Diad sinmublay ya taon, ginmanap ak ed saray pelikula ya maslak et siak so bida. Labalabay na saray reporter so istoryay bilay ko, labalabay na saray photographer iray litratok, tan labay dan wala ak ed opening na saray pelikula tan negosyo. Siak so sentroy atension na totoo.

Say amtak maliket ka no onia, balet andi met manaya. Maslak ya pelikulak et action movie, mapeligro iman ta diad Hong Kong et agkami manguusar na ka-double, aliwan singa saray artista diad Hollywood ya mabetbet ya walay ka-double da. Kanian siak so manggawa na stunts, singa say pan-drive na motor ya ondalan ed atep na kotse. Dakel ed saray pelikulak et imoral tan pateyan. Wala met iray demonismo.

Nen 1995, akiasawa ak ed sakey a movie producer. Singa wala lan amin ed siak—inkasikat, kayamanan, tan maaron asawa—balet maermen tan a-depress ak. Kanian tinmunda ak lan man-artista.

Anggad nen makakaliket kon nanononotan so pananisiak nen ugaw ak ni. Nensaman, oonla kami nen atsik kada Sabado ed sakey ya pamilya na saray Tasi nen Jehova. Say ama, si Joe McGrath, et ibabangat to kami na Biblia kaibay taloran ananak to. Maar-aroy pamilya da, tan maabig so panagtrato nen “Uncle Joe” ed asawa tan ananak to. Nai-enjoy ko met no mimila ak ed saray pantitipon da. No maminsan, oonla kamid angkakabaleg ya pantitipon da. Malikeliket iraman ya panaon, pakaliknak et ligtas ak no kaibak iray Tasi.

Duma balet ed abung mi. Sakit na ulo ya  lanang nen Mommy si Daddy, kanian a-depress. Nen samploy taon ko, agla mimila si Mommy ed Saray Tasi nen Jehova. Siak balet intuloy ko anggano napipilitan ak labat, tan abautismoan ak nen 17 ak. Balet agbinmayag, walay ginawak ya aga dapat gawaen na Kristiano kanian nakal ak ed kongregasyon.

Kayari kasal ko, walay duaran elder ed kongregasyon na Saray Tasi nen Jehova ya binmisitad siak. Impaliwawa da no panon ak ya makapawil ed Dios ya Jehova, tan kinatongtong day sakey a missionary ya si Cindy pian ontulong ed siak. Kinmapuy lan maong so pananisiak, kanian imbagak ed sikaton pruebaan to ya say Biblia et talagan Salita na Dios. Impanengneng to ray alimbawa na agawa iran propesiya ed Biblia. Anggad nagmaliw kamin sankaaro. Tinepet to no labay kon tulongan to ak ya aralen iray manunan bangat na Biblia. Inmesel ak. Atalosan kon siansia ya si Jehova et maaron Dios, tan labay ton maliket ak.

Nen miaaral ak lamet ed pantitipon na saray Tasi, aliknak ya mas maliket ak no sikaray kaibak nen saramay kaibak ed pelikula. Mairap ko balet so mantiwala ed arum lapud agawad siak nen ugaw ak, tan naaasar ak ed sarilik. Walay kaagian mi ya impanengneng tod siak ed Biblia no panon kon nalabanan irayan problema, tan naaralan koy mikaaro.

Nen 1997, inmalis kami nen asawak diad Hollywood, California, U.S.A. Mas aktibo ak diman ya ontutulong ed totoo ya manaral na Biblia. Mas kontento ak ed pambabangat koy Biblia nen say impagmaliw kon sikat ya artista. Singa bilang nen 2002, akinengnengan ak ed si Cheri ya akabat kod Hong Kong. Dakel so pamparaan mid bilay. Sikato so analon Miss Hong Kong antis ko. Sikato ingey nankoronad siak nen analo ak. Nan-artista met tan nagmaliw ya producer, tan akatrabaho to ray sikat a direktor. Tan inmalis met ed Hollywood.

