Bo Tabata Sa?
E ilustracion di Hesus tocante “cacho chikito” tabata ofensivo?
Un estatua Griego of Romano di un mucha cu un cacho chikito (di prome siglo prome cu Cristo pa di dos siglo despues di Cristo)
Na un ocasion, ora Hesus tabata pafo di e teritorio di Israel den e provincia Romano di Siria, un señora Griego a acerca Hesus pa pidie yudansa. Den Hesus su contesta, el a conta un ilustracion cu a compara hende cu no ta hudiu cu “cacho chikito.” Bou di e Ley di Moises, cacho tabata ser considera un bestia impuro. (Levitico 11:27) Pero Hesus su intencion tabata pa ofende e señora Griego aki y otro hende cu no ta hudiu?
No. E punto cu Hesus a splica su discipelnan tabata cu su prioridad na e tempo ey tabata pa yuda e hudiunan. Pues el a ilustra e punto aki ora el a bisa e señora Griego: “No ta bon pa coy pan di e yiunan y tir’e pa cacho chikito.” (Mateo 15:21-26; Marco 7:26) Entre e Griego- y Romanonan, hopi biaha un cacho tabata un bestia stima cu tabata biba den cas di su doño y tabata hunga cu mucha chikito. Pues e expresion “cacho chikito” a crea un imagen agradabel y a lanta un dushi sintimento. E señora Griego a compronde kico Hesus tabata kiermen y a contest’e: “Berdad, Señor, ma en realidad e cacho chikitonan tambe ta come [garnachi] cu ta cay for di mesa di nan doño.” Hesus a elogi’e pa su fe y a cura su yiu muher.—Mateo 15:27, 28.
Dicon apostel Pablo a conseha un capitan di barco pa pospone nan biahe riba lama?
Un obra di arte graba di un barco (prome siglo despues di Cristo)
E barco cu mester a hiba Pablo Italia tabatin problema pa nabega contra biento. Durante un escala, e apostel a conseha e capitan pa pospone e biahe. (Echonan 27:9-12) Dicon e apostel a duna e conseho aki?
Den antiguedad, nabegantenan tabata bon na altura cu tabata peligroso pa nabega riba Lama Mediteraneo durante winter. Entre meymey di november pa meymey di maart no tabata recomendabel pa nabega. Pero e biahe cu Pablo a menciona mester a tuma luga na september of october. Den e buki Epitome of Military Science, e escritor Romano Vegecio (di siglo 4 despues di Cristo) a splica tocante nabegacion riba lama: “Algun luna ta bon pa nabega, algun luna kisas y resto di aña ta imposibel.” Vegecio a bisa cu entre 27 di mei pa 14 di september tabata safe pa nabega, y e dos periodonan peligroso tabata entre 15 di september pa 11 di november y entre 11 di maart pa 26 di mei. Pablo, un homber cu a yega di biaha hopi, siguramente tabata conoce e factornan aki. E doño di e barco y e capitan casi sigur tambe tabata sa esaki, pero nan a ignora Pablo su conseho. Anto e barco a naufraga.—Echonan 27:13-44.
