Nos tur ta pensa riba futuro. Nos ta puntra nos mes con lo para cu nos mes futuro y esun di nos sernan keri. Nos ta haci pregunta manera: ‘Mi yiunan lo biba den un mihor mundo? Un desaster natural lo destrui e mundo aki? Tin algo cu mi por haci aworaki pa mi por tin un mihor futuro?’ Si, di naturaleza nos ta desea trankilidad, siguridad y stabilidad. Si un hende sa kico lo pasa den futuro, e por prepara su mes pa esey.

Pues, ta con lo para cu bo futuro? Ken por sa esey? Algun pronostico cu profesionalnan a haci tocante futuro a cumpli, pero mayoria no. Pero hende ta bisa cu Dios si por profetisa exactamente loke lo sosode den futuro. Dios a bisa den su Palabra cu e “ta declara e fin for di principio, y for di temponan antiguo, cosnan cu no a wordo haci ainda.” (Isaias 46:10) Pero loke Dios a profetisa semper a cumpli?

Dicon nos mester ta interesa pa sa con exacto loke Dios a profetisa den antiguedad ta? Wel, si un meteorologo su pronostico di tempo tur dia ta exacto pa un periodo basta largo, casi sigur lo bo presta atencion na su pronostico di tempo pa mañan, no ta berdad? Mescos tambe, si bo haya sa cu loke Dios a profetisa a cumpli cu exactitud, siguramente lo bo ta interesa pa sa kico e ta profetisa tocante bo futuro.

DESTRUCCION DI UN STAD GRANDI:

Por ehempel, ta un cos masha sobresaliente si un persona profetisa cu exactitud cu un stad poderoso pa hopi siglo pronto lo ser destrui. Esey ta exactamente loke Dios a profetisa mediante un di su profetanan: destruccion di Ninive. (Sofonias 2:13-15) Kico historiadornan ta bisa? Den siglo 7 prome cu  Cristo, probablemente un 15 aña despues cu Dios a profetisa e destruccion di Ninive, e Babilonionan y e Medonan a ataca Ninive y derot’e. Fuera di esey, Dios a profetisa di antemano cu e lo haci “Ninive un lugá inhabitá, seku manera un desierto.” (BPK) Pero, esaki a cumpli cu exactitud? Si, maske e stad y e areanan residencial rond di dje a cubri un 518 kilometer cuadra, toch e conkistadornan no a conserva e stad pa nan mes beneficio. Al contrario, nan a destruye. Acaso un analista politico lo por a pronostica esey cu exactitud?

WESO DI HENDE LO KIMA:

Ta ken lo tin asina tanto curashi pa anuncia, 300 aña di antemano, nomber di un homber cu lo kima weso di hende riba un altar, ken lo ta antepasado di e homber ey y tambe nomber di e stad caminda e altar lo ta situa? No tin duda cu si e profecia interesante ey cumpli, e profeta ey lo bira famoso. Un vocero di Dios a anuncia cu “un yiu homber lo nace pa e cas di David, Josias ta su nomber” y cu e lo ‘kima weso di hende’ riba un altar den e stad Bet-el. (1 Reynan 13:1, 2) Mas o menos tres siglo despues, Rey Josias—kende su nomber no tabata comun den tempo di Bijbel—a bin for di e liña di descendencia di David. Si, net manera a ser profetisa, Josias “a manda saca e wesonan for di e grafnan y a kima nan riba e altar” na Bet-el. (2 Reynan 23:14-16) Bo ta kere cu un hende lo por a profetisa detayenan asina specifico sin e guia di un ser superior?

FIN DI UN IMPERIO:

