“Seguro dakel ed saray manbabasa na publikasyon mi so walay kabat dan bulag,” so imbaga na Hunyo 1, 1912 ya isyu na The Watch Tower. “Sarag day mangala na libren babasaen . . . . Sarayan publikasyon parad saray bulag et inimprinta ya saray letra et ginawan butil pian nabasa na saray bulag.” Onia ni nabasa ed satan ya isyu: “Dakel ya bulag so misatsalamat nen naamtaan da iray balibalin bendisyon ya nagawa diad arapen.”

 Nen imbaga itan na The Watch Tower, nanduruma ni braille system ya uusaren na saray bansan mansasalita na English. Pero nensaman ni, ipapaamta la na saray Tasi nen Jehova iray katuaan ya walad Biblia panamegley na saray letra ya ginawan butil, atan may braille. Ontan ni gagawaen tayo anggad natan! Available la ed masulok ya 50 ya lenguahe iray braille ya publikasyon tayo. Panon iratan ya gagawaen?

 Say unonan proseso ed panaggaway braille et say pan-transcribe, labay ton ibaga et gagawaen ya butil odino braille character iray salita. “Dati mangasaliw tayo na software pian ni-transcribe iray salita, pero pigpigara labat ya lenguahe so sarag ton pawalaen,” so imbaga nen Michael Millen ya walad Text Processing Services diad Patterson, New York. “Balet natan et manguusar tayo lay Watchtower Translation System pian i-transcribe iray salita ed braille diad amin lawarin lenguahe ed interon mundo. Parad siak, anggapo lay mipara ed satan!”

 Wala met so nabasan deskripsion na saray litrato ed saray braille ya publikasyon tayo. Singa bilang, oniay deskripsion na litrato ed apis na libron Panliketan so Bilay ya Anggapoy Anggaan! diad braille: “Manaakar so sakey ya laki ed dalan ya apaliberan na balibali iran tanaman tan kapalandeyan.” Oniay imbaga na sakey ya bulag ya ministeryal a lingkor tan payunir ya si Jamshed: “Baleg ya tulong ed siak iray deskripsion ed litrato diad saray publikasyon tayo.”

 Kayari na pan-transcribe, ipawit iray file ed saray branch office ya mangi-emboss na braille iran publikasyon. Insan ditan da i-emboss odino pagmaliwen ya angkekelag ya butil ed matibay ya papel iramay letra. Lapud matibay so papel ya uusaren, ag-itan nabutaw legan na panag-emboss tan agmet naderal iray butil to anggano paulit-ulit ni itan ya usaren. Kayari to et paniibaen da so amin ya pahina, insan da i-bind. Insan da la ipawit ed saray kongregasyon kaiba na arum nin publikasyon odino ipawit da ed post office bilang “free matter for the blind” no walay ontan ya serbisyo. No kaukolan, manggagawa ni ingen na paraan iray branch office pian napapeles so pangi-deliver ed sarayan publikasyon ed saray agagin bulag odino ed saray walaay deperensya ed pakanengneng pian nausar da itan ed saray aral ed kongregasyon.

 Pian nagawaan iratan ya amin, kaukolan so dakel ya panaon tan baleg ya kuarta. Singa bilang diad samay panag-imprintaan tayo ed Wallkill, New York, duara labat ya braille ya Biblia so nagawaan ed parehon karukey na panaon ya nausar ed panggawa na 50,000 ya regular ya Biblia. Walay 25 ya volume ed kada sakey ya grade-two English braille ya Biblia. Say nagastos parad saray materyales ed panggawad satan et mas baleg na 123 ya beses no ikomparad nagastos ed panggawa na sakey ya regular ya Biblia. a Diad tua, saray apis ni labat na sakey ya set na braille ya Biblia et manbili la na manga $150 ya dolyar (U.S.)! 

 Antoy nalilikna na saramay ontutulong ed panaggawa na saray braille ya publikasyon? Oniay imbaga nen Nadia ya manlilingkor ed branch na South Africa: “Aliwan mainomay so bilay na saray agagin bulag odino walaan na deperensya ed pakanengneng, kanian nibagak ya bendisyon so panggawa na saray publikasyon ya makatulong ed sikara. Prueba itan ya talagan inar-aro ira nen Jehova.”

 Panon to balet no agmakabasa na braille so sakey ya bulag? Diad imbebeneg iran taon, in-release tayo so Learn to Read Braille, sakey itan ya workbook ya walay braille tan inimprinta iran salita. Ginawa itan pian saniban usaren na sakey ya makanengneng tan sakey ya bulag. Sayan workbook et walay kaiba ton positive slate tan stylus. Usaren iratan na sakey ya manaaral na braille pian sikaton mismo so man-emboss odino manggawa na butil na saray braille character. Ontulong iray wadtan ya activity ed panag-emboss pian mas natandaan to so kada character tan naaralan ton basaen itan no kapaen to la.

 Antoy epekto na sarayan braille ya publikasyon ed saray agagin bulag odino walaan na deperensya ed pakanengneng? Si Ernst ya tagad Haiti et lanang ya onaatendi ed saray aral ed kongregasyon. Pero anggapoy uusaren ton braille ya publikasyon. Kanian kaukolan ton kabisadoen ya maong so ibaga to kada no walay parte tod aral odino no labay toy mankomento. Kuan to: “Pero natan, sarag ko lan itagey so limak tan makapankomento ak la no labay ko. Sankaliknak ya kabiangan ak na kongregasyon tan parehon espiritual ya naakan so aawaten min amin!”

 “Mas mainomay ya natalosan iray braille ya publikasyon tayo no ikompara ed arum ya braille ya publikasyon ya abasak,” so imbaga nen Jan, sakey ya elder ed Austria ya walaan na deperensya ed pakanengneng tan mangikokondukta na Panag-aral na Panag-bantayan tan Panag-aral na Kongregasyon ed Biblia. Onia ni inyarum to, “Singa bilang, walay numero na kada pahina, mainomay ya naromog iray paimanod leksab, tan wala ray malinew ya deskripsion na saray litrato.”

 Si Seon-ok et bulag tan telek ya payunir ed South Korea. Nensaman, akadepende labat ed isisinyas da ed saray lima to legan na saray aral. Pero natan amta to lan basaen iray braille ya publikasyon tayo ya uusaren ed panag-aral na Biblia. “Say arum ya babasaen ya braille et mair-irap ya basaen ta kulangkulang iray butil da tan ag-iratan maptek, tan maim-impis iray papel ya uusaren da,” so imbaga to. “Balet maong ya klase na papel so uusaren na saray Tasi nen Jehova tan mas mabakat iray butil kanian mainomay iratan ya nabasa.” Onia ni imbaga to: “Nensaman, naaralan ko labat iray publikasyon tayo no walay ontulong ed siak. Pero natan sarag ko lay manaral ya bukor. Malikeliket ak ta nipaparaan ko la ray sinimban aral tayo tan mas makakapankomento ak la. Babasaen koy amin ya braille ya publikasyon tayo tan agko la labay ya tundaan ya basaen iratan.”

 Singa nabasa ed saray inimprintan publikasyon tayo, onia met so nabasa ed saray braille ya publikasyon tayo: “Sayan publikasyon et ag-ilalako. Itatarya iya bilang kabiangan na sankamundoan a kimey ya panagbangat ed Biblia a susuportaan na boluntaryon donasyon.” Salamat ed pangiiter yoy donasyon panamegley na donate.mt1130.com. Lapud inkamaiter yo, nitatarya so espiritual ya naakan para ed amin, kaiba la ray bulag tan walaan na deperensya ed pakanengneng.