Bo yiunan por siña stima Dios solamente ora nan ta sigur cu e ta existi y cu e ta stima nan. Pa nan stima Dios, nan mester siña conoc’e. (1 Juan 4:8) Por ehempel, nan mester sa dicon Dios a crea hende, dicon e ta permiti hende sufri y kico e lo haci pa nos den futuro.—Lesa Filipensenan 1:9.

Pa bo yiunan stima Dios, nan mester mira cu abo tambe ta stim’e, ya cu casi sigur nan lo sigui bo ehempel.—Lesa Deuteronomio 6:5-7; Proverbionan 22:6.

E Palabra di Dios tin hopi poder. (Hebreonan 4:12) Pues, yuda bo yiunan compronde e siñansanan basico di Bijbel. Pa Hesus por a touch curason di su oyentenan, el a haci nan pregunta, scucha nan contesta y splica nan loke nan no tabata compronde di e Scritura. Abo tambe por imita Hesus su manera di siña pa touch e curason di bo yiunan.—Lesa Lucas 24:15-19, 27, 32.

Ademas, den Bijbel tin relatonan cu ta mustra con Jehova a trata hende y esaki por yuda bo yiunan conoce Dios mihor y stim’e. Riba e website www.mt1130.com/jw-paa bo ta haya publicacionnan cu ta specialmente pa yuda bo yiunan siña stima Jehova.—Lesa 2 Timoteo 3:16.