Casi niun hende no ta gusta papia tocante morto pasobra e ta un tema delicado. Pero, tardi of trempan e ta afecta nos tur.

No tin nada cu por prepara nos pa e perdida di un mayor, un casa of un yiu. E por sosode diripiente of despues di un temporada largo di sufrimento. Den tur dos caso, nos tur ta sufri ora nos perde un ser keri. Y e sintimento cu morto ta fin di tur cos por caba cu nos.

Antonio a perde su tata den un accidente di trafico. El a bisa: “Ta manera un hende a cera tur entrada di bo cas anto kita e yabinan fo’i bo. Nunca mas bo por drenta, ni sikiera pa tira un bista. Ta recuerdo so a keda atras. Esey ta e tristo realidad. E ta asina inhusto cu bo no kier acepta, pero no tin nada cu bo por haci.”

Dorothy, un anglicano y maestra di zondag school, tabatin 47 aña tempo cu el a perde su esposo. Aunke nunca el a pensa cu morto ta fin di tur cos, tabatin algo cu e no a compronde mucho bon. Pesey el a puntra su pastoor: “Kico ta pasa ora nos muri?” E pastoor a contest’e: “Ningun hende no por bisa. Ta di sinta warda.”

Ta berdad cu esey ta e unico cos cu nos por haci, esta, sinta warda? Of tin un manera pa nos haya sa si en realidad morto ta fin di tur cos?