Mi a lanta na Los Angeles, California, den diferente bario bon conoci pa gang y droga. Ami ta e di dos di e seis yiunan di mi mayornan.

Mi mama a lanta nos como evangelista. Pero, ora mi tabata teenager mi a hiba un bida dobel. Riba diadomingo mi tabata canta den koor y durante e resto di siman mi tabata fiesta, droga y comete inmoralidad sexual.

Mi tabata rabia masha lihe y tabata agresivo. Ora mi tabata bringa, mi tabata uza cualkier cos cu mi haya den mi caminda como arma. Loke mi a siña na iglesia no a yuda mi. Mi lema tabata: “Venganza ta di Señor y e ta uza ami pa tuma venganza.” Durante e decada di 1960, mi tabata bay scol secundario. E tempo ey e grupo politico Black Panthers tabatin un influencia grandi riba mi. Nan tabata bon conoci pa e echo cu nan tabata bringa pa derechonan civil na un manera agresivo. Mi a join un asociacion di studiante cu tabata bringa pa derechonan civil. Nos a organisa varios protesta y cada biaha cu nos a protesta, nan mester a cera e scol temporalmente.

Mi tabata sinti cu e protestanan aki no tabata suficiente pa mi saca tur mi rabia. Pesey mi a cuminsa comete crimen motiva pa odio. Por ehempel, tin biaha ami cu mi amigonan tabata wak peliculanan tocante e esclavonan Africano cu tabata sufri na Merca. E inhusticianan ey cu nos a mira a pone nos haya asina hopi rabia cu nos a cuminsa ataca hobennan blanco den e cinema ey. Despues nos a bay na e barionan di hende blanco pa haya mas hende pa bati.

Pa ora mi tabatin rond di 20 aña, ami cu mi rumannan a comete hopi crimen violento caba, y nos a haya problema cu autoridad. Un di mi rumannan mas chikito tabata miembro di un gang notorio, y ami tabata asocia cu nan. Mi bida tabata bay di malo pa pio.

E mayornan di un amigo di mi tabata testigo di Jehova. Nan a invita mi pa asisti na un di nan reunionnan, y mi a bay. For di principio, mi a ripara cu e Testigonan tabata hopi diferente. Tur hende tabatin nan Bijbel y nan tabata uz’e durante reunion. Hasta hobennan tabata duna discurso. Mi a keda impresiona ora mi a haya sa cu Dios su nomber ta Jehova y cu nan tabata uza e nomber aki. (Revelacion 4:11) E congregacion  tabata consisti di hende di diferente nacionalidad, pero toch no tabatin division racial.

Na prome instante, mi no kier a studia Bijbel cu testigonan di Jehova, pero mi tabata gusta nan reunionnan. Un anochi, ora mi tabata na un di e reunionnan ey, mi amigonan a bay un concierto. Eynan nan a bati un hoben pasobra e no kier a duna nan su jacket di cuero, y nan a mat’e. E siguiente dia, nan a gaba tocante loke nan a haci. Ora nan tabata den corte, tabata bisto cu nan no a mira e seriedad di nan accion. Mayoria di nan a haya bida largo den prizon. Ta mas cu claro cu mi tabata hopi contento cu mi no tabata cu nan e anochi ey. Mi tabata determina pa cambia mi bida y cuminsa studia Bijbel.

Como cu mi a lanta den un ambiente caminda tabatin asina hopi prehuicio racial, mi a keda asombra di loke mi a mira entre e Testigonan. Por ehempel, ora un Testigo color cla mester a bay biaha, el a laga su yiunan cerca un famia color scur. Tambe tabatin un hoben color scur cu tabatin mester di un luga di biba, y un famia color cla a tum’e den nan cas. Esey a convence mi cu testigonan di Jehova ta biba na harmonia cu e palabranan di Hesus cu tin na Juan 13:35: “Na esaki tur hende lo sa cu boso ta mi discipelnan, esta, si boso ta stima otro.” Mi tabata sa cu mi a haya un berdadero hermandad.

Mi estudio di Bijbel a pone mi realisa cu mi mester a cambia mi manera di pensa pa asina mi por a stop di actua na un manera violento y acepta tambe cu esaki ta e mihor manera di biba. (Romanonan 12:2) Pocopoco mi a haci progreso. Mi a batisa na januari 1974 y mi a bira un testigo di Jehova.

Pero, hasta despues cu mi a batisa, mi mester a sigui traha riba mi mal caracter. Por ehempel, un biaha ora nos tabata traha di cas pa cas, mi a core tras di un ladron cu a caba di horta mi radio di auto. Ora cu mi tabata casi yeg’e, el a laga e radio cay y a core bay. Despues mi a conta esnan cu tabata hunto cu mi con mi a haya mi radio bek, y un anciano den e grupo a puntra mi: “Stephen, kico lo bo a haci si bo a alcans’e?” E pregunta ey a pone mi pensa y a motiva mi pa sigui traha riba mi caracter.

Na october 1974 mi a cuminsa predica full-time, dedicando 100 ora pa luna na siña hende tocante Bijbel. Despues, mi tabatin e privilegio di traha como boluntario na e oficina principal di testigonan di Jehova na Brooklyn, New York. Na 1978, mi a bolbe Los Angeles pa cuida mi mama cu tabata malo. Dos aña despues, mi a casa cu Aarhonda. Mi esposa tabata un gran sosten pa mi durante e tempo cu nos tabata cuida mi mama prome cu el a muri. Cu tempo, ami cu Aarhonda a bay Scol Biblico di Galaad di Watchtower, y despues nos a haya asignacion pa sirbi como misionero na Panama.

Desde cu mi a batisa, mi a enfrenta varios situacion cu por a pone mi reacciona hopi malo. Pero mi a siña cu ora un hende ta purba di provoca mi, mi tin cu cana bay of purba di calma e situacion na un otro manera. Hopi hende, incluyendo mi esposa, a elogia mi pa e manera cu mi a trata cu e situacionnan aki. Hasta mi mes a keda sorprendi. Si no ta pa e poder cu Bijbel tin pa transforma hende, lo mi no por a logra haci e cambionan aki.—Hebreonan 4:12.

Bijbel a duna mi bida proposito y a siña mi con pa evita pleito y confrontacion. Awor mi no ta bringa cu hende mas; mi ta yuda nan spiritualmente. Figura bo, m’a hasta studia Bijbel cu un persona cu mi tabata considera mi enemigo tempo mi tabata bay scol! Despues cu el a batisa, nos tabata compañero di camber pa un tempo. Te awe nos a keda bon amigo. En total, ami cu mi casa a yuda mas cu 80 hende bira testigo di Jehova.

Mi ta sumamente agradecido na Jehova cu el a duna mi un bida yen di proposito, felicidad y un berdadero hermandad.