No kurakot so komunidad, agta anggan anton gobiernon kabiangan na satan et seguradon kurakot met? No ontan sirin, say gobierno ya anggapoy kurapsion et agmanlapud komunidad na too. Ibabaga na Biblia ya walay ontan ya gobierno—say Panarian na Dios, samay gobiernon imbangat nen Jesus ya ipikasi na saray papatumbok to.—Mateo 6:9, 10.

Say Panarian na Dios et tuan gobierno ya manuuley ed tawen. Salatan na satan so amin ya gobierno na too. (Salmo 2:8, 9; Apocalipsis 16:14; 19:19-21) Sakey ed saray gawaen na Panarian et ekalen toy kurapsion. Imanoen pay anemiran aspekto na Panarian ya mangipasegurod saya.

PROBLEMA: Say pundo na gobierno et manlalapud saray sakop to, maslak et panamegley na saray buis. Natutukson mantakew so arum ya opisyal lapud nabebembenan da irayan kuarta, say arum balet et mangaawat na pasuksok ed saramay labay dan nabawasay buis o arum nin babayaran dad gobierno. Kanian agmanunday problema—itagey na gobierno so buis pian nasalatan iray kinurakot da, tan dakel lamet so kurakoten da. No ontan, say talagan nairapan et saray totoon matua.

SOLUSYON: Say pakayari na Panarian na Dios et manlapud makapanyarin amin a Dios, si Jehova. * (Apocalipsis 11:15) Agto kaukolan so mankolektay buis parad saray programa to. Lapud “pakapanyari” tan inkamaiter na Dios, seguradon itarya na Panarian so amin ya kaukolan na saray sakop to.—Isaias 40:26; Salmo 145:16.

PROBLEMA: No ekalen so kurapsion, “nepeg ya igapod tagey,” so kuan nen Susan Rose-Ackerman, ya abitlad akaunan artikulo. Nababawasan so kredibilidad na gobierno no sasalien dan ekaley kurapsion ed saray pulis tan opisyal ed customs balet ta kokonsintien da ray atagey ya opisyal. Tan anggan say sankamaprinsipyoan lan too et siansia nin aliwan perpekto. Singa ibabaga na Biblia, “anggapoy too diad tapew na dalin a manggagawa lawas na kamaongan.”—Ecclesiastes 7:20, Maung a Balita.

SOLUSYON: Aliwan singa saray totoo ya agperpekto, si Jesus ya pinili na Dios ya Manuley na Panarian et agbalot natukso ya manggaway aliwa. Impanengneng iya nen Jesus nen impulisay to so sankabalegan ya pasuksok—“amin a panarian na mundo tan say karakpan na saratan.” Insipan na “manuley na mundo,” say Diablo, ya iter to iratan ed si Jesus no ondakmomo tan mandayew ed sikato ya maminsan. (Mateo 4:8-10; Juan 14:30) Anggan nen papairapen si Jesus, determinado ya mansiansian matoor kanian agto ininum so ipapainum dad sikato, ya say epekto to et agto naliknay sakit balet ompan agto met la amtay gagawaen to. (Mateo 27:34) Natan ya pinaoli la na Dios ed tawen, pinaneknekan nen Jesus ya sikatoy talagan kualipikadon manuley ed Panarian.—Filipos 2:8-11.

PROBLEMA: Diad dakel ya bansa, regular ya walay eleksion. Iisipen dan lapud satan et sarag na totoo ya ekalen ed puesto iray kurakot ya opisyal. Balet diad tua, dakel so kurapsion no panaoy kampanya tan eleksion, pati diad mayayaman ya bansa. Sarag ya impluensyaan na mayayaman iray kaplesan ya opisyal tan saray manalod eleksion diad pangiter day pundo parad pankampanya ra tan diad pansuportad sikara.

Insulat nen Justice John Paul Stevens na U.S. Supreme Court ya say ontan ya impluensya et makaapekto “aliwa labat lan diad autoridad tan kalidad na Gobierno noagta pati diad talek na totoo.” Agla pankelawan sirin ya diad interon mundo et dakel so maniisip ya diad amin ya institusyon, say sankagrabiay kurapsion et diad saray partido na politika.

SOLUSYON: Lapud mansiansia tan permanentin manuley so Panarian na Dios, anggapo lay nagawan panagsaol ed kampanya tan eleksion. (Daniel 7:13, 14) Ontan met, lapud Dios so nampili na Manuley, ag-akadepende so Panarian ed boto na totoo tan agda itan napaekal ed puesto. Kanian makaseguro tayo ya amin a gawaen to et parad pankaabigan na saray sakop to.

