Say Mananguley ya Ulop et melag a grupo na responsable iran Kristiano ya mangiiter na direksion ed Saray Tasi nen Jehova ed interon mundo. Walay duaran importantin gagawaen da:

•   Aasikasoen day pangipaparaan na base ed Biblia iran instruksion diad saray publikasyon, aral, tan eskuelaan na Saray Tasi nen Jehova.—Lucas 12:42.

•   Oorganisaen day kimey na Saray Tasi nen Jehova ed interon mundo diad pangiiter na direksion ed panagpulong, tan pangaasikaso no panoy pangusar ed saray donasyon.

 Tutumboken na Mananguley ya Ulop so alimbawan impanengneng na saray “apostol tan mamasiken ed Jerusalem” nen inmunan siglo, ya manggagawa ray importante iran desisyon parad interon Kristianon kongregasyon. (Gawa 15:2) Singa saraman ya matoor a lalaki, saray membro na Mananguley ya Ulop et aliwan lider na organisasyon mi. Kokonsultaen day Biblia bilang giya, tan bibidbiren da ya tinuro na Dios a Jehova si Jesu-Kristo bilang Ulo na kongregasyon.​—1 Corinto 11:3; Efeso 5:23.

 Saray membro na Mananguley ya Ulop et si Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, tan Jeffrey Winder. Wala rad world headquarters mi diad Warwick, New York, U.S.A.

 Walay anemiran committee ya inorganisa na Mananguley ya Ulop pian mangasikaso ed nanduruman kabiangay kimey mi, tan kada sakey ed sikara et manseserbi ed sakey odino onsulok ni ya committee.

•   Coordinators’ Committee: Mangaasikaso ed saray legal ya isyu, tan pangiter na tulong no walay kalamidad. Aasikasoen da met iray panagmaltrato tan panagpairap ed saray kamembro mi, tan arum nin problema ya apektado iray Tasi nen Jehova.

•   Personnel Committee: Mangaasikaso ed pankaukolan na saray membro na pamilyan Bethel.

•   Publishing Committee: Idadaulo da so pan-imprinta tan pangipawit ed saray base ed Biblian literatura tan pangipaalagey na saray pantitiponan, translation office, tan branch office mi.

•   Service Committee: Mangidadaulo ed panagpulong na “maong a balita na Panarian.”—Mateo 24:14.

•   Teaching Committee: Mangaasikaso ed panprepara na espiritual ya instruksion ya ibabangat panamegley na saray aral, eskuelaan, tan audio tan video program mi.

•   Writing Committee: Mangaasikaso ed panprepara na espiritual ya instruksion ya aka-imprinta tan diad saray website, ontan met ed kimey ya panagpatalos.

 Likud ed panseserbi ed sarayan committee, sinimban manmimiting so Mananguley ya Ulop pian pantongtongan iray pankaukolan na organisasyon. Diad sarayan miting, ikokonsidera day ibabaga na Biblia, tan manpapaigiya irad masanton espiritu na Dios pian makapankasakey irad desisyon da.—Gawa 15:25.

 Saraya et matoor ya Kristiano ya ontutulong ed saray committee na Mananguley ya Ulop. (1 Corinto 4:2) Walay abilidad tan eksperiensya dad kimey na committee no iner ira inyasain, tan onaatendi rad sinimban miting na satan. Anggano ag-ira kaibad pandesisyon, mangiiter ira na importantin bilin tan makatulong iran impormasyon, tutumboken day desisyon na saray committee, tan imo-monitor day resulta na saraman ya desisyon. Iyaasain met ira na Mananguley ya Ulop ya ombisitad saray kaagian mid nanduruman pasen ed interon mundo tan manpaliwawa diad saray pantitipon a singa say annual meeting tan graduation na Gilead.