ELIAS tabata cana den e vaye di Jordan. Pa simannan largo el a cana for di Sero Horeb bay noord den direccion di Israel, su pais natal. Ora cu el a yega porfin, e por a mira cuanto cos a cambia. E efectonan di e secura largo a cuminsa disparce. Awasero di herfst a cuminsa cay, y e cunukeronan tabata ploeg nan cunucu. E profeta lo mester a sinti un alivio ora el a mira cu su pais tabata recuperando. Pero e tabata mas preocupa pa e hendenan. Nan condicion spiritual a laga hopi di desea. Ainda hopi di nan tabata adora e dios falso Baal, y Elias tabatin hopi trabou di haci. *

Ora Elias a yega banda di e pueblo di Abel-mehola, el a mira hopi trabou di cunucu ta tuma luga. Tabatin 12 par di toro ta ploeg banda di otro y traha canal paralelo den e tera muha. Elias tabatin mester di e homber cu tabata dirigi e ultimo par di toro. E tabata yama Eliseo, esun cu Jehova a scoge pa bira sucesor di Elias. Sin duda, Elias tabata ansioso pa topa e homber aki, pasobra na un dado momento el a sinti cu ta e so a keda fiel na Jehova.—1 Reynan 18:22; 19:14-19.

Acaso Elias tabatin problema pa delega algun di su responsabilidadnan, comparti su privilegionan y ser reemplasa un dia? Nos no sa, ni nos no por bisa cu e cosnan ey no a pasa den su mente. Al fin y al cabo, e tabata “un homber cu e mesun sintimentonan cu nos.” (Santiago 5:17) En todo caso, Bijbel ta bisa cu “Elias a pasa bay cerca [Eliseo] y a tira su mantel riba dje.” (1 Reynan 19:19) E mantel cu Elias tabatin bisti, talbes di cuero di carne of di cabrito, tabata un indicacion cu Jehova a nombr’e como profeta. E echo cu el a tira su mantel riba Eliseo su schouder tabatin hopi nificacion. Di buena gana Elias a sigui ordo di Jehova pa nombra Eliseo como su sucesor. Elias a confia su Dios y a obedec’e.

Di otro banda, Eliseo tabata ansioso pa yuda e profeta Elias, kende tabata mas grandi cu ne. E idea no tabata pa Eliseo reemplasa Elias mesora. En bes di esey, cu un actitud humilde el a compaña Elias y yud’e pa seis aña largo. Mas despues el a bira conoci como esun “kende antes tabata basha awa riba e mannan di Elias.” (2 Reynan 3:11) Esta contento Elias lo mester a keda cu un ayudante capaz y servicial asina! Siguramente nan lo a bira bon amigo di otro. Nan tabata un animacion pa otro, locual a yuda nan persevera a pesar di tur e inhusticia cu tabata reina den e pais. Specialmente e cosnan horibel cu e rey malbado Acab tabata haci a bay di malo pa pio.

Abo a yega di bira victima di inhusticia? Mayoria di nos a yega di pasa den situacionnan asina den e mundo corupto aki. Si bo tin un amigo cu ta stima Dios, lo e por yuda bo persevera. Bo por siña hopi tambe for di e manera cu Elias a demostra fe a pesar di inhusticia.

Elias cu Eliseo a traha duro pa yuda e pueblo bolbe na Dios. Ta parce cu nan tabata entrena otro profeta den un tipo di scol di profeta. Cu tempo Jehova a duna Elias un asignacion nobo: “Lanta, baha bay pa contra cu Acab, rey di Israel.” (1 Reynan 21:18) Kico Acab a haci?

E rey tabata un apostata caba, y e tabata pio cu tur e reynan di Israel prome cu ne. El a casa cu Jezabel, loke a pone adoracion di Baal plama den e pueblo; y e mes tambe tabata adora e dios falso aki. (1 Reynan 16:31-33) Adoracion di Baal tabata consisti di ritonan di fertilidad, prostitucion ritual y hasta sacrificio di mucha. Ademas, Acab a caba di desobedece e ordo di Jehova pa mata Ben-adad, e rey malbado di Siria. Aparentemente, el a rechasa e ordo cu e meta pa saca beneficio financiero. (1 Reynan, capitulo 20) Pero awor e golosidad, materialismo y violencia di parti di Acab cu Jezabel a bira di remate.

