Ta hopi importante pa parehanan casa expresa nan aprecio pa otro. Sinembargo, hopi esposo cu esposa ta stop di wak e bon cualidadnan di nan casa, y como consecuencia nan no ta expresa niun tipo di aprecio pa otro mas. Den e buki Emotional Infidelity, un consehero a splica cu hopi pareha cu ta busca yudansa cerca dje “ta mas preocupa tocante loke no ta pasando [den nan matrimonio] cu loke si ta pasando. Nan ta bin cerca mi pa bisa mi loke mester cambia, no loke mester keda mescos. E fout cu tur e parehanan aki ta haci ta cu nan no ta demostra nan amor door di mustra aprecio pa otro.”

Con parehanan casa por evita di cay den e trampa aki?

Expresionnan di aprecio por kita tension den matrimonio. Normalmente, ora un esposo y un esposa ta haci esfuerso pa mira e bunita cualidadnan di nan casa y ta elogia nan casa pa esey, nan relacion ta mehora. Hasta ora un matrimonio ta bou di hopi tension y ambos casa ta sinti nan mes aprecia, esey por yuda kita tension.

Pa esposa. E buki cu nos a caba di menciona, Emotional Infidelity, ta bisa: “Hopi hende muher no ta ripara cu un hende homber ta sinti un presion enorme pa percura pa nan famia.” Esey por ta e caso hasta den famianan caminda tanto e esposo como e esposa ta traha.

Pa esposo. Hopi bes hende homber no ta balora e esfuerso cu nan esposa ta haci pa e famia: sea ta door di traha pa gana placa, lanta e yiunan of como ama di cas. Fiona, * kende tin rond di tres aña casa, a bisa: “Nos tur ta haci fout, y ora ami haci fout, mi ta sinti mi masha malo mes. Pesey, ora mi esposo elogia mi pa por ehempel un trabou di cas cu mi a haci bon, mi ta realisa cu ainda e ta stima mi a pesar di mi imperfeccionnan y cu e ta apoya mi. Esta contento mi ta sinti!”

Di otro banda, ora un hende sinti cu su casa no ta balor’e, esey por kibra e matrimonio. Un esposa cu yama Valerie a comenta: “Ora bo casa no ta mustra aprecio pa bo, ta facil pa bo sinti bo atrai na un persona cu si ta mustra aprecio pa bo.”

Observa bon. Wak durante un siman cua ta e cualidadnan bon cu bo ta mira den bo casa. Ademas, observa loke bo casa ta haci pa tur cos cana smooth den cas: cosnan cu kisas nunca bo a ripara. Anto, na final di e siman, traha un lista di (1) e cualidadnan cu bo ta aprecia di bo casa y (2) e cosnan cu el a haci pa e famia.—Principio di Bijbel: Filipensenan 4:8.

Dicon ta necesario pa observa? Un esposa cu yama Erika a bisa: “Despues di un par di aña casa, kisas bo no ta mira e balor di bo casa mas. Bo ta stop di observa e bon cosnan cu e ta haci y cuminsa focus mas riba e cosnan cu e no ta haci.”

Puntra bo mes: Mi ta keda sin mustra aprecio pa e trabou duro di mi casa? Por ehempel, si bo esposo ta drecha algun cos na cas, bo ta keda sin bis’e danki djis pasobra bo ta sinti cu esey ta su deber? Si bo ta un esposo, bo ta sinti cu bo no tin nodi elogia bo esposa ora e ta educa e yiunan pasobra toch ta su trabou esey ta? Ta bon pa pone meta pa haci esfuerso pa observa tur e esfuerso cu bo casa ta haci pa boso famia y gradicie; sea cu esey ta un poco esfuerso of hopi esfuerso.—Principio di Bijbel: Romanonan 12:10.

Duna hopi elogio. Bijbel no ta djis bisa cu nos mester ta agradecido. E ta bisa pa boso “mustra cu boso ta agradecido.” (Colosensenan 3:15) Pues, purba haci esey un custumber. Gradici bo casa! Un esposo cu yama James a bisa: “Ora mi casa expresa aprecio pa e cosnan cu mi ta haci, e cos ey ta duna mi gana di traha mas duro pa bira un mihor esposo y haci mas esfuerso pa mehora nos matrimonio.”—Principio di Bijbel: Colosensenan 4:6.

Esposo- y esposanan cu ta expresa aprecio pa otro ta mehora nan relacion cu otro. Un esposo cu yama Michael a bisa: “Ami ta kere cu hopi matrimonio por keda intacto si e pareha ta sigui focus riba loke nan gusta di otro. Ora tin problema, nan lo ta menos inclina na caba cu e matrimonio pasobra semper nan ta corda cu nan casa ta valioso.”