NA AÑA 2015 nan a haci un encuesta den ocho pais bou di hende cu ta traha full-time. Hopi di nan a bisa cu ta hopi dificil pa parti nan mes entre trabou y famia. Dicon? Entre otro pasobra tin di nan a haya mas responsabilidad na trabou of na cas, costo di bida ta subi y nan tin cu traha mas ora na trabou. Na Merca, por ehempel, trahadornan cu ta full-time ta bisa cu nan ta traha un averahe di 47 ora pa siman. Y casi 1 di cada 5 ta bisa cu nan ta traha 60 ora of mas.

Un otro encuesta cu nan a haci den 36 pais ta indica cu mas cu 25 porciento di trahador tin stress hasta den nan tempo liber. Mucha tambe por sinti asina si nan programa ta yen di actividad tras di otro.

Ora cu constantemente nos ta purba haci mas di loke nos por, nos por haya stress. Como consecuencia, nos por bira victima di loke nan ta yama “presion di tempo.” Acaso ta posibel pa hiba un bida mas balansa? Kico nos creencianan, escogencianan y metanan tin di haber cu e asunto aki? Prome cu nos contesta e preguntanan ey, laga nos ban wak dicon algun hende ta asina druk.

Gary, kende ta un tata di famia, a bisa: “Mi tabata traha shete dia pa siman pasobra semper tabatin algo mihor cu mi kier a duna mi yiunan. Mi tabata kier pa nan tin loke ami nunca no tabatin.” Tur mayor kier lo mihor pa nan yiunan, pero ta bon pa nan reevalua nan prioridadnan. Tin algun estudio cu ta indica cu tanto mayornan como yiunan cu ta considera placa y cos material hopi importante, tin tendencia di ta menos feliz, satisfecho y tin mas problema cu nan salud cu hende cu no ta materialista.

Pa garantisa cu nan yiunan lo tin exito den futuro, algun mayor ta pak nan yiunan y nan mes cu yen di actividad. Como consecuencia, henter e famia ta sufri.

Medionan di comunicacion ta purba convence nos cu nos ta perde algo si nos no cumpra e productonan mas nobo riba mercado. E revista The Economist ta bisa: “E tantisimo productonan cu tin riba mercado ta pone hende sinti cu nan no tin suficiente tempo” pasobra como consumidor “constantemente nan tin cu dicidi kico pa cumpra, wak y come” durante e tiki tempo cu nan tin.

Na 1930, un economista bon conoci a predeci cu avance riba tereno di tecnologia lo yuda trahadornan haya mas tempo liber. Esey ta leu di ta berdad. Elizabeth Kolbert, redactora di e revista The New Yorker a bisa: “En bes di caba mas trempan cu trabou, hende ta descubri cosnan nobo cu nan tin mester”; anto pa satisface nan deseonan, nan mester di tempo y placa.

Algun trahador ta traha mata curpa pa oranan largo pa tene nan doño di trabou contento. Ademas, tin trahador ta pone nan coleganan sinti nan mes culpabel si nan no keda traha te laat. Y pa motibo di instabilidad economico, hende ta dispuesto pa traha mas ora y ta disponibel pa traha ki ora cu ta.

Ademas, tin mayornan por sinti nan presiona pa tin un bida hopi druk pasobra otro famianan tambe ta druk. Y si nan no  haci esey, kisas nan ta sinti nan mes culpabel pasobra segun nan nan ta “priva” nan yiunan di cierto cosnan.

Tim, kende ta biba na Merca, a bisa: “Mi tabata gusta mi trabou, y mi tabata traha mata curpa na trabou. Mi a pensa cu mi mester demostra kico mi por haci.”

Hopi hende ta pensa mescos cu Tim: Loke un hende ta pensa di su mes tin influencia riba con druk e ta. Kico ta e resultado? Elizabeth Kolbert, kende nos a menciona caba, a bisa: “Si bo ta druk, bo ta haya status, y mas druk bo ta, mas importante hende lo pensa cu bo ta.”

