KICO un homber mester haci pa su esposa por ta feliz? Hopi hende a lanta cu e idea cu e esposo tin cu percura pa su esposa tin un grado di siguridad. Y pa nan, e manera principal cu e esposo tin cu haci esaki ta treciendo suficiente placa cas. Pero si esey ta asina, dicon tin algun hende muher, financieramente bon para, cu toch no ta sinti nan feliz? Tin di nan tin hasta miedo di nan esposo. Rosa, un señora di Spaña, a bisa lo siguiente tocante su esposo: “Mi casa tabata masha cariñoso cu otro hende, pero ami si e tabata trata malo na cas.” Un señora di Nigeria cu yama Joy ta admiti: “Ora mi no tabata di acuerdo cu mi casa, e tabata bisa mi: ‘Bo tin cu haci loke mi bisa, pasobra mi ta bo esposo.’”

Con un homber por cumpli cu su papel como esposo na un manera amoroso? Kico un esposo mester haci pa su esposa sinti cu nan cas ta un luga di “sosiego”, caminda e por sintie sigur?—Ruth 1:9.

Aunke tanto esposo como esposa ta igual den bista di Dios, Bijbel ta bisa cu cada un tin su papel den famia. Romanonan 7:2 ta mustra cu e esposa mester respeta “ley di su esposo.” Mescos cu tur compania tin un persona na cabes cu ta dirigi, asina ta e caso tambe cu famia. Y Dios a nombra e esposo como cabes di e esposa. (1 Corintionan 11:3) Pues, un esposo mester dirigi su famia.

Awor esposo, con bo mester cumpli cu e papel cu Dios a duna bo? Bijbel ta bisa: “Sigui stima boso esposa, mescos cu Cristo tambe a stima e congregacion.” (Efesionan 5:25) Si, aunke Hesus no a casa nunca, su ehempel por yuda bo ser un bon esposo. Laga nos wak con.

Hesus a haci esfuerso pa consola y yuda hende. Hesus a haci un promesa na tur hende cu tabata afligi y carga pa motibo di problema personal. El a bisa nan: “Bin cerca mi, ... y lo mi refresca boso.” (Mateo 11:28, 29) Na varios ocasion el a cura hende y a yuda nan hala cerca Jehova. Pues, no ta nada straño cu hopi hende tabata gusta di ta cerca Hesus.

Esposo, con bo por sigui e ehempel di Hesus? Wel, bo tin cu busca maneranan pa yuda bo casa. Tin esposa ta sinti  mescos cu Rosa, kende a lamenta: “Mi casa tabata trata mi manera cria.” En cambio, un homber cu yama Kweku, kende tin un matrimonio feliz, a bisa: “Semper mi ta puntra mi casa cu kico mi por yud’e. Mi ta stima mi casa, pesey, hopi biaha, mi ta tuma iniciativa pa yud’e cu su trabounan di cas.”

Hesus a tene cuenta cu otro hende y tabata un homber cu comprension. Tabatin un señora cu durante 12 aña largo a sufri di un problema grave di salud. Ora el a tende cu Hesus tabatin poder pa haci milager, “e tabata blo bisa den su mes: ‘Si mi djis mishi cu su paña, mi ta bira bon.’” Y e tabatin rason. El a yega cerca di Hesus, mishi cu fraña di su paña y di biaha el a ser cura. Algun di e hendenan cu tabata presente y cu a mira loke a pasa kisas por a pensa cu e señora aki no a haci bon. Pero Hesus por a mira y compronde cu e señora tabata desespera. * Cu cariño Hesus a bis’e: “Mi yiu, ... sea salud y cu e maleza penoso aki no molestia bo mas.” Pues, Hesus no a zundra e señora ni lag’e pasa berguensa. Di e manera ey, Hesus a demostra cu e tabata un homber cu comprension.—Marco 5:25-34.

 Esposo, con bo por sigui e ehempel di Hesus? Tene extra consideracion y tambe pasenshi cu bo esposa ora e no ta sinti su mes mucho bon. Purba di pone bo mes den su sapato y compronde dicon e ta reacciona na un cierto manera. Ricardo, por ehempel, ta splica: “Ora mi ripara na mi casa cu awe no ta su dia, mi ta haci mi best pa no bisa algo cu por lag’e sinti pio.”

Hesus a comunica cu su discipelnan. Pa Hesus, su discipelnan tabata su amigonan, y e tabata combersa hopi cu nan. El a bisa nan: “Mi a laga boso sa tur cos cu mi a tende di mi Tata.” (Juan 15:15) Ta berdad cu tabatin momentonan cu Hesus tabata kier ta su so pa e por a pensa y haci oracion. Pero, hopi biaha, e tabata expresa su sintimentonan di mas profundo na su discipelnan. Por ehempel, e anochi prome cu el a ser mata comosifuera e tabata un criminal, cu tur frankesa el a bisa su discipelnan cu e tabata “masha tristo mes.” (Mateo 26:38) Hesus nunca a stop di papia cu su amigonan, ni ora nan a haci cosnan cu a desapunt’e.—Mateo 26:40, 41.

Esposo, con bo por sigui e ehempel di Hesus? Papia cu bo esposa y bis’e loke bo ta pensa y sinti. Tin hende muher ta keha cu nan casa ta cla pa papia na grandi cu otro hende pero ora nan yega cas nan no ta papia nada. For di e palabranan di Ana nos ta mira con bon un esposa ta sintie ora su esposo ta expresa su mes. Ana a bisa: “Mi ta sinti cu di berdad e ta stima mi y cu nos ta mas uni.”

Esposo, nunca keda sin papia cu bo casa como un manera pa bo castig’e. Un esposa ta corda: “Ora cu mi casa tabata rabia cu mi, e tabata keda dianan sin papia cu mi. E tabata laga mi sinti mi culpabel y humilia.” Edwin, en cambio, ta purba di imita Hesus. El a bisa: “Ora mi ta rabia, mi no ta contesta mesora. Mi ta wak ki ora ta e mihor momento pa ami cu mi casa papia riba e problema y solucion’e.”

Joy, kende e articulo aki a menciona na cuminsamento, a mira con su esposo a cambia for di dia cu el a cuminsa studia Bijbel cu testigonan di Jehova. Joy ta conta: “El a bira un mihor esposo. E ta haci esfuerso pa ta mas amoroso y ta imita e ehempel di Hesus.” Si, Bijbel a yuda miyones di pareha casa. Bo tambe kier beneficia di loke Bijbel ta siña? Bo por pidi un testigo di Jehova un curso di Bijbel gratis.