Lapud nilibo so nababautismoan kada taon, kaukolan tayon aruman iray teokratikon pasilidad tayo. Pian nasuportaan iyan iyaaligwas, namplano iray Local Design/Construction Department ed interon mundo ya mangipaalagey odino man-renovate na masulok ya 2,700 a pasen na panagdayewan legan na 2020 a serbisyon taon. a

 Makapaermen ta lapud COVID-19 pandemic et ag-atuloy irayan plano. Pian naprotektaan iray agagi tayo tan bilang pangunor ed saray instruksion na gobierno, nandesisyon so Publishing Committee na Mananguley ya Ulop ya itunda ni so dakel ya proyekto ya panagpaalagey diad interon mundo. Anggaman onman, legan na 2020 a serbisyon taon, masulok ya 1,700 a pasen na panagdayewan so nipaalagey tan in-renovate antis na pandemic. Ontan met, manga 100 ya proyektod saray branch so asumpal. Nengnengen tayo no panon ya agunggonaan iray agagi tayo lapud duaran nipaalagey ya proyekto.

 Cameroon branch. Say datin branch, ya walad Douala, et melag labat tan dakel so kaukolan ya umanen. Kanian inkonsidera na Publishing Committee ya i-renovate so branch, balet naisip da ya mas baleg so nagastos ed pan-renovate nen say bili na mismon pasilidad. Inisip da met so posibilidad na pangaliw na lote tan diman ipaalagey so balon branch odino pangaliw na bilding insan la i-renovate, balet ag-iratan agawa.

 Ag-abayag, naamtaan na saray agagi ya diad bandad norte na Douala et walay plano na gobierno ya manggaway karsada diad abay na sakey ed saray Assembly Hall tayo. No wala la itan ya karsada, mas mainomay lay pangiyakar na saray kagawaan tan suplay parad pampaalagey. Talagan sakto itan ed kaukolan na branch. Kanian inaprobaan na Mananguley ya Ulop so pangipaalagey na balon branch diad sakey a parte na lote na Assembly Hall.

 Saniban nankimey ed proyekto iray Tasi tan saray inupaan ya kontraktor, kanian baleg so atipid ya panaon tan kuarta. Diad tua, masulok ya duaran milyon ya dolyar (U.S.) so atipid! Akaalis la ed balon pasilidad so pamilyan Bethel antis nin kinmayat so COVID-19.

 Mas mainawa so bilay tan naliliketan ya mantrabaho iray Bethelite diad Cameroon, tan parad sikara et regalo nen Jehova so balon branch. Oniay imbaga na sakey a sanasawa, “Agmi labay ya ibaliwala iyan regalo kanian labay mi magmaliw ya mas makuli.”

 Tojolabal Remote Translation Office (RTO), Mexico. Diad dakel ya taon, say Tojolabal translation team et walad Central America branch ya asingger ed Mexico City. Balet say lenguahen Tojolabal et kaslakan ya sasalitaen diad Altamirano tan Las Margaritas​—manga 1,000 kilometro so kaarawi to! Lapud satan, naiirapan iray translator ya paaligwasen so panagsalita da ed lenguahen Tojolabal. Tan naiirapan met so branch ya mananap na kualipikadon agagi ya nayarin ontulong ed panagpatalos na Tojolabal tan panrekord na saray audio.

 Kanian labay na Writing Committee na Mananguley ya Ulop ya iyalis so translation team diad lugar ya say salita et Tojolabal. Pian nagawaan itan, nandesisyon so branch ya mangaliw na bilding insan i-renovate itan. Mas matipid so ontan nen say pampaalagey odino panrenta na saray opisina.

 Imbaga na sakey a translator no panon ya akinabang ed satan: “Diad samploran taon ya impanlingkor ko bilang translator diad branch, anggapon balot so akabat kon pamilya ed saman ya syudad ya mansasalita na lenguahek. Natan ya say opisina mi et wala lad mismon lugar ya say salita et Tojolabal, makakapitongtong ak lan inagew-agew ed saray totoon mansasalita na Tojolabal. Kanian naaruman so amtak ya salita tan apaaligwas koy panagpatalos ko.”

 Diad 2021 a serbisyon taon, wala ray 75 RTO tan Bible school facility ya akaplanon ipaalagey no iyabuloy na situasyon. Ituloy so kimey ed walora ya manunan proyekto na saray branch, kaiba lay balon proyekto na world headquarters diad Ramapo, New York, tan say pangiyalis ed saray branch na Argentina tan Italy. Ontan met, kaukolan ni masulok ya 1,000 ya balon Kingdom Hall, kaukolan met lan salatan so masulok ya 6,000 a pasen ya panaaralan, tan 4,000 ni ya Kingdom Hall so kaukolan ya i-renovate.

 Iner so panlalapuan na pundo parad sarayan proyekto? Inebatan iya nen Brother Lázaro González, sakey a membro na Central America Branch Committee, legan ya pantotongtongan so impanggawad Tojolabal Remote Translation Office. “Diad teritorya na branch mi, limitado so pundo. Kanian no aliwan lapud tulong na saray agagi ed interon mundo, agkami makapanggawa na saray translation office parad saray agagi tayo dia. Lapud saray donasyon na agagi tayo ed interon mundo, nagmaliw ya posible so pangiyalis ed saray translator diad saray pasen ya sasalitaen so lenguahe ra. Misasalamat kamin maong ed saray agagi tayo ed interon mundo lapud mabulos ya suporta da.” On, agawaan irayan proyekto lapud saray donasyon yo ed sankamundoan ya kimey, ya dakel ed saratan et inter yo panamegley na donate.mt1130.com.