Mi a nace y crece den un bario pober pafo di Roma. Bida tabata duro. Nunca mi no a conoce mi mama biologico y mi no tabata sali mucho bon cu mi tata. Mi a crece den un ambiente violento y mi mester a siña con pa sobrevivi.

Tempo mi tabatin dies aña, mi a cuminsa horta. Cu mi 12 aña mi a bay for di cas pa prome biaha. Na diferente ocasion mi tata mester a bay busca mi na warda di polis y hiba mi cas bek. Mi tabata pleita constantemente cu otro hende pasobra mi tabata violento y rabia cu tur hende. Tempo mi tabatin 14 aña mi a bay for di cas sin bin bek nunca mas. Mi a cuminsa uza droga y mi tabata biba riba caya. Como cu mi no tabatin niun caminda pa drumi, mi tabata kibra auto di hende pa drumi aden te den oranan di mainta. Despues mi tabata busca un fontein pa hawa curpa.

Mi a bira experto den hortamento. Tur cos mi tabata haci: for di ranca tas for di hende te na horta den apartamento y cas parti anochi. Mi a haya asina un mal reputacion te cu un gang notorio a busca mi pa mi join nan; asina mi a bay den grandi y awor ta banco mi tabata asalta. Debi na mi caracter agresivo, mi a bira un miembro respeta di e gang. Semper mi tabata cana arma; de echo, mi tabata hasta drumi cu mi revolver bou di mi cusinchi. Violencia, droga, hortamento, palabra malo y inmoralidad a bira mi estilo di bida. Semper polis tabata busca mi. Nan a aresta mi varios biaha y mi a cay cera diferente biaha.

Un di e biahanan cu mi a sali for di prizon, mi a bay bishita un di mi tantanan. Sin cu mi tabata sa, mi tanta y dos di mi primonan a bira testigo di Jehova. Nan a invita mi pa asisti na un reunion di e Testigonan. Pa curiosidad mi a dicidi di bay cu nan. Ora nos a yega na e Salon di Reino, mi a insisti pa sinta cerca di e  porta pa mi por tabatin bista riba ken tabata drenta y sali. Di mes mi tabata arma.

E reunion ey a cambia mi bida. Mi ta corda con mi tabata pensa cu mi mester ta riba un otro planeta. E hendenan presente a cuminda mi na un manera amabel y cu un sonrisa riba nan cara. Te ainda mi ta corda cla cla e mirada cariñoso y franco di e Testigonan. Esaki sigur tabata completamente diferente for di e mundo cu ami a custumbra cu ne!

Mi a cuminsa studia Bijbel cu e testigonan di Jehova. Mas mi a siña, mas mi a bin compronde cu mi mester a cambia mi estilo di bida completamente. E palabranan di Proverbionan 13:20 a dal mi duro: “Esun cu anda cu hende sabi lo ta sabi, ma un compañero di hende bobo lo sufri daño.” Mi a realisa cu mi mester a distancia mi mes for di e gang. No tabata facil, pero cu yudansa di Jehova mi a logra.

Tambe mi a drecha mi aspecto fisico. Cu hopi esfuerso mi a stop di huma sigaria y uza droga. Mi a corta mi cabey largo, mi a deshaci di mi renchi di horea y mi a stop di papia palabra malo. Pa prome biaha den mi bida, mi por a controla mi accionnan.

Nunca mi no tabata gusta lesa y studia; pesey tabata un gran desafio pa mi concentra y dedica mi mes na estudio di Bijbel. Pero, segun cu mi tabata haci mi esfuerso, tiki tiki mi a cuminsa stima Jehova. Algo a cuminsa cambia den mi; mi consenshi a cuminsa remorde. Continuamente mi tabatin pensamentonan negativo di mi mes, y mi tabata duda cu Jehova lo por a pordona mi un dia pa tur e cosnan malo cu mi a haci. Den e momentonan ey mi a haya hopi consuelo ora mi tabata lesa tocante con Jehova a pordona Rey David despues cu el a comete picanan grave.—2 Samuel 11:1–12:13.

Un otro reto pa mi tabata di comparti mi fe cu otro hende den e trabou di cas pa cas. (Mateo 28:19, 20) Mi tabatin miedo di topa un hende cu mi a yega di haci daño na dje den pasado. Pero tiki tiki mi a logra vence mi miedo. Mi a cuminsa haya un gran satisfaccion den yuda otro hende siña tocante nos maraviyoso Tata celestial, kende ta pordona den un gran manera.

E echo cu mi a conoce Jehova a salba mi bida! Mayoria di mi amigonan di antes ta morto of den prizon. Pero, ami si tin un bida yen di satisfaccion y un futuro briyante mi dilanti. Mi a siña pa ta humilde, obediente y pa controla mi caracter violento. Como resultado, mi tin un mihor relacion cu e hendenan rond di mi. Mi ta felizmente casa cu un bunita muher cu yama Carmen. Hunto nos tin e goso grandi di yuda otro hende siña tocante Bijbel.

Ahn! Anto awor mi ta gana mi pan di cada dia na un manera honrado. En bes di horta banco, mi ta haci nan limpi!