PROBLEMA: Nayarin say naisip mon solusyon et manggaway balo iran ganggan. Balet anengneng na saray eksperto ya no aruman iray ganggan, mabetbet et ondadakel labat so pankanawnawa parad kurapsion. Sakey ni, kaslakan et baleg so gastos no ipaakseb iray ganggan ya ginawa pian paandien so kurapsion, balet ta datdaiset labat so nagawaan na saratan.

SOLUSYON: Saray ganggan na Panarian na Dios et atagtagey a maong nen saray ganggan ed gobierno na too. Singa bilang, imbes ya ilistan sansakey no anto ray nepeg tan agnepeg ya gawaen, inter nen Jesus so tatawagen ya Golden Rule. Inkuan to: “Amin a bengatlan labay yon gawaen na totoo ed sikayo, ontan met so nepeg yon gawaen ed sikara.” (Mateo 7:12) Tan diad saray ganggan na Panarian, importante so motibo tan gawa. Inkuan nen Jesus ya: “Arom so kaparam a too a singa ed sikan dili.” (Mateo 22:39) Siempre, say makapangiter labat na ontan iran ganggan et say Dios ya makabasa na puso.—1 Samuel 16:7.

PROBLEMA: Say lamot na kurapsion et inkaagum tan inkamakasarili. Saray opisyal na gobierno tan saray sakop da et kaslakan ya mangipapanengneng na ontan iran makapuy ya ugali. Diad samay ageban department store ed Seoul ya abitlad akaunan artikulo, pinasuksokan na saray kontraktor iray opisyal na gobierno ta amta ran mas daiset so nagastos dad satan nen say pangusar na dugan klase na materyales tan panumbok ed dugan paraan na panagpaalagey.

Pian naekal so kurapsion, kaukolan sirin ya ibangat iray totoo ya ekalen iray makapuy ya motibo a singa say inkaagum tan inkamakasarili. Balet ta anggapoy determinasyon tan abilidad na gobierno na too ya mangibangat ed satan.

SOLUSYON: Ekalen na Panarian na Dios so kurapsion manlapud lamot diad pangibangat ed totoo  no panon dan ekalen iray makapuy ya motibo ya panlalapuan na kurapsion. * Ontulong itan ya edukasyon ed sikara pian “pasimbaloen so puersa a mamapakiwas ed kanonotan” da. (Efeso 4:23) Naaralan da ya imbes ya magmaliw a maagum tan makasarili et kaukolan day magmaliw ya kontento tan manonot ed pankaabigan na arum.—Filipos 2:4; 1 Timoteo 6:6.

PROBLEMA: Anggan ed saramay totoon maong so binalegan da tan abangatan iray duga, walan walay magmaliw ya masaol tan kurakot. Aminen na saray eksperto ya satan so rason no akin ya agnaekal na gobierno na too so kurapsion. Say realistiko labat ya nailaloan tayo et posiblin nabawasan so kurapsion tan say makapuy ya epekto na satan.

SOLUSYON: Ibabaga na United Nations Convention Against Corruption ya pian nalabanan so kurapsion, nepeg ya ipurek na gobierno so “katooran, inkamatua, tan pagmaliw ya responsable.” Marakep itan ya gagala, balet say Panarian na Dios et agto labat ipupurek iratan ya ugali—igaganggan to iratan ed saray sakop to. Ibabaga na Biblia ya saray “maagum” tan “matitila” et agda natawir so Panarian na Dios.—1 Corinto 6:9-11; Apocalipsis 21:8.

Sarag na totoo ya unoren irayan atagey ya prinsipyo ed moral, singa met ed saray Kristiano nensaman. Singa bilang, sinalin bayaran na disipulo ya si Simon iray apostol pian ikdan day masanton espiritu, balet agda itan inawat tan inkuan dad sikato: ‘Magbabawi ka ed sayan kaugsan mo.’ Nen naamtaan nen Simon ya mapeligro so makapuy ya iisipen to, akikasid saray apostol ya ipikasi dan nalabanan to itan.—Gawa 8:18-24.

Anggan anton bansay nanlapuan mo, sarag moy magmaliw ya sakop na Panarian na Dios. (Gawa 10:34, 35) Say programa na edukasyon na Panarian—ya nagagawa natan ed interon mundo—so mangibangat ed sika no panon. Maliket iray Tasi nen Jehova ya ipanengneng ed sika so libren panagaral na Biblia, ya nagawaan ed anggan samploran minuto labat kada simba. Naaralan mo met ed satan so “maong a balita na panarian na Dios,” pati no panon ya ekalen na satan so kurapsion ed gobierno. (Lucas 4:43) Salim ya kontaken iray Tasi diad lugar yo odino nengnengen so Web site mi ya jw.org/pag.