PA HOPI tempo hende a kere cu bubi di noordpool ta bula alrededor di 35.200 kilometer for di noordpool pa bay zuidpool y despues bin bek. Sinembargo, estudionan recien ta mustra cu e parhanan aki eigenlijk ta bula distancianan hopi mas largo.

Nan a pone aparato chikito na un par di bubi pa por localisa nan. E aparatonan aki tin mas o menos e mesun peso cu un paper clip. Anto asina nan a haya sa cu algun bubi ta bula alrededor di 90.000 kilometer durante un rondtrip di noordpool pa zuidpool. Esaki ta e migracion di bestia di mas largo cu hende conoce. Figura bo, un paharito a bula casi 96.000 kilometer! Pakico nan a ahusta e cifra aki?

No ta importa unda e bubinan di noordpool a cuminsa nan ruta via Ocean Atlantico, nan ruta no tabata stret sino tin forma di un S manera bo por mira riba e mapa. Dicon nan ta bula asina? E parhanan aki simplemente ta probecha di e direccion di biento.

Bubi por biba rond di 30 aña, y nan por bula mas cu 2,4 miyon kilometer durante nan bida. Nos por compara esey cu tres pa cuater biahe ida y buelta pa nos luna. Un investigador a bisa: “Esaki ta un logro impresionante pa un paharito cu ta pisa apenas un tiki mas cu 100 gram [3,5 ons].” Ademas, como cu bubi di noordpool ta experencia zomer tanto na noordpool como na zuidpool, “nan ta mira mas luz di dia pa aña cu cualkier otro ser bibo”, segun e buki Life on Earth: A Natural History.