Acab tabatin un palacio enorme na Samaria. Tambe e tabatin un palacio na Jezreel, un 37 kilometer mas leu. Pega cu e di dos palacio aki tabatin un cunucu di wendruif. Acab tabatin hopi gana di haya e pida tereno ey cu tabata pertenece na un homber cu yama Nabot. Acab a yam’e pa e bin cerca dje, anto el a ofrec’e pa cumpra su cunucu di wendruif of pa cambi’e pa un otro. Pero Nabot a bisa: “SEÑOR libra mi di duna bo e herencia di mi tatanan.” (1 Reynan 21:3) Acaso Nabot tabata terco of a papia sin pensa? Hopi hende ta kere esey. En realidad, el a obedece e Ley di Jehova cu a prohibi e Israelitanan di bende nan tera permanentemente, ya cu tabata trata di herencia di nan famia. (Levitico 25:23-28) Nabot no a pensa mes di kibra e Ley di Dios. E tabata un homber di fe y curashi, pasobra e mester tabata sa di e peliger di bay contra Acab.

Acab si no tabata worry cu e Ley di Jehova. El a bay cas “cu mal beis y masha rabia”, pasobra e no a haya su kier. E relato ta sigui conta: “El a cay drumi riba su cama y a bira su cara, y no kier a come.” (1 Reynan 21:4) Ora Jezabel a mira su casa ta trek su cara mescos mucha chikito, mesora el a traha un complot pa Acab haya loke e tabata kier y alabes caba cu e famia husto aki.

Bo no por lesa di Jezabel su complot sin keda babuca di cuanto astucia e muher aki tabatin. Reina Jezabel tabata sa cu segun e Ley di Dios, dos of mas testigo tabata necesario pa acusa un hende di un ofensa serio. (Deuteronomio 19:15) Pesey, na nomber di Acab el a skirbi e hombernan prominente di Jezreel pa pidi nan busca dos homber cu tabata dispuesto pa acusa Nabot falsamente di blasfemia, un acto cu tabata hiba na pena di morto. Y su complot tabatin exito tambe! “Dos homber perverso” a duna testimonio falso contra Nabot, y como resultado nan a piedr’e mata. Pero no esey so, nan a mata Nabot  su yiunan tambe! * (1 Reynan 21:5-14; Levitico 24:16; 2 Reynan 9:26) En realidad, Acab a laga su casa manda riba dje, haci loke e tabata kier y mata e hendenan inocente ey.

Imagina bo con Elias lo mester a sinti ora Jehova a revela na dje kico e rey y e reina a haci. Ora hende malbado abusa di hende husto, nos lo por sinti nos hopi desanima. (Salmo 73:3-5, 12, 13) Awe nos ta mira hopi inhusticia, tin biaha hasta di parti di hende poderoso cu ta pretende cu nan ta haci e cosnan ey den nomber di Dios. Pero e relato aki por ta un consuelo pa nos. Bijbel ta recorda nos akinan cu nada no ta scondi pa Jehova. E ta mira tur cos. (Hebreonan 4:13) Awor, kico e ta haci contra maldad?

Jehova a manda Elias cerca Acab. Dios a bis’e bon cla: “E ta den e cunucu di wendruif di Nabot.” (1 Reynan 21:18) Ora Jezabel a bisa Acab cu e cunucu di wendruif a bira di dje, Acab a lanta mesora y a bay pa disfruta di su propiedad nobo. E no a pensa mes cu Jehova tabata wak e. Imagina bo su expresion di cara ora e tabata cana den e cunucu, pensando con lo e por a transform’e den un hofi hopi bunita mes. Pero diripiente, ata Elias! Acab su cara contento a cambia den rabia y odio, y yen di furia el a bisa Elias: “Bo a haya mi, o mi enemigo.”—1 Reynan 21:20.

Acab su contesta a saca dos bobedad na cla. Di prome, ora el a bisa Elias “Bo a haya mi”, el a demostra cu e tabata ciego spiritualmente. Jehova si a ‘hay’e’ caba. El a mira con Acab a haci mal uzo di su boluntad liber y con el a gosa di e resultado di Jezabel su plan malbado. Dios a mira cu den curason di Acab, amor pa cosnan material a bira mas importante cu su sentido di misericordia, husticia of compasion. Di dos, ora el a yama Elias “O mi enemigo!” Acab a saca na cla su odio contra Elias, kende tabata amigo di Jehova Dios y kende por a yud’e bira for di su rumbo desastroso.

Nos por saca lesnan valioso for di Acab su bobedad. Nos mester corda semper cu Jehova Dios ta mira tur cos. Como un Tata amoroso, e sa ki ora nos ta desviando for di e caminda corecto, y e ta ansioso pa mira nos bira for di nos mal caminda. Hopi biaha e ta uza su amigonan pa yuda nos—personanan fiel manera Elias cu ta comparti e palabra di Dios cu nan prohimo. Lo ta un ekibocacion  di nos parti pa mira Dios su amigonan como enemigo!—Salmo 141:5.

