Masulok lan 130 ya taon ya mantitipon iray Tasi nen Jehova ed saray tinaon ya kombension. Natan et kaiba la ed sayan programa so masulok ya 40 ya nanduruman paliwawa kaiba la ray musika, interbyu, tan video. Pian nagunggonaan tan napaseseg iray onatendi, kaukolan ya malinew dan narengel tan nanengneng so programa. (Lucas 2:20) Panon ya uusaren iray donasyon yo pian naseguron amin ya onatendi et minabang ed sarayan programa inerman ya pasen so pankombensionan da?

 Wala la ray audio/video system na maslak ya modernon stadium diad saray Western ya bansa. Kanian akin et mangawit ti ni sarilin audio/video system tayo no manrenta tayoy ontan iran pasen parad kombension? Oniay impaliwawa nen David ya manboboluntaryo ed World Headquarters Broadcasting Department: “Kaslakan ed saray pasilidad ya rerentaan tayo et ag-adesinyo parad saray programa ya ngalngali puro paliwawa tan masulok ya anemiran oras ya ondengel iray onatendi. Singa bilang, diad saray pasilidad ya uusaren parad sports, uusaren da labat iray sound system da parad antikey ya anunsio tan pian mangi-play na daiset labat ya musika. Saray video screen et uusaren da labat parad score na galaw, patalastas, tan replay na galaw. Diad sikatayo balet, labay tayon nabantayan na saray onatendi iray andukey ya video tan natalosan dan maong so kada salita ya ibabaga na manpapaliwawa.”

 Nanduruma so kada pasen ya pankombensionan kanian kaukolan ya iyadapta so audio/video system. No apili la ray pasen ya pankombensionan, mandesisyon iray Broadcasting Department ed kada branch office no iner onyurong iray onatendi base ed tantiya ran bilang tan karakel na nakarga na pasilidad. Insan da kalkulaen no iner ipuesto iray speaker parad audio tan video screen, iplano da no panon iratan ya pankokonektaen, tan ilista da so amin ya kagawaan ya kaukolan pian naseguron nanengneng tan narengel na amin so programa.

 Mas komplikado ni iray audio/video system ed saray kombension ya kaukolan ya iyinterpret so programa ed nanduruman lenguahe. No kaukolan ya iyinterpret so programa ed duman lenguahe, kaukolan ya nanengneng tan narengel na saray interpreter so programa insan i-transmit so interpretation da ed akabiig ya channel na radyo parad saramay makatalos ed satan ya lenguahe. Maong labat ta wala ray high-tech ya media player kanian sarag ya bansag ya bantayan na amin ya inmatendi so video anggano itra-transmit so audio ed waloran nanduruman lenguahe. Imbaga nen David ya komplikadon maong irayan sistema kanian kaukolan ya ipasal ya maong iray boluntaryon man-operate ed satan.

 Maslak ya branch office et walay audio/video equipment ya tinaon ya nauusar. No ontan, kaukolan ya ibiahe na saray agagi iray equipment manlapud sakey ya kombension paonlad onsublay ya kombension. Dia ni labat ed branch na United States et masulok lan $200,000 a ya dolyar so nagagastos kada taon pian ibiahe iratan ya equipment. Pero mas makatipid tayo nid satan nen say no mangaliw tayo ni kaaruman ya equipment insan tayo lamet mintinaen itan. Oniay imbaga nen Steven ya tinmulong ya mangasikaso ed audio/video ed sakey ya kombension ed Canada: “Seseguroen na audio/video team mi ya kada tornilyo, cord, tan piyesa et abilang ya maong tan inap-apiger so impangimpake pian akaparaan la parad onsublay ya programa.”

 Agaylay kabili so manrenta na saray audio/video equipment, tan kaslakan et aliwan marakep tan ag-iratan namimintina kanian mabetbet ya sasaliwen ti la ray equipment ya uusaren tayo. Amay uusaren tayon LED video wall ya say kalapar to et 5 metro tan say katagey to et 3 metro et manga $24,000 ya dolyar so bili to. Tan anggan say sakey labat ya kable na mikropono ya say karukey to et 15 metro et manga $20 ya dolyar so bili to. Kanian manmimiting so Broadcasting tan Purchasing Department pian ‘kuentaen day nagastos’ antis iran mangaliw na antokaman ya equipment. (Lucas 14:28) Singa bilang, amtaen da no panon karakel so mangusar ed satan ya gamit. Kasin mas maong so mangaliw na balo? Wala kasi napangisinopan tayo ed saratan ya gamit? Wala kasi nausar tayon panmintina tan wala kasi iray marunong ya agagi ya boluntaryon mangapiger ed satan?

 Pian mas ombayag iray audio/video equipment tan agnaperdi iray donasyon na agagi, regular tayon aapigeren iratan. Tan kada no ibiahe tayo iray equipment, ikakarga tayo iratan ed matibay ya kargaan pian agnaderal. Tan anggan saratan ya kargaan et aapigeren met no kaukolan.

 Manbilib iray aliwan Tasi ed karakep na video tan sound ed saray kombension tayo. Singa bilang diad sakey ya kombension, nankomento so sakey ya empleyado na sakey ed saray sankasikatan ya istasyon na TV nipaakar ed karakep na saray paliwawa tan video. “Nen naamtaan ton amin ya kaiba min nankimey et boluntaryo labat tan aliwan propesyonal, manbilib!” so kuan nen Jonathan ya mangiiba ed panset-up tan pan-operate na audio/video equipment ed saray kombension. “Say kuan to ni, amay sakey tan kapalduan agew ya impan-install mi et limay agew ya gawaen na kompanya da.” Diad sananey ya kombension, oniay imbaga na sakey ya manager na pasilidad: “Dakel lay nanrenta dia ya propesyonal ed music tan video pero anggapo ni anengneng ko ya onia kauksoy tan karunong ya mantrabaho ya singa sikayo.”

 Panon kan agunggonaan ed saray audio/video system diad kombension? Seguro parehoy aliknam ed si David ya taga England, say kuanto: “Natan et 88 lay edad ko tan dakel lan kombension so naatendian ko. Pero mas mainomay la natan so manpokus ed programa. Balibali ray video, malinlinew tan mainomay ya natalosan. Singa laingen mapmaples ya nasumpal so programa.” Oniay naobserbaan nen Micheal ya taga Nigeria: “Agla naiirapan iray agagi ya ondengel ed paliwawa tan bantayan iray video kanian makakapampokus la ra tan labalabay day ondengel ed programa.”

 No onatendi ka ed “Iyabawag so Maong a Balita!” ya Regional a Kombension odino Special Convention ed sayan taon, isip moy amin ya sagpot pian narengel tan nabantayan mo so programa. Misatsalamat kami ed sikayo ta nagmaliw iyan posible lapud saray donasyon yo kaiba lay inter yo panamegley na donate.mt1130.com.