Akasian koy Cheri nen naamtaan kon inatey so piasawaan to ta naatakid puso. Ag-aligliwa na relihyon to. Pareho min asali so bilay ya papangarapen na arum, balet singa siak, maermen met tan mairap toy mantiwalad arum. Ibabagak ed sikato ray nanaaralan kod Biblia, balet mairap ton awaten iratan ta Buddhist.

Aminsan nen 2003, tinawagan to ak nen walad Vancouver, Canada ta manggagawa na pelikula diman. Eksayted ya angistoryad siak ya legan a mandra-drive tan nararakepan ed lugar, biglan nampikasin maksil: “Ibagam ed siak, Siopay tuan Dios? Antoy ngaran mo?” Insan, adalanan toy Kingdom Hall tan abasa toy ngaran ya Jehova. Alikna ton aman so ebat na Dios, kanian labay ton nakatongtong a tampol iray Tasi nen Jehova. Tinulongan ko, tan kayari pigay agew et inmatendi ed Chinese congregation diad Vancouver.

“Talagan interesado irad siak,” so inistorya  nen Cheri. “Sarag kon ibagay naliliknak ed sikara.” Makakaliket ak nen imbaga to iya, ta diad showbiz et anggapoy kaaro to. Tuloytuloy ya oonlad saray pantitipon si Cheri. Balet nen 2005, nampirma na kontrata ya manggawa na duaran angkabaleg ya pelikula diad China, kanian kaukolan toy ompawil ed Hong Kong. Makapaliket balet ta nen 2006, indedika nen Cheri so bilay tod si Jehova tan abautismoan diad asemblea na saray Tasi ed Hong Kong. Balet anggano labay to komoy manpokus ed panlingkor ed si Jehova, naiirapan ya manggawad satan lapud trabaho to, kanian aliwan maliket.

Nen 2009, anguma-uman so situasyon nen Cheri. Nandesisyon ya ontunda lan manggawa na pelikula pian mas makapanlingkor ed si Jehova. Dakel so akaaro tod kongregasyon. Nagmaliw met ya full-time ya managpulong na maong a balita tan panliliketan toy ontulong ed totoo pian magmaliw iran mas maliket.—Mateo 24:14.

Insan nanaral si Cheri na Nepalese pian onsuportad ondarakel ya grupo na saray Tasi ed Hong Kong ya Nepalese so lenguahe ra. Maslak ya Nepalese ed Hong Kong et ibabaliwala tan babalawen, ta ag-ira maka-Ingles o Chinese tan dumay kultura da. Imbaga nen Cheri ed siak ya nai-enjoy toy ontulong ed saray totoo ya natalosay Biblia. Singa bilang, sakey agew et apulongan toy sakey ya biin Nepalese ya agto masyadon kabat si Jesus, tan anggapon balot so amta tod si Jehova a Dios. Impabasa nen Cheri ed Biblia ya nampikasi si Jesus ed Ama tod tawen. Nen atalosan na bii ya sarag toy manpikasid tuan Dios, ya say ngaran to et Jehova, inawat to itan ya katuaan. Anggad pati asawa tan anak to et manaaral met lay Biblia.—Salmo 83:18; Lucas 22:41, 42.

Nen anengneng kon maliket si Cheri ed pampupulong ton full-time, intepet kod sarilik, ‘No nagawaan to, akin et agko nagawaan ey?’ Natan et pinmawil ak lamet ed Hong Kong. Wala ray ginawak ya pananguman pian mas dakel so panaon kon manbangat na Biblia. Aliknak so tuan liket diad idedengel kod totoo tan itutulong ed sikaran natalosan so Biblia.

Singa bilang, naiyaralan ko na Biblia so sakey ya biin Vietnamese ya lanang a maermen tan onaakis. Natan et malikeliket la tan nai-enjoy ton kaiba ray agagid kongregasyon.

Nalmo mi nen Cheri so mas maong nen say inkasikat. Tua, sikat ka tan balibali met so liknaan ya walad showbiz, balet mas makapaliket no tutulongan mo ray totoo ya nakabat so Dios ya Jehova ta sikatoy nidadayew mo. Alikna min tua may imbaga nen Jesus: “Mas makapaliket so mangiter nen say mangawat.”—Gawa 20:35.