Den antiguedad, hopi nacion tabata ehecuta cierto criminalnan clabando nan na un staca, of palo. E Romanonan tabata mara of claba un persona asina bibo na staca; e tabata keda asina kisas pa varios dia te ora cu e muri di dolor, sed, hamber y di e efectonan di elementonan di naturaleza. Pa e Romanonan, castigo di morto na un staca tabata un castigo bergonsoso, reserva pa e criminalnan di mas baho.

Kico di e nacion di Israel di antiguedad? E Israelitanan a ehecuta criminalnan colgando nan na staca? E Ley di Moises a bisa: “Si un homber a comete un pica digno di morto y e wordo mata, y boso colg’e na un palo, e ora ey su curpa no mester keda colga henter anochi na e palo, ma siguramente bo mester der’e riba e mesun dia.” (Deu. 21:22, 23) Ta claro anto cu, den tempo di e Scritura Hebreo, un persona cu a merece morto a ser mata prome cu a colg’e na staca, of palo.

Levitico 20:2 ta bisa: “Cualkier homber for di e yiunan di Israel of for di e stranheronan cu ta keda biba pa un tempo na Israel cu duna un di su yiunan na Molok, mester wordo mata sigur; e pueblo di e tera mester piedr’e cu piedra.” Pues, “montado of spiritista” tambe mester a ser mata. Con? Nan mester a “piedra” nan.—Lev. 20:27.

Na Deuteronomio 22:23 y 24, nos ta lesa: “Si tin un mucha muher cu ta birgen, cu ta comprometi cu un homber, y un otro homber hay’e den stad y drumi cu ne, e ora ey boso lo saca tur dos hiba na porta di e stad ey y piedra nan mata; e mucha muher, pasobra e no a grita pa yudansa den e stad, y e homber, pasobra el a viola esposa di su prohimo. Asina bo mester kita e maldad for di meymey di boso.” Pues, nos ta compronde anto cu e metodo principal cu e prome Israelitanan tabata uza pa ehecuta un persona culpabel di un crimen teribel tabata di piedra hende mata. *

Deuteronomio 21:23 ta bisa: “Esun cu wordo colga ta maldiciona di Dios.” E echo cu tur hende por a mira curpa di un malhechor, un persona “maldiciona di Dios”, colga na staca siguramente lo tabatin efecto riba e Israelitanan. Si, e echo cu nan tabata ehecuta un persona cu a comete un mal echo y colga su cadaver na staca, of palo, sigur a sirbi como un spiertamento pa otronan.