Dios ta husto y kier bendiciona tur hende.

Dios a priminti Profeta Abraham cu “[mediante bo] tur e famianan di mundo lo ta bendiciona.”—Genesis 12:3.

Kico nos ta siña? Dios ta stima nos y kier bendiciona tur famia cu ta obedec’e, tanto hende homber como hende muher y mucha.

Dios ta misericordioso y ta bendiciona tur hende cu ta haci esfuerso pa siña conoc’e.

E Todopoderoso a duna Profeta Moises poder pa haci varios milager grandi. Pero toch Moises a pidi Dios: “Laga mi conoce bo camindanan, pa mi conoce bo, [y] pa mi haya gracia den bo bista.” (Exodo 33:13) Dios a keda contento cu loke Moises a pidie. Pesey el a bendicion’e cu sabiduria y a yud’e pa conoce su cualidadnan y su manera di actua. Por ehempel, Moises a siña cu e Creador ta “yen di compasion y gracia.”—Exodo 34:6, 7.

Kico nos ta siña? Dios kier bendiciona tur hende, tanto hende homber como hende muher y mucha cu ta haci esfuerso pa siña conoc’e mas mihor. Dios ta mustra nos den e Santo Scritura con nos mester ador’e y cu e ta cla pa bendiciona nos tur.

Dios lo bendiciona nos si nos siña loke Hesus a haci y siña hende.

E Palabra di Dios ta siña nos hopi cos di e bida di Hesus y di su siñansanan. Dios a duna Hesus poder pa haci hopi milager. Por ehempel, el a cura hende ciego, sordo y coho. El a hasta lanta hende for di morto. Di e manera ey, el a demostra kico ta e bon cosnan cu Dios lo haci pa nos den futuro. Hesus a splica kico cada un di nos mester haci pa disfruta di e bendicionnan aki. El a bisa: “Pa haya bida eterno, nan tin cu siña conoce bo, e unico Dios berdadero, y esun cu bo a manda, Hesucristo.”—Juan 17:3.

Hesus tabata compasivo, amoroso y bondadoso. Pesey tanto hende homber como hende muher di tur edad tabata acepta su invitacion: “Siña di mi, pasobra mi tin un genio suave y un curason humilde, y boso alma lo keda refresca.” (Mateo 11:29) Hesus tabata diferente for di e hendenan di su tempo cu tabata maltrata hende muher. Hesus a trata hende muher cu bondad, dignidad y respet.

Kico nos ta siña? Hesus a stima hende masha hopi mes y el a pone un excelente ehempel ta con nos mester trata otro hende.

E Santo Scritura ta siña nos cu “realmente ta un Dios tin” y cu Hesucristo tabata Dios su humilde mensahero. (1 Corintionan 8:6) Hesus a bisa claramente cu Dios ta mas cu ne y cu ta Dios a mand’e riba Tera.—Juan 11:41, 42; 14:28. *