21:29) Kasin pinerdona la nen Jehova si Ahab? Andi, naawat labat so panangasi na Dios no tua so pagbabawi. (Ezequiel 33:14-16) Balet lapud anggan panon et nagbabawi si Ahab, sikatoy makatunongan met ya kinasian nen Jehova. Agnanengneng nen Ahab so makapasinagem ya ipatey na interon sankaabungan to.

Balet siansian ag-anguman so dusa nen Jehova ed sikato. Tinepetan nen Jehova iray anghel to no antoy maabig a paraan ya pamalikdod si Ahab pian onlan milaban ya sengegay ipatey to. Ag-abayag, agawa so dusa nen Jehova ed si Ahab. Asugatan na grabe tan inmagus so dala nen Ahab diad karwahe to ya anggad inatey la ditan. Unong ed salaysay, onia ni arum ya detalye: Nen uurasan lay karwahe na ari, dinildilan na saray aso so dala to. Anengneng na saray totoo no panon ya asumpal iray salita nen Jehova ya imbaga nen Elias ed si Ahab: “Dia ed pasen a nandildilan na saray aso ed dala nen Nabot saray aso dildilan da so dalam, say dili a kien mo.”—1 Arari 21:19; 22:19-22, 34-38.

Parad si Elias, Eliseo, tan saramay nanmatoor ya kabiangan ed totoo na Dios, say nansumpalan nen Ahab et panonot ya ag-alingwanan nen Jehova so inkakpel tan pananisia nen Nabot. Seguradon say Dios ya mahustisya et dusaen to ray mauges, nayarin tampol odino onlabas ni panaon; tan seguradon mangipanengneng na panangasi ed pangukom to no manepeg. (Numeros 14:18) Alay abig itan ya leksion parad si Elias, ya pigaran dekadan nansungdo ed pananguley na mauges ya ari! Kasin biktima ka na ag-inkahustisya? Labalabay mo la kasin ipetek na Dios iray nagagawa? Maabig no aligen moy pananisia nen Elias. Kaiba toy matoor ya si Eliseo, tuloytuloy ton inyabawag iray mensahe na Dios tan sinungdoan toy ag-inkahustisya!