Diad Simba na labi na Pebrero 24, 1924 so sankaunaan ya impan-broadcast na WBBR, say balon istasyon na radyo na saray Estudyante na Biblia. a Antoy agawa ed saman ya sankaunaan ya impan-broadcast? Siopa ray akarengel ed satan? Tan panon ya tuloytuloy nin uusaren na saray Tasi nen Jehova iray sankabaloan ya teknolohiya pian ipaamta so “maong a balita na Panarian ed interon dalin”?—Mateo 24:14.

 Ginmapoy sankaunaan ya impan-broadcast diad 8:30 na labi, tan duaran oras so karukey to. Ginaway programa diad kakkapampaalagey ya studio ed Staten Island, New York. Nanonotan ni nen Brother Ralph Leffler, say sound engineer, ya “eksayted tan nanenerbiyos” so amin ya wadman ed studio. “Wala kasi ondengel ed sikami?” so naisip to. “In-switch ko la, insan mi la inggapoy programa, tan maniilalo kamin marakep komon so pansumpalan to.”

 Say announcer ed saman ya agnalinglingwanan ya broadcast et si Brother Victor Schmidt, say apilin mangasikaso ed istasyon. Diad gapo na programa, impakabat to ni so pigaran marundunong ya managtogtog tan managkansion, tan amin ira et Estudyante na Biblia. Unona, walay sakey ya brother ya nantogtog na piano. Insan kinansion nen Sister Cora Wellman so “The Ninety and Nine,” ya imbase ed parabolo nen Jesus nipaakar ed samay karneron abalang. (Lucas 15:4-7) Insan sinmublay ni ray arum, kaiba lay Brother Frederick W. Franz ya angansion na “The Penitent,” sakey ya kansion ya mangiistorya ed samay abalang odino managdarak ya anak.​—Lucas 15:11-25.

 Nampaliwawa si Brother Joseph F. Rutherford, say mangidadaulo ed saray Estudyante na Biblia ed saman ya panaon. Impaamta to ya sayan istasyon et ginawa pian “suportaan so panarian na Mesias.” Imbaga to ya, “Inabuloyan na Katawan ya naimbento na totoo so radyo, kanian seguradon labay ton usaren tayo iya pian bangatan iray totoo nipaakar ed pakasumpal na saray marakdakep ya propesiya to.”

 Dakel ed saray tagad bandad northeast na United States so akarengel ed samay sankaunaan ya impan-brodcast. Walay sakey ya lakin tagad Morrisville, Vermont, masulok ya 320 kilometro so kaarawi to manlapud istasyon. Arengel to itan, tan oniay imbaga to: “Labay kon ireport ed sikayo ya malinlinew kon arengel so broadcast. . . . Lalo lay boses nen Rutherford, talagan malinlinew. . . . Anggapoy salitan nababalang.” Insan wala ni ingey akadngel ed programa ya tagad Monticello, Florida! Marakdakep so agawaan na balon istasyon na radyo tan dakdakel so totoon angipawit na sulat pian misalamat.

 Tuloytuloy nin in-broadcast na istasyon so mensahe na Panarian diad loob na 33 ya taon, b lalo la diad saray pasen ya walad bandad northeast na United States. Balet no maminsan ikokonekta na arum ni ran istasyon na radyo so WBBR, kanian nasasabi toy minilyon ni ran ondedengel diad United States, Canada, tan mas ararawi nin pasen. Diad tua, oniay inreport na 1975 Yearbook of Jehovah’s Witnesses: “Kasabi 1933, say taon ya sankaawangan so pasen ya asabi na impan-broadcast, 408 ya istasyon so inusar pian nipasabi mensahe ed anemiran kontinente, tan 23,783 ya nambibiigan ya paliwawa so ni-broadcast . . . Diad saraman ya panaon, bansa-bansag ya narengel iray broadcast na Watch Tower diad nanduruman istasyon na radyo. Anggan iner so kawalaan na saray totoo ya ondedengel ed radyo et narerengel day katuaan ya mangidadayew ed Dios.”

 Nen ginmapon usaren na saray Estudyante na Biblia so WBBR, wala labat so manga 1,064 ya mangipupulong ed Panarian diad United States. Kanian atulongan na samay impan-broadcast iyan melag ya grupo pian mas dakel so totoon napasabian na maong a balita. Balet kasabi 1957, wala lay manga 187,762 ya mangipupulong ed Panarian diad United States tan 653,273 diad nanduruman pasen na mundo. Kaaruman ni, napapasal iray maseseg ya agagi diad saray aral ed kongregasyon kanian magmamaliw iran mas epektibo ed panagpulong ed kaabungan tan arum ni ran paraan na panagpulong.

 Lapud saratan ya balibalin pananguman, inisip na saray brother ya mangidadaulo ed organisasyon no kasin epektibo ni so pan-broadcast ed radyo no ikomparad personal ya pampulong ed saray totoo diad kaabungan da. Antoy resulta? Nandesisyon ira ya ilako so WBBR, atan labat lay akeran istasyon ya gawa na Watchtower Society tan sikaran mismo so mano-operate. Inlako so istasyon nen Abril 15, 1957. Antis to man ya agew, tinepetan si Brother Nathan H. Knorr diad espisyal ya sampot ya broadcast no akin ya inlako so istasyon. Impaliwawa to ya say idarakel na saray Tasi nen Jehova ed saman ya panaon et lapud panagpulong ed saray totoo diad kaabungan da. Kuan to: “Dakel so talagan atulongan na saray impan-broadcast ed WBBR.” Insan to ni inyarum ya: “Pero mas dinmakel ni iray Tasi nen Jehova ed saray pasen ya agnasasabi na WBBR nen say diad saray pasen ya narerengel na totoo so WBBR.” Kanian akapandesisyon iray agagin mangidadaulo ya mas dakel so maong ya resulta ed panagpulong ed totoo diad kaabungan da nen say diad radyo. Balet aliwan satan so sampot na panag-broadcast. Kayari na pigaran dekada, ginawa tayo lamet itan pero diad duman paraan.

 Nen Oktubre 6, 2014 walay makapaliket ya agawa ed organisasyon nen Jehova​—ginmapo so istasyon na telebisyon diad Internet ya say tawag et JW Broadcasting. Babantayan na saray Tasi nen Jehova tan saray arum ni so binulan ya broadcast panamegley na Web browser, say app ya JW Library, saray gadyet ya makakonekta ed streaming odino diad satellite. c Balet diad arum ya parte na mundo, uusaren nin siansia na saray totoo nen Jehova so radyo tan telebisyon. Panon?

 Diad agano ni ran taon, inusar na organisasyon nen Jehova so radyo tan telebisyon na saray kompanyan aliwan Tasi so akanggawa pian i-broadcast so sinimban aral na kongregasyon pati saray kombension diad saray lugar ya anggapoy Internet. Akasabi met irayan impan-broadcast ed dakel ya aliwan Tasi pati saray dakdakel ya interesadon totoo. Singa bilang manlapud 2021 anggad 2022, imbaga na saray manedyer na istasyon na radyo ed Branch Office na saray Tasi nen Jehova ed East Africa ya dakdakel so misasalamat ed sikara ya aliwan Tasi lapud saray narerengel dan aral tayo diad istasyon na radyo da. Wala ni ingen iray ondedengel ya tagad Kenya, South Sudan, tan Tanzania ya nan-request ya iyaralan iray Biblia.

 Balet say manunan paraan ya uusaren na saray Tasi nen Jehova pian ipulong so mensahe na Panarian ed interon mundo et diad panagpulong ed saray totoo diad kaabungan da, diad panamegley na saray literature cart, tan say website ya jw.org. Lapud website tayo, matmainomay ya nabasa na saray interesadon totoo so Biblia pati saray literatura ya nibase ed Biblia diad masulok ya 1,080 ya lenguahe, tan amin iratan et anggapoy bayar. Naalmo da met iray ebat ed saray tepet ed Biblia tan naamtaan da no iner da naatendian iray Kristianon pantitipon tayo. Lapud saratan ya impansagpot na saray Tasi nen Jehova, mas mainomay lan naamtaan na totoo so maong a balita nipaakar ed Panarian na Dios nen say dati! Talagan ‘nipupulong la itan ed interon dalin,’ singa impasakbay na Biblia.​—Mateo 24:14.