E siguiente aña, mi a cuminsa hunga den pelicula y varios biaha mi tabatin e rol principal. Reporteronan kier a haya sa mi storia, fotografonan kier a saca mi potret y mi tabata haya invitacion pa ta presente ora tin un estreno di pelicula, ora di corta sinta y na comementonan. Semper mi tabata e centro di atencion.

Pero pocopoco mi a ripara cu tur e cosnan aki no tabata dje dushi ey manera mi a imagina. Mayoria di biaha mi tabata hunga den peliculanan di accion, y esey tabata peligroso, pasobra no ta semper actornan na Hong Kong tabatin un persona pa hunga na nan luga den e escenanan peligroso manera ta e caso na Hollywood. Pesey mi mes mester a hunga den tur e escenanan peligroso, manera pasa cu un brommer over di un auto. Hopi pelicula cu mi a hunga aden ta inmoral y violento, y algun di nan tin demonismo.

Na 1995, mi a casa cu un productor di cine. Aunke un hende por pensa cu mi tabatin tur cos pa haci mi feliz, es decir, fama, placa y un casa cu ta stima mi, toch mi tabata tristo y deprimi. Pesey mi a dicidi di stop di hunga den pelicula.

Mi a cuminsa pensa hopi riba e fe cu mi tabatin ora mi tabata mucha. E tempo ey, tur diasabra ami cu mi ruman muher tabata bay bishita un famia testigo di Jehova. E tata, Joe McGrath, tabata studia Bijbel cu nos y su tres yiu muhernan. Nan tabata un famia bondadoso y amoroso, y Mo Joe, manera nos tabata yam’e, tabata trata su esposa y yiunan cu respet. Tambe mi tabata gusta bay e reunionnan cristian cu nan. Tin biaha nos tabata bay asambleanan grandi. E tempo ey mi tabata feliz. Y mi tabata sinti safe cu e Testigonan.

En cambio, cosnan hopi malo tabata pasa na mi cas. E cosnan cu mi tata tabata haci a causa mi mama hopi dolor, y esey a pone mi mama bira deprimi. Ora cu mi  tabatin mas o menos dies aña, Mama a stop di asocia cu testigonan di Jehova. Mi a sigui sirbi Dios si, pero no cu henter mi curason. Mi a batisa cu 17 aña, pero un poco tempo despues mi a cuminsa haci cosnan cu no ta pas pa un cristian, y como consecuencia mi no por tabata un testigo di Jehova mas.

Un poco tempo despues cu mi a casa, dos representante di e congregacion di testigonan di Jehova cu ta keda cerca di mi cas a bishita mi. Nan a splica mi con mi por bolbe cerca Jehova, anto nan a haci areglo pa un misionero cu yama Cindy yuda mi. E tempo ey, casi mi no tabata kere den nada mas, pesey mi a pidi Cindy pa duna mi prueba convencente cu Bijbel realmente ta e Palabra di Dios. El a mustra mi algun profecia di Bijbel cu a haya nan cumplimento. Gradualmente nos a bira bon amiga, y el a puntra mi si mi kier pa e repasa algun siñansa basico di Bijbel cu mi. Mi a acepta, y pa prome biaha mi a compronde cu Jehova ta un Dios di amor cu kier pa mi ta feliz.

Ora mi a cuminsa bay e reunionnan cristian atrobe, mi a ripara cu mi ta gusta e asociacion cu e Testigonan mas cu e asociacion cu e hendenan cu mi tabata traha cu ne ora mi tabata hunga den pelicula. Pero loke mi a pasa aden ora mi tabata mucha a pone mi sinti cu mi no por confia ningun hende. Ademas, mi no tabata gusta e persona cu mi a bira. Un miembro di e congregacion a mustra mi for di Bijbel con mi por trata cu e problemanan emocional ey, y tambe mi a siña con pa haya berdadero amigo.

Na 1997, ami cu mi esposo a muda bay Hollywood, California. Eynan mi a cuminsa dedica mas tempo na yuda hende beneficia di loke Bijbel ta siña. E trabou ey ta duna mi mas satisfaccion cu tur e fama y rikesa cu mi a haya ora mi tabata hunga den pelicula. Por ehempel, na 2002, mi a topa cu Cheri, un hende cu mi tabata conoce na Hong Kong. Ami y Cheri a experencia hopi cos similar. E tabata Miss Hong Kong e aña prome cu mi. Anto ora mi a sali Miss Hong Kong, el a corona mi. E tambe a bira un actriz y despues el a bira un productor di pelicula, y el a traha cu directornan famoso. Y mescos cu mi, e tambe a muda bay Hollywood.

