Ebat ed Saray Tepet ed Biblia
Onia labat la kasi bilay?
Naisip mo met la no kasin onia labat lay bilay, ya basta manggalaw, mantrabaho, mangasawa, manpamilya, insan ontatken? (Job 14:1, 2) Nanengneng ed Biblia ya anggan saramay talagan matatalinon totoo et naisip da met iya.
Wala kasi gagala na bilay? Amtaen ti nin unona, Panon ya ginmapoy bilay? Kayarin inaral na dakel so makapakelaw ya inkadesinyo na utek tan interon laman tayo, atalosan dan walay marundunong ya Amalsa ya nanggawad sikatayo. (Basaen so Salmo 139:14.) No ontan, seguradon walay rason no akin ya pinalsa to tayo! No amtaen tayo itan ya rason, magmaliw a mas makabaliksan so bilay tayo.
Akin et pinalsa iray totoo?
Benendisyonan na Dios so inmunan sanasawa tan inikdan to ray makapaliket ya asainmin. Labay ton panoen day dalin, gawaen da itan a paraiso, tan manbilay ira ya andi-angga.
Ag-agawan tampol so gagala na Dios lapud nanrebelde iray totoo ed pananguley to. Balet ag-anguman so gagala to parad sikatayo tan ed dalin. Ipapasegurod sikatayo na Biblia ya nanggaway Dios na paraan pian nisalba iray matoor ya totoo tan sumpalen iray gagala to parad dalin! Tan labay na Dios ya naeksperiensyam imay klase na bilay ya labay ton iter ed totoo! (Basaen so Salmo 37:29.) Aral mo diad Biblia no panon kan minabang a mismo ed gagala na Dios.