Inyanak ak ed Uganda diad distrito na Gomba. Maslak ya mairap so bilay na saray totoo ditan. Anggapoy koryenti ed lugar mi, kanian no labi et lamparaan so silew mi.

 Dumaralos iray atateng ko. Dati iran manaayam ed Rwanda insan ira inmalis ed Uganda. Mantatanem iray kape tan ponti, tan manggagawa iray alak ya gawa ed ponti. Sikat itan ya alak ed lugar mi, say tawag ed satan et waragi. Man-aalaga met iray atateng ko na saray manok, kanding, baboy, tan baka. Lapud kultura mi tan impamabaleg ed siak, papanisiaan ko ya kaukolan ya say asawan bii et naynay ya ontulok ed asawa to tan agnayarin mangibagay opinyon to.

 Nen 23 so taon ko, pinmawil ak ed Rwanda, ya ditan et ayaman koy bar kaiba iray kakaarok. Lanang ak ya oonla ditan kanian inikdan da ak ya card pian makaloob ak anggano agak manbayar. Mahilig ak met ya manbantay na bayolentin pelikula. Lapud saratan ya amin, nagmaliw ak ya maruksa, imoral, tan buanges.

 Nen 2000, walay ka-live in kon bii ya say ngaran to et Skolastique Kabagwira, tan awalaan kami taloran ananak. Singa papanisiaan ko nensaman ni, kaukolan ya ontalimukor ed siak so asawak no ibano to ak tan no walay kerewen to. Papanisiaan ko met ya amin ya kayarian na pamilya mi et gawak ya amin, tan siak so mandesisyon no antoy pangusaran ed saratan. Nilabi-labi ak ya oonla ed bar tan nasabik so anggad manga alas tres ed palbangon, tan maslak et onsesempet ak ya abuek. No ontoktok ak ed abung mi, tan no agtampol nalukasan nen Skolastique so puerta, sakitan ko.

 Diad saman et mantratrabaho ak bilang supervisor ed sakey ya private security company, tan baleg so sueldok. No wala ak ed abung, naynay ak ya kombinsien nen Skolastique ya mila ed relihyon to ya Pentecostal, ta iisipen ton atan so makapanguman ed siak. Balet agak interesado. Diad tua, akirelasyon ak ed sananey ya bii. Lapud maruksa tan manbibii ak, tinaynan ak nen Skolastique tan inawit to iray taloran ananak mi tan nanayaman irad atateng to.

 Kinatongtong ak na sakey a maedad lan kaarok nipaakar ed panagbilay ko. Pinaseseg to ak ya mipawilan ed si Skolastique. Imbaga tod siak ya mas marakep no saray ananak mi et ombaleg ya kaiba so ama ra. Kanian nen 2005, intundak so kakainum ko, intundak met lay pambibiik, tan akipawilan ak ed Skolastique. Nen 2006, nankasal kami. Balet agak ni anguman, siansia nin maruksa ak tan sasakitan koy asawak.

 Nen 2008, walay sakey ya Tasi nen Jehova ya binmisita ed abung mi, say ngaran to et Joël. Dinengel koy mensahe to manlapud Biblia. Diad loob na pigaran bulan, sikato tan sakey nin Tasi ya si Bonaventure so regular ya oonla ed abung mi tan iyaaralan da ak na Biblia. Dakdakel so tepet ko, lalo la diad libron Apocalipsis. Balet diad tua, labay ko labat ya paneknekan ya aliway ibabangat na saray Tasi. Singa bilang, intepet ko no panon dan nibaga ya samay “baleg ya ulop” ya abitla ed Apocalipsis 7:9 et manayam diad dalin, anta diad satan ya bersikulo et ibabaga ton “akaalagey ira diad arap na trono [na Dios] tan arap na Kordero,” si Jesu-Kristo. Maanos ya inebatan nen Joël iray tepet ko. Singa bilang, impanengneng tod siak so Isaias 66:1, ya no iner et nabasa ditan ya tinawag na Dios so dalin ya ‘toonan na sali to.’ Kanian nibagan say baleg ya ulop et akaalagey diad arap na trono na Dios. Tan binasak so Salmo 37:29 ya mangibabagan saray matunong et manbilay ya andi-anggaan diad dalin.

 Ag-abayag, siak tan si Skolastique et nampaiyaral na Biblia ed si Bonaventure. Diad panaaral mi na Biblia, apakiwas ak ya manggaway pananguman ed bilay ko. Naaralan ko ya respetoen so asawak. Agko la labay ya ontalimukor so asawak no ibano to ak odino no walay kerewen to, tan agko la ipapasen ya amin ya kayarian na pamilyak et gawak labat. Agak met la manbabantay na saray bayolenti iran pelikula. Aliwan mainomay irayan pananguman tan kaukolan so baleg ya kontrol ed sarili tan kapaabebaan.

 Pigaran taon antis na satan, say panguloan ya ana’kon si Christian et inawit kod saray kakanayon ko ed Uganda tan impaasikasok ed sikara. Balet nen abasak so Deuteronomio 6:4-7, atalosan mi nen asawak ya responsabilidad mi ed Dios ya asikasoen iray ananak mi, kaiba lay pangibangat ed sikara na saray prinsipyo ed Biblia. Malikeliket kami nen asawak nen nisempet mi lay anak mi!

 Naaralan ko ya si Jehova et mapangasin Dios, tan kombinsido ak ya pinerdona to la ray apalabas ya kasalanan ko. Malikeliket ak nen akila ed siak si Skolastique pian manaral na Biblia. Indedika mi bilay mi ed si Jehova tan abautismoan kami nen Disyembre 4, 2010. Natan et wala lay tiwala mi ed sakey tan sakey, tan malikeliket kami ta iyaaplika mi ray prinsipyo ed Biblia diad pamilya mi. Malikeliket si asawak ta onsesempet ak lan tampol kayari trabahok. Misalsalamat met si Skolastique ta marakep lay panagtratok ed sikato tan rerespetoen ko, tan lapud desisyon ko ya aglan balot oninum na alak, tan aliwa ak lan maruksa. Nen 2015, aturo ak bilang elder ed kongregasyon. Tan talora ed limaran ananak mi so abautismoan la.

 Nen ginapoan koy manaral na Biblia ed saray Tasi nen Jehova, agak basta anisia ed saray ibabangat da. Balet akombinse ak lapud inusar day Biblia pian ebatan iray tepet ko. Atalosan mi nen Skolastique ya saramay labay day mandayew ed tuan Dios et nepeg dan gawaen so amin ya panlabayan na Dios. Misalsalamat ak ed si Jehova ta inyapit to ak ed sikato tan natan et kabiangan ak la ed espiritual ya pamilya to. No pawilen koy bilay ko nensaman, kombinsido ak ya sarag na Dios ya tulongan so siopaman ya labay toy manguman.