MANUNAN ARTIKULO
Siopa Iray Tasi nen Jehova?
“Pigay taon ko lan kabat si Mike. Sikatoy sakey ya Tasi nen Jehova. Balet agko natatalosay relihyon to. Siopa ’tay Jehova? Akin et ag-ira manseselebra na holiday? Kulto kasi alooban nen Mike?”
—Becky, California, U.S.A.
“Nen nanpa-Bible study iray kakaabay mi ed Saray Tasi nen Jehova, naisip ko: ‘Anto kasi labay ya ibaga na tawag ed sikaran, Tasi nen Jehova? Nikadkaduma ’tan ya ngaran na relihyon!’”
—Zenon, Ontario, Canada.
“Say inisip mi nen asawak, linmad sikami ray Tasi nen Jehova ta sasamboten day pakakakonsiensia mi ed agmi pakakapimisa. Tan no anggapod angkakabaleg iran relihyon so aanapen mi, di anggapo met ed saray nikadkaduman sekta, ya singa Saray Tasi nen Jehova.”
—Kent, Washington, U.S.A.
“Diad tua, agko amta no siopa ra tan no anto ray papanisiaan da.”
—Cecilie, Esbjerg, Denmark.
Nayarin anengneng mo la ran manpupulong ed kaabungan o diad publikon lugar, mangiiter na babasaen ya base ed Biblia, tan manoopresi na libren panagaral na Biblia. Ompan sakey ed sikara so angiter ed sika na sayan magasin. Nayarin nitepet mo met no siopan talaga ray Tasi nen Jehova. Ompan naisip mo met la iramay imbagad tagey.
No wala ray ontan ya tepet mo, iner mo anapey ebat? Panon mon naamtaan no anton talagay papanisiaan na Saray Tasi nen Jehova? Panlalapuay pundo da? Akin ya oonla rad kaabungan tan kakatongtongen da ray totoo ed publikon lugar?
“Dakel so abasak ed Saray Tasi nen Jehova diad Internet,” so kuan nen Cecilie, ya abitlad tagey. “Wala ray nadngel kon ibabaga na arum tan anisia ak ed dakel ya ibabaga dan kontrad sikara. Kanian aliwliway pakanengneng kod Saray Tasi nen Jehova.” Anggad akatongtong ton mismo ray Tasi tan naamtaan to ray dugan ebat ed saray tepet to.
Labay mon naamtaay dugan ebat ed saray tepet mod Saray Tasi nen Jehova? Tepetan mo ray talagan makaamtad sikara