Imagina bo awor con Elias a contesta Acab: “Mi a haya bo.” E tabata sa ki sorto di hende Acab tabata—un ladron, un asesino y un rebelde contra Jehova. Elias mester tabatin hopi curashi pa e por a enfrenta e homber malbado ey! Mesora el a dicta Dios su sentencia contra Acab. Jehova a mira kico tabata pasando; e maldad cu Acab y su famia a fomenta a afecta henter e pueblo. Pesey Elias a bisa Acab cu Jehova a duna ordo pa “bari” henter e dinastia di Acab y caba cu ne. Y pa loke ta Jezabel, e tambe lo a haya su castigo.—1 Reynan 21:20-26.

Elias no a perde confianza den husticia. E no a djis pensa cu hende por haci malo sin haya castigo. Ta facil pa pensa asina den e mundo di awe. Pero e relato biblico aki ta recorda nos cu Jehova Dios no solamente ta mira kico ta pasando, sino cu tambe lo e tuma medida na su debido tempo. Su Palabra ta sigura nos cu pronto e ta bay caba cu tur inhusticia pa semper! (Salmo 37:10, 11) Pero kisas bo ta puntra bo mes: ‘Dios su huicionan ta encera castigo so? Of e ta mustra misericordia tambe?’

Kisas Acab su reaccion riba e huicio divino a sorprende Elias. E relato ta sigui bisa: “A sosode cu ora Acab a tende e palabranan aki, el a scheur su pañanan, a bisti paña-di-saco y a yuna, y el a drumi abou den paña-di-saco y tabata cana rond tur deprimi.” (1 Reynan 21:27) Acaso Acab a arepenti di su maldad?

Nos por bisa cu por lo menos el a cuminsa haci cambio den bon direccion. Acab a humilia su mes, loke sigur tabata algo hopi dificil pa un homber orguyoso y arogante haci. Pero di berdad el a arepenti? Na comparacion, wak e ehempel di Rey Manases, kende mas despues a haci pio cu Acab. Ora Jehova a castiga Manases, el a humilia su mes y a sclama na Jehova pa yudansa. Pero el a bay mas leu ainda. El a cambia su bida ora el a elimina e imagennan di dios falso cu el a traha, haci esfuerso pa sirbi Jehova y hasta encurasha su pueblo pa haci mescos. (2 Cronicanan 33:1-17) Nos por bisa mescos di Acab? Lamentablemente cu no.

Jehova a ripara cu Acab a expresa su tristeza abiertamente? Jehova a bisa Elias: “Bo ta mira con Acab a humilia su mes mi dilanti? Pasobra el a humilia su mes mi dilanti, lo mi no trece e maldad den su dianan, ma lo mi trece e maldad riba su cas den e dianan di su yiu homber.” (1 Reynan 21:29) Acaso Jehova a pordona Acab? No, pasobra ta solamente si el a arepenti di berdad, lo el a ricibi misericordia divino. (Ezekiel 33:14-16) Pero mirando cu Acab a mustra un cierto grado di duele, Jehova a demostra misericordia di acuerdo cu esey. Jehova lo a spaar Acab di e experencia horibel di mira destruccion di henter su famia.

Pero, esey no kiermen cu Jehova a cambia su huicio. Despues, Jehova a consulta cu su angelnan tocante e mihor manera pa nek Acab p’e bay den un bataya cu lo a caba cu su bida. Pronto despues, Jehova a ehecuta su sentencia riba Acab. Acab a ser herida den guera, y el a sangra muri den su garoshi. E relato ta agrega e detaye horibel aki: Ora nan a laba e garoshi real, algun cacho a bin lembe e sanger di rey. Loke Jehova a bisa Acab pa medio di Elias a cumpli dilanti di tur hende: “Na e luga caminda e cachonan a lembe e sanger di Nabot, e cachonan lo lembe bo sanger tambe.”—1 Reynan 21:19; 22:19-22, 34-38.

Pa Elias, Eliseo y tur otro sirbidor di Dios, e fin di Acab a laga nan compronde cu Jehova no a lubida e curashi y fe di Nabot. Tardi of trempan, e Dios di husticia semper ta duna castigo pa maldad. Y si tin un motibo pa mustra misericordia den su huicio, e no ta keda sin haci esey. (Numbernan 14:18) Esta un les poderoso esey tabata pa Elias, cu a persevera pa decadanan bou di mando di e rey malbado ey! Bo a yega di sufri pa motibo di inhusticia? Bo ta anhela pa mira Dios caba cu esnan cu ta causa esey? Wel, imita e fe di Elias. Hunto cu su fiel compañero Eliseo, el a sigui proclama e mensahenan di Dios y a persevera a pesar di inhusticia!