De bes en cuando, arkeologonan sa descubri obhetonan cu ta proba, directamente of indirectamente, cu un personahe biblico a yega di existi di berdad. Por ehempel, na aña 2011, expertonan Israeli a publica informacion tocante un obheto asina. Ta trata aki di un osario di mas o menos 2.000 aña bieu, esta, un cahita decora cu granit den cua nan tabata pone weso di un difunto.

Riba e osario aki tabatin e inscripcion: “Miriam, yiu muher di Yeshua, yiu homber di Caifas, sacerdote di Maazias di Beth ʹImri.” E sumo sacerdote Hudiu cu tabata envolvi den husgamento y ehecucion di Hesus tabata yama Caifas. (Juan 11:48-50) Historiador Flavio Josefo a referi na e sumo sacerdote aki como Jozef. Evidentemente, e osario aki tabata di un famia di Caifas. Y como cu riba un otro osario cu nan a haya tabatin e inscripcion “Yehosef bar Caiapha”, esta Jozef yiu di Caifas, * Miriam lo mester tabata famia di Caifas.

Segun e informacion cu IAA (Autoridad di Cosnan Antiguo di Israel) a duna, nan a confisca e osario di Miriam for di man di ladronnan cu a plunder un graf antiguo. Un analisis di e artefacto aki y di loke tabatin skirbi riba dje a comproba cu e ta autentico.

Ademas, e inscripcion riba e osario di Miriam ta divulga algo nobo. E ta menciona “Maazias”, kende tabata cabes di e di 24 division sacerdotal; cada division tabata haya turno pa sirbi na e tempel na Jerusalem. (1 Cro. 24:18) Segun IAA, e inscripcion riba e osario di Miriam ta revela cu “e famia di Caifas tabata di e division di Maazias.”

E inscripcion ta menciona Beth ʹImri tambe. Tin dos posibel interpretacion pa e nomber aki: Segun IAA, ‘e prome ta cu Beth ʹImri probablemente ta nomber di un famia sacerdotal: yiu hombernan di Imer. (Esdras 2:36-37; Nehemias 7:39-42) Nan descendientenan tabata miembro di e division di Maazias.’ E di dos posibel interpretacion ta cu Beth ʹImri ta ‘e luga di origen di Miriam of di henter su famia.’ Sea loke sea e caso, e osario di Miriam ta evidencia palpabel cu e personanan cu Bijbel ta menciona a yega di existi di berdad.