Lo ta sumamente impresionante pa un hende predeci nomber di un homber, hopi tempo prome cu e nace, cu lo plania pa conkista un nacion poderoso y hasta indica ki strategia remarcabel e lo uza. Dios a profetisa cu un homber cu yama Ciro lo lansa un atake contra un nacion, cu e homber aki lo libra e Hudiunan for di sclavitud y cu lo e sostene renobacion di nan tempel santo. Ademas, Dios a profetisa cu Ciro su strategia di bataya lo encera cu Ciro lo seca e riunan y cu e portanan di e stad lo keda habri, loke na su turno, lo haci conkista di e stad mas facil. (Isaias 44:27–45:2) Con a bay cu tur e detayenan di  e profecianan aki? Nan a cumpli cu exactitud? Historiadornan ta di acuerdo cu Ciro a conkista e stad. Ciro su ehercito a desvia e awanan di Riu Eufrates di Babilonia y asina e riu a seca. Ki un hazaña espectacular! Ademas, e ehercito a drenta e stad via di e portanan cu a keda habri. Asina Ciro a libera e Hudiunan y a bisa nan cu nan por bay renoba nan tempel na Jerusalem. Esey no tabata algo comun pasobra Ciro no tabata un sirbidor di e Dios di e Hudiunan. (Esdras 1:1-3) Ta Dios so por a predeci e detayenan di e sucesonan historico ey cu a tuma luga.

Tur tres ehempel ta mustra cu loke Dios a profetisa a cumpli. No ta trata aki simplemente di algun excepcion. Ora e lider Hudiu Josue tabata papia cu e pueblo di Israel, el a bisa nan un cos cu nan tabata sa bon: “Boso sa di henter boso curason y di henter boso alma cu ni un palabra di tur e bon palabranan cu SEÑOR boso Dios a papia tocante di boso no a faya; tur a keda cumpli pa boso, ni un di nan no a faya.” (Josue 23:1, 2, 14) E pueblo ey no por a nenga cu tur e profecianan y promesanan di Dios a cumpli. Pero ta con Dios ta cumpli cu su promesanan? Tin un gran diferencia entre e manera cu Dios ta haci cos y e manera cu hende ta haci cos. Ta importante pa sa esey, pasobra Dios a profetisa algun cos maraviyoso tocante futuro cu sin duda lo tin efecto riba bo bida.

Hopi biaha hende ta pronostica algo basa riba investigacion cientifico, analisis di datonan y tendencia, y tin biaha hasta riba informacion di hende cu ta bisa cu nan tin conocemento sobrenatural. Ora hende caba di haci un pronostico, por lo general nan ta warda pa wak kico lo sosode.—Proverbionan 27:1.

Contrario cu hende, Dios si sa tur cos. E conoce naturaleza di hende. Pesey, Dios por mira di antemano exactamente con un hende of henter un nacion lo reacciona ora e ta desea esey. Pero no ta esey so Dios por haci. E por hasta influencia y cambia suceso, decision y tendencia pa logra e resultado desea. E ta bisa: “E palabra fo’i mi boka ... no ta bolbe serka Mi sin a logra su meta ... i alkansá e meta ku Mi a pone p’e.” (Isaias 55:11, BPK) Pues, den un sentido, algun di Dios su profecianan ta djis anuncia loke e ta bay haci den futuro. Y e ta percura pa tur loke e profetisa cumpli sigur.

Tin un fuente confiabel cu bo por acudi na dje pa haya sa kico lo pasa cu bo y cu bo sernan keri den futuro? Si bo haya sa di antemano cu tin un horcan na caminda, bo por tuma medida pa scapa bo bida, no ta berdad? Bo por haci mescos den caso di profecia di Bijbel. Dios a profetisa cu pronto cambionan grandi lo tuma luga rond mundo. (Mira e cuadro  “Loke Dios A Revela Tocante Futuro.”) E futuro aki ta full diferente for di loke e asina yama expertonan ta pronostica.

Den Bijbel tin hopi profecia cu ta bisa nos loke lo sosode cu humanidad den futuro, y nos por haya sa esey, pasobra Dios mes a bisa: “Fo’i kuminsamentu ya Mi ta anunsiá e fin ... T’Ami t’Esun ku ta bisa: ‘Mi desishon ta irevokabel; mi boluntat ta lei.’” (Isaias 46:10, BPK) Abo cu bo famia por tin un futuro briyante. Bo kier sa mas tocante e futuro ey? Pidi testigonan di Jehova pa mustra bo loke Bijbel ta bisa tocante sucesonan cu lo tuma luga den futuro. Testigonan di Jehova no ta spiritista; ni nan no ta pretende di tende stem di spirito; ni nan no tin poder special pa pronostica. Pero como cu nan ta studia Bijbel, nan por comparti cu bo tur e bon cosnan cu Dios lo haci den futuro.