“Sin tolerancia no por tin paz.”—Declaracion di Principio di Tolerancia cu UNESCO a adopta, 1995.

 Pero intolerancia por causa falta di respet y hasta odio. Ora hende tin e tipo di sintimentonan ey, nan por bisa cos cu ta mustra cu nan ta odia hende, nan por discrimina y hasta por bira violento.

 No ta tur hende tin e mesun opinion tocante kico tolerancia of mustra respet ta nifica. Tin ta pensa cu un hende tolerante mester bay di acuerdo cu tur loke otro hende ta haci. Pero otronan tin e mesun pensamento cu Bijbel. Nan ta respeta otro hende su derecho di scoge nan creencia y nan normanan aunke cu nan no ta di acuerdo cu esey.

 Di berdad Bijbel por yuda nos tolera otro den nos tempo?

Segun Bijbel, dicon nos mester ta tolerante?

 Bijbel ta mustra cu ta bon pa nos ta tolerante pasobra e ta bisa: “Laga tur hende mira ki rasonabel boso ta.” (Filipensenan 4:5) Bijbel ta anima nos pa mustra interes den otro hende, y pa trata nan na un manera amabel y husto. Pesey, esnan cu ta sigui e conseho aki lo no stroba otro hende di haci loke nan kier cu nan bida, maske nan mes no ta di acuerdo cu loke e otro hendenan aki ta pensa y haci.

 Toch Bijbel ta siña nos cu Dios kier pa nos comporta nos di cierto manera. Bijbel ta bisa: “Abo, hende traha di stof, Jehova ta bisa bo loke ta bon.” (Mikeas 6:8) Dios ta bisa nos den Bijbel kico nos mester haci si nos kier disfruta di e mihor bida posibel.—Isaias 48:17, 18.

 Pero Dios no a duna nos derecho di husga otro hende. Segun Bijbel, “ta un legislador y hues tin ... Ken [abo] ta, pa bo ta husga bo prohimo?” (Santiago