Diad masulok lan samploran taon, saray literature cart et uusaren tayod ministeryo tan naaala toy imano na totoo. Diad interon mundo, nanenengneng na totoo iratan ya cart tan amta da lay akanggawa ed saratan. Aliwa labat ya marakep so inkadesinyo na saratan, imbes mainomay met ya usaren. Ompan onabobon kad imbaga nen Asenata, sakey a sister ed Poland, kuan to: “Simpli labat iray cart pero balibali, mainomay ya i-set-up tan iyalis-alis.”

 Antam no panon ya denesinyo tan ginawa iratan ya cart?

 Nen 2001, inaprobaan na Mananguley ya Ulop iray agagi tayo ed France ya salien so nanduruman paraan na public witnessing, kaiba lay pangusar na saray cart. Sinali day nanduruman desinyo na cart. Singa bilang, angusar ira na luggage tan grocery cart ya inuman da na daiset pian i-display tan ikarga ditan iray literatura. Ag-abayag amili so Branch ed France na sakey a desinyo tan atan so inusar na saray manangipalapag ed dakel ya taon.

 Malikeliket iray agagi ed France ed resulta na sinali dan paraan. Kanian nen 2011, inaprobaan na Mananguley ya Ulop ya salien met diad New York City, U.S.A., so pangusar ed saray cart tan lamisaan. Naimano na saray akibiang ya payunir ya dakel so bentaha na saray cart, say sakey ed saratan et amay main-inomay ya iyalis. Pero, angiter met iray payunir na praktikal iran suhestion pian mas ondakep ni desinyo na saray cart. Amay datin gawad kiew ya cart et ambelat tan mairap ya isegep tan ileksab. Kanian inuman iman tan ginawan mas anlemew, pero agmet basta-basta nitumba na dagem. Say balon desinyo et ginawan mas baleg tan matibay iray dalig to, kanian mas mainomay ya guyoren anggan diad aliwan marakep iran dalan. Tan inikdan met itan na melag ya pananginan pian napankargaan na saray ekstran literatura.

 Anengneng ya epektibo iman! Kanian nen 2012, inaprobaan na Mananguley ya Ulop so pangusar na saray literature cart ed interon mundo. Apandesisyonan ya manpagawa tayo ed sakey ya manufacturer na dakel ya cart ya say materyales to et anlemew pero matibay.

 Diad inlabas na saray taon, wala ray ginawan angkelag ya pananguman ed saray cart. Singa bilang, nen 2015, kinargaan itan na plastic ed arapan pian agnabasa na uran. Naapresya itan nen Dina ya taga Georgia. Say kuan to, “Ayay cart, walay sarili ton kaputi pian agnabasa iray publikasyon.” Nen 2017, wala ray di-magnet ya poster ya ginawa ed arum iran lenguahe. Oniay imbaga nen Tomasz ya sakey a brother ed Poland: “Dati, mair-irap ya ekalen iramay impeket ya poster. Kanian balibali may anonotan da ya mangusar na magnet.” Nen 2019, wala ni ran siansiay ginawan pananguman ed materyales tan inkagawa na cart pian agbasta-basta naderal.

 Saksakey so manufacturer ya manggagawa ed amin ya Literature Cart tayo tan ide-deliver iratan ed saray kongregasyon ed interon mundo. Diad kaplesan, say bili na sakey ya cart et $43 U.S., agni kaibad satan so shipping tan arum ni ran gastos. Natan et masulok lan $16 million U.S. so agastos tayo parad saray cart, tan masulok lan 420,000 so ni-deliver ed saray kongregasyon ed interon mundo.

 Pian nausar tayo ed sankaabigan iray donasyon, saray literature cart et oorderen ya bultoan. Ontan met, sarag la natan na saray kongregasyon so man-order na spare parts pian naayos tan nausar ni iray walad sikaran cart, imbes ya salatan na balon cart.

 Maliket ya uusaren na saray manangipalapag ed interon mundo iray literature cart. Oniay imbaga nen Martina ya taga Ghana: “Diad amin lawarin paraan na ministeryo tayo, sikatayo so onaasingger ed saray totoo. Pero say agustoan ko ed cart witnessing et saray totoo so onaasingger ed sikatayo. Nanengneng labat na saray ondadalan iray cart, sakey lan pantasi.”

 Diad sakey nin bansa ed Africa, walay laki ya inmasingger ed cart tan angala na saray publikasyon ed lenguahe to. Kayari sakey simba, pinmawil tan kuan to: “Abasak lan amin iramay inalak ya literatura yo. Balibali. Ipabasak met iraman ed saray kapamilyak diad baryo mi,” ya manga 500 kilometro so kaarawi to. Kayari duay bulan, amawil lamet tan kuan to: “Abasa la na totoo ed baryo mi so amin ya literaturan inalak tan malikeliket irad abasa da. Labay day magmaliw ya Tasi nen Jehova. Pero wala ray tepet da. Singa bilang, amta da ya pian nabautismoan ira, kailangan iran ipalseb ed danum. Pero anggapoy ilog ya asingger ed baryo mi. Kailangan mi ni kasi onla dia pian nabautismoan?” In-refer na saray manangipalapag iyan laki ed sakey ya payunir ya mansasalita na lenguahe to. Manlapud saman, regular la ran makapantotongtong tungkol ed Biblia.

 Makapalikliket ya nanengneng ya uusaren tayod panagpulong iray literature cart “ed interon dalin bilang pantasi ed amin a nasyon.” (Mateo 24:14) Iner tayo aalaen so gagastosen ed panggawa na saray cart? Diad saray donasyon tayo parad sankamundoan ya kimey. Dakel so mando-donasyon panamegley na donate.mt1130.com. Salamat ed inkamaiter yo.