Si Clodean et sakey ya Tasi nen Jehova ya tagad South Africa. Kaukolan toy manpa-opera kanian nampa-admit ed ospital. Dakdakel so komplikasyon na sakit to kanian kaukolan toy mandesisyon no antoy pilien ton paraan na panagpatambal. Antis tan kayari na operasyon, naknaksawan, manpapaotot tan nai-stress ya maong. Kasempet to ed abung, kalabas na ngalngali samploran simba, agnin siansia makayurong. Tan lapud COVID-19 pandemic agnayarin mangawat na saray bisita.

 Aglabay nen Clodean ya pakaskasi so pakanengneng tod sarili to, kanian kinmerew ed Dios na biskeg pian naligliwa toy arum. Nen makayurong la, kinontak to may agin bii na kaabay dad abung. Datin iyaaralan na Biblia na saray Tasi imay bii pero tinmunda la. Anginabang si Clodean na makapaseseg ya punto manlapud Salita na Dios, kanian apakiwas imay bii ya ituloy so panaaral toy Biblia. Impaliwawa met nen Clodean iray balibalin epekto na iyatendi ed saray Kristianon pantitipon tan sineguro to ya makakonekta imay bii ed aral na kongregasyon da panamegley na videoconference. Kinmonekta may bii ed aral na saray Tasi tan nankomento ni ingen diad samay parte na aral ya walay tepet tan ebat.

 Kinatongtong met nen Clodean so mas ugaw ya agi na satan ya bii ta labay to met so manaral na Biblia. Tan imbaga tod si Clodean ya wala ray kabat ton nayarin interesado met. Antoy resulta? Akapangigapo si Clodean na panangiyaral na Biblia ed apatira nin bibii. Balet agni anampot ed satan so istorya to!

 Lapud talagan interesado si Clodean ed arum, akapangigapo na panangiyaral na Biblia ed samplora nin bibii. Amin iratan et legan na pandemic, kanian ami-amin et 16 iran iyaaralan to! Say arum ed sikara et regular lan onaatendi ed saray Kristianon pantitipon panamegley na videoconference. Lapud busy si Clodean ed itutulong to ed arum, aliwan say sakit to so akapokusan to. Sankalikna to met ya lapud liligliwaen nen Jehova, “say Dios na amin a ligliwa,” ed amin a subok to et nasasarag to met ya ligliwaen so arum.—2 Corinto 1:3, 4.

 Antoy nibaga na saray iyaaralan nen Clodean nipaakar ed nanaaralan da? Oniay imbaga na sakey: “Atulongan ak ed dakdakel ya paraan. Balet say sankaimportantian ya tulong ed siak et amay naamtaan koy ngaran na Dios, atan so akatulong ed siak ya onapit ed si Jehova.” Aman balet so unonan bii ya akontak nen Clodean et manplaplano la natan ya manpabautismo. Talagan angiter na liket ed si Clodean irayan eksperiensya to. Tan inmabig met la ed impampaopera to.