Agmigi-guerra iray Tasi nen Jehova lapud:

1.   Uunoren mi Dios. Ibabaga na Biblia ya saray lingkor na Dios et “gawaen dan lokuy iray ispada ra” tan “agla ran balut mamparaan a mibakal [o miguerra].”​—Isaias 2:​4, Maung a Balita.

2.   Uunoren mi Jesus. Imbaga nen Jesus ed si apostol Pedro: “Ipawil moy espadam ed kaluban to, ta amin iramay mangusar na espada et ompatey ed espada.” (Mateo 26:52) Ipapanengneng nen Jesus ya saray papatumbok to et agmangusar na saray armas parad guerra.

    Neutral ed politika iray disipulo nen Jesus ta uunoren da imay ganggan to ya “ag-ira kabiangan na mundo.” (Juan 17:16) Ag-ira manproprotesta ed saray gagawaen na militar tan agda pipigilan iramay malabay ya mansundalo.

3.   Inaro mi kaparan too. Ingganggan nen Jesus iray disipulo to ya “manaaroan” ira. (Juan 13:34, 35) Kanian sanaagi so turing dad sakey tan sakey inerman ya bansa so kulaan da tan ag-iran balot miguerra ed agi ra.​—1 Juan 3:​10-12.

4.   Aaligen mi alimbawa na saray Kristiano nensaman. Ibabaga na Encyclopedia of Religion and War: “Aglabay na saray inmuunan papatumbok nen Jesus so miguerra tan mansundalo,” ta amta ran saratan et “kontra ed bangat nen Jesus ya manaroan tan aroen so kabusol.” Ontan met, oniay imbaga na German theologian a si Peter Meinhold ya desisyon na saray inmuunan disipulo nen Jesus: “Impasen [dan] say pagmaliw a Kristiano tan pagmaliw a sundalo et agbalot mantunosan.”

 Saray Tasi nen Jehova et napinabangan ed komunidad tan ag-ira peligro ed bansan panaayaman da. Rerespetoen mi so autoridad na gobierno ta uunoren mi irayan ganggan ed Biblia:

•   ‘Manpasakop kayo ed saray atagey ya autoridad.’​—⁠Roma 13:1.

•   “Ibayar yo sirin ed Cesar iray bengatlan kien nen Cesar, balet dia ed Dios iray bengatlan kien na Dios.”​—⁠Mateo 22:⁠21.

 Kanian uunoren mi ray ganggan na gobierno, manbabayar kami buis, tan mikokoopera kamid saray proyekto na gobierno parad pankaabigan na dakel.