Bijbel ta anima nos pa traha duro. (Proverbionan 13:4) Pero tambe Bijbel ta anima nos pa hiba un bida balansa. Eclesiastes 4:6 ta bisa: “Un man yen di sosiego ta mihor cu dos mokete yen di trabou y coremento tras di biento.”

Si nos ta hiba un bida balansa, esey por tin un bon efecto riba nos salud mental y fisico. Pero ta posibel pa baha man na trabou? Sigur cu si! Laga nos ban analisa cuater sugerencia practico.

Ta normal cu un hende kier un cierto grado di siguridad financiero. Pero cuanto placa lo ta suficiente? Kico ta exito? Acaso bo ta midi exito a base di entrada of propiedad? Pensa un rato, ta bale la pena traha duro pa gana placa si bo no tin tempo pa gast’e? Pero di otro banda, ora un hende ta dedica mucho tempo na sosiego y recreo, esey tambe por causa stress.

Tim, kende nos a menciona caba, a splica: “Ami cu mi esposa a analisa nos estilo di bida bon y a dicidi di simplifica nos bida. Nos a traha un tabel cu ta mustra kico ta nos situacion actual y kico ta nos metanan nobo. Nos a papia riba e consecuencianan di decisionnan cu nos a tuma den pasado y kico nos mester haci pa logra nos metanan.”

Bijbel ta conseha nos pa domina nos “deseo di wowo.” (1 Juan 2:15-17) Propaganda por lanta e deseo ey y pone un hende traha mas hopi of gasta mucho tempo of placa na recreo. Ta berdad cu bo no por evita tur propaganda, pero loke si bo por haci ta controla cuanto bo ta wak. Tambe bo por pensa bon kico realmente bo tin mester.

Ademas, no lubida cu hende tambe por tin hopi influencia riba bo. Si bo amigonan ta core tras di cos material of si nan ta midi exito a base di entrada y posesionnan material, kisas lo ta sabi pa busca amigo cu tin otro meta. Bijbel ta bisa: “Esun cu anda cu hende sabi lo ta sabi.”—Proverbionan 13:20.

Papia cu bo hefe tocante bo trabou y bo prioridadnan. Y no sinti bo culpabel cu bo trabou no ta e cos di mas importante den bo bida. E buki Work to Live ta bisa: “Tur hende cu a pone un  limite entre trabou y famia of a tuma vakantie a ripara lo siguiente: Mundo no ta caba durante bo ausencia.”

Gary, kende nos a menciona caba, tabata bon para financieramente, y pesey el a dicidi di traha menos ora. El a bisa: “Mi a papia cu mi famia y a pidi nan pa nos pone meta pa simplifica nos bida. Pocopoco nos a dal paso pa logra e meta ey. Ademas, mi a acerca mi doño di trabou y a pidie pa mi traha menos dia pa siman, y el a bay di acuerdo.”

Esposo cu esposa mester dedica tempo na otro, y mayornan mester dedica tempo na nan yiunan. Pesey no sigui ehempel di famianan cu tur ora ta hopi druk. Gary ta sugeri: “Pone tempo pa sosega y recrea, y keda sin haci loke no ta importante.”

Ora boso ta hunto como famia, no laga television, telefon celular ni otro aparatonan electronico separa boso for di otro. Come por lo menos un cuminda pa dia hunto como famia. Esaki ta un bon oportunidad pa boso papia cu otro. Si mayornan aplica e conseho simpel ey, nan yiunan lo ta mas feliz y nan lo bay bon na scol.

Na conclusion, puntra bo mes: Ki tipo di bida mi kier pa mi mes y pa mi famia? Si bo kier tin un bida mas feliz y cu ta bale la pena, pone prioridadnan cu ta basa riba e sugerencianan practico di Bijbel.