Mi a crece den un bario pober den e stad di Montreal. Nos ta ocho ruman y ami ta esun di mas chikito. Tempo mi tabatin apenas seis luna, mi tata a fayece y a laga mi mama cu tur responsabilidad di cas.

For di tempo mi tabata mucha, mi bida di tur dia tabata draai rond di droga, wega di placa, violencia y anda cu criminal. Cu dies aña, mi a cuminsa haci respondi pa prostituta y hende cu ilegalmente tabata fia otronan placa cu interes halto. Mi tabata gaña hopi, y mi tabata gusta manipula y estafa hende na tur manera posibel. Esey tabata manera un droga pa mi.

Cu mi 14 aña, ya caba mi tabatin hopi astucia. Por ehempel, mi tabata cumpra un cantidad grandi di holoshi, armband y renchi pasa den awa di oro. Mi tabata graba “14 karaat” riba nan pa haci comosifuera nan ta di oro y bende nan riba caya y den luga di parkeer di shopping mall. Asina facil mi tabata gana boshi placa. Un biaha mi a gana 10.000 dollar Canades riba un dia.

Tempo cu mi tabatin 15 aña, nan a kita mi for di scol reformatorio y mi no tabatin camind’i bay. Mi tabata drumi riba caya, den parke of cerca algun amigo cu a laga mi keda na nan cas.

Debi cu mi tabata estafa hende, cada bes polis tabata interoga mi. Pero nunca mi no a bay cera pasobra mi no tabata bende mercancia horta. Pero mi a haya mi ta paga boetnan halto pa fraude, estafa y bendemento di mercancia sin vergunning. Sin ningun clase di miedo, mi tabata hasta cobra esnan cu tabata debe e hendenan cu tabata fia otronan placa cu interes halto. Hopi biaha mi tabata cana arma pasobra e trabou ey tabata peligroso. Tambe mi a yega di traha den crimen organisa.

Dia mi a tende di Bijbel pa prome biaha, mi tabatin 17 aña. Mi tabata biba cu mi mucha muher ora cu el a cuminsa studia Bijbel cu testigonan di Jehova.  Pero, mi no tabata di acuerdo cu e normanan moral di Bijbel. Pesey mi a bay lag’e y mi a bay biba hunto cu un otro mucha muher cu mi tabata sali cu ne.

E momento decisivo a yega ora cu e di dos mucha muher aki tambe a cuminsa studia Bijbel cu testigonan di Jehova. El a haci algun cambio den su bida, y mi a keda impresiona cu su caracter a bira mas suave y cu e tabatin mas pasenshi. Un dia mi a haya invitacion pa bishita e Salon di Reino di testigonan di Jehova, anto mi a bay. Eynan mi a topa cu hende amabel y decente cu a duna mi un caluroso bonbini. Esta un contraste cu e mundo cu mi tabata biba aden! Mi famia no tabata worry mucho cu mi y hasta tempo mi tabata mucha mi no tabata haya cariño. Pues e cariño cu mi a haya cerca e testigonan di Jehova tabata net loke mi tabata anhela p’e. Ora cu nan a ofrece mi un curso di Bijbel, mi a acepta mesora.

Loke mi a siña di Bijbel probablemente a scapa mi bida. Wega di placa a hinca mi den un debe di mas cu 50.000 dollar, y pesey ami cu dos otro ladron a plania pa horta basta placa. Pero mi ta hopi contento cu mi no a join nan, ya cu e dos ladronnan si a sigui cu e plan, y como resultado, un di nan a bay cera y e otro a ser asesina.

Segun cu mi a sigui cu mi curso di Bijbel, mi a mira cu mi mester a haci hopi cambio den mi bida. Por ehempel, mi a siña cu Bijbel ta bisa na 1 Corintionan 6:10 cu “ni ladron, ni hende golos, ni burache, ni hende cu ta cana zundra, ni hende cu ta chantahia otronan lo no ricibi e Reino di Dios.” Ora mi a lesa e versiculo ey, mi wowonan a yena cu awa pasobra mi a ripara con grave mi situacion tabata. Mi a realisa cu mi mester a cambia mi bida por completo. (Romanonan 12:2) Mi tabata violento y agresivo, y henter mi bida tabata basa riba mentira.

Pero den mi curso di Bijbel mi a siña tambe cu Jehova ta misericordioso y cla pa pordona. (Isaias 1:18) Mi a haci hopi oracion pa roga Jehova pa yuda mi cambia mi bida. Cu yudansa di Jehova, poco poco mi a logra cambia mi personalidad. Un paso importante cu mi a dal tabata ora cu ami cu mi mucha muher a casa.

Cu 24 aña di edad, mi tabata casa y tabatin tres yiu caba. Pues, awor mi mester a busca un trabou honesto. Pero mi no tabatin hopi scol ni experencia di trabou. Pesey mi a bolbe haci oracion ferviente na Jehova y a bay busca un trabou. Na e entrevistanan mi tabata bisa e doñonan di trabou cu mi kier a cambia mi bida y gana mi pan na un manera honesto. Tin biaha mi tabata hasta bisa nan cu mi tabata sigui un curso di Bijbel y cu mi kier a bira un mihor ciudadano. Hopi di nan a nenga di duna mi trabou. Finalmente, despues cu mi a papia abiertamente di mi pasado turbulento na un otro entrevista, e persona cu a entrevista mi a bisa mi: “Mi no sa dicon pero tin algo ta bisa mi cu mi mester duna bo e trabou.” Mi ta sigur cu esey tabata e contesta pa mi oracionnan. Cu tempo, ami cu mi casa a batisa como testigo di Jehova.

Awe mi ta na bida debi cu mi ta aplica principio di Bijbel y ta biba na harmonia cu nan. Mi tin un bida di famia feliz y mi ta biba cu un consenshi limpi pasobra mi ta convenci cu Jehova a pordona mi.

Mi tin 14 aña caba ta dedica un promedio di 70 ora pa luna na predica e bon noticia y yuda otro hende siña tocante Bijbel. Y recientemente mi casa a join mi. Anto durante e ultimo 30 añanan, mi tabatin e goso di yuda 22 di mi coleganan di trabou cuminsa sirbi Jehova. Te ainda mi ta bay shopping mall, pero no pa estafa hende manera antes. Hopi biaha cu mi bay mi ta probecha papia cu otro hende tocante e speransa di biba den un futuro mundo nobo caminda hende no ta estafa otro mas.—Salmo 37:10, 11.