Mi a haya hopi duele di Cheri ora mi a haya sa cu el a perde su comprometido, kende a haya un atake di curason. Su religion budista no a dun’e ningun consuelo. Mescos cu mi, e tabata famoso y hopi hende tabata envidi’e. Pero toch e tabata tristo y no tabata confia ningun hende. Mi a cuminsa papia cu ne tocante Bijbel, pero su creencianan budista a pone cu tabata dificil pa e compronde.

Un dia, na aña 2003, Cheri a yama mi for di Vancouver, Canada, caminda e tabata graba un pelicula. Cu hopi entusiasmo, el a conta mi cu e tabata coriendo den su auto y mientras cu e tabata admira e paisahe, diripiente el a cuminsa haci oracion na bos halto: “Bisa mi, Abo ta e Dios berdadero? Bo tin un nomber?” Na e momento ey, el a pasa banda di un Salon di Reino y a mira e nomber Jehova. El a sinti cu Dios a contesta su oracion di e manera ey, y e kier a tuma contacto cu testigonan di Jehova mas pronto posibel. Mi a yud’e cu esey, y dentro di un par  di dia el a cuminsa asisti na un congregacion di habla Chines na Vancouver.

Despues Cheri a bisa mi: “E hendenan aki ta echt interesa den mi. Mi por bisa nan con mi ta sinti.” Mi a keda hopi contento di tende esey, pasobra tempo cu Cheri tabata traha den e industria cinematografico e no tabatin amigo. Cheri a sigui bay reunion. Pero na 2005 el a firma un contract pa produci dos pelicula na China, y pesey e mester a bay biba na Hong Kong bek. Felizmente, na 2006, Cheri a dedica su bida na Jehova y a batisa na un asamblea di testigonan di Jehova na Hong Kong. Maske e tabata kier a haci mas pa Jehova, tabata dificil pa e haci esey pasobra su trabou den e industria cinematografico tabata exigi hopi di dje. Pesey e tabata sintie hopi tristo.

Na 2009, Cheri su circunstancia den bida a cambia door cu el a dicidi di laga e industria cinematografico pa asina e por haci mas pa Jehova. El a haya hopi amigo den e congregacion cristian. Y e ta experencia e goso di predica e bon noticia di e Reino full-time y yuda hende haya un mihor bida.—Mateo 24:14.

Despues Cheri a dicidi di siña e idioma Nepales pa yuda e grupo di Testigonan di habla Nepales na Hong Kong. Mi ta kere cu ta bon pa mi splica cu hopi biaha nan ta ignora of hasta desprecia mayoria di hende di Nepal cu ta biba na Hong Kong como cu nan ta papia masha poco Ingles of Chines y pa motibo di nan cultura. Cheri a bisa mi cu e tin hopi goso den yuda e hendenan aki compronde Bijbel. Por ehempel, un dia ora e tabata traha di cas pa cas, el a topa cu un señora di Nepal cu tabata sa masha poco tocante Hesus y nada tocante e Dios berdadero, Jehova. Cheri a mustr’e for di Bijbel cu Hesus a haci oracion na su Tata den cielo. Ora e señora a haya sa cu e por haci oracion na e Dios berdadero kende su nomber ta Jehova, el a acepta e bon noticia cu henter su curason. Un poco tempo despues su esposo y yiu muher tambe a cuminsa studia Bijbel.—Revelacion 4:11; Lucas 22:41, 42.

Ora mi a mira con hopi Cheri tabata disfruta di e trabou di predica full-time, mi a puntra mi mes: Kico ta stroba ami di haci loke e ta haciendo? Pa e tempo ey, mi tambe tabata bibando na Hong Kong atrobe. Mi a dicidi di haci algun cambio pa mi por haci mas pa yuda hende haya sa kico Bijbel ta siña. Mi a ripara cu ora mi scucha hende y yuda nan compronde e Palabra di Dios, esey ta haci mi realmente feliz.

Por ehempel, mi a studia Bijbel cu un señora di Vietnam cu tur ora tabata tristo y hopi biaha tabata yora. Awor e tin un punto di bista positivo di bida y e tin bon amigo den e congregacion.

Tanto ami como Cheri a haya algo mihor cu fama. Tempo nos a traha den e industria cinematografico, nos a haya fama y tabata hopi emocionante pa haci e trabou ey. Pero nos ta haya hopi mas satisfaccion ora nos ta siña hende tocante Jehova Dios, pasobra nos sa cu nos ta glorific’e. Nos a mira personalmente cu Hesus su palabranan ta berdad: “Tin mas felicidad den duna cu den ricibi.”—Echonan 20:35.