Bo a yega di sinti un dolor asina fuerte cu el a pone bo yora?— * Esey a yega di sosode cu casi tur hende. Ma tin biaha no ta nos curpa ta haci dolor. Kisas un hende ta papia malo di nos y ta bisa cosnan cu no ta berdad. Esey por haci dolor, no ta berdad?— Dios tambe por sinti dolor ora nan ta gaña riba dje. Laga nos papia tocante esaki y mira con nos por haci Dios contento en bes di caus’e dolor.

Bijbel ta bisa cu algun hende cu a pretende cu nan ta stima Dios a “hacie tristo.” Si, nan a causa Dios dolor! Claro, ningun hende no por pone Jehova Dios su curpa sinti dolor. E ta todopoderoso. Laga nos mira anto dicon Jehova ta sinti dolor of ta bira tristo ora nos no ta haci loke e ta manda nos haci.

E prome dos hendenan cu Jehova a crea riba tera a hacie masha tristo mes. El a pone nan den e Paradijs riba tera cu tabata yama e “hofi di Eden.” Ken e dos hendenan aki tabata?— Si, tabata Adam cu Eva. Laga nos wak kico nan a haci cu a pone Jehova bira tristo.

Despues cu Jehova a pone nan den e hofi ey, el a bisa nan pa cuid’e. Tambe el a bisa nan cu nan por a haya yiu y biba den e hofi pa semper. Pero prome cu Adam cu Eva a haya yiu, algo teribel a pasa. Bo sa kico a pasa?— Un angel a pone Eva desobedece Dios, y despues Adam tambe a desobedec’e. Laga nos wak con esey a sosode.

E angel a laga un colebra haci manera cos cu e por papia. Eva a gusta loke el a tende—e colebra a bis’e cu lo e bira “manera Dios.” Pesey el a  haci loke e colebra a bis’e haci. Bo sa kico el a haci?—

Eva a come for di e palo cu Jehova a bisa Adam pa no come for di dje. Prome cu Dios a crea Eva, el a bisa Adam: “Di tur palo di e hofi bo mag come libremente, ma di e palo di conocemento di bon y malo lo bo no come, pasobra e dia cu bo come di dje, lo bo muri sigur.”

Eva tabata sa di e ley ey. Ma el a keda wak e palo y a ripara cu e “tabata bon pa cuminda, y cu e tabata un delicia pa bista ... El a coge di su fruta y a come.” Despues el a duna Adam e fruta, y Adam tambe “a come.” Dicon bo ta kere Adam a haci esey?— Esey ta pasobra Adam tabata stima Eva mas cu Jehova. El a prefera di agrada Eva en bes di agrada Dios. Pero ta mas importante pa obedece Jehova cu cualkier otro persona!

Bo ta corda e colebra cu a papia cu Eva? Mescos cu un hende por laga parce cu ta un popchi ta papia, un persona a haci manera cos cu ta e colebra tabata papia. Ta bos di ken tabata bin for di e colebra?— Tabata bos di e “colebra original, esun cu yama Diabel y Satanas.”

Bo sa con bo por haci Jehova contento?— Bo por haci Jehova contento si bo ta haci bo best pa obedec’e semper. Satanas ta bisa cu e por pone tur hende haci loke e kier pa nan haci. Pesey Jehova ta anima nos: “Sea sabi, mi yiu, y haci mi curason contento, pa mi por contesta esun cu reprocha mi.” Satanas ta reprocha of haci cherche di Jehova. E ta bisa cu e por kita tur hende di sirbi Jehova. Pues, si abo obedece Jehova y sirbie, esey lo haci Jehova masha contento. Lo bo haci bo best pa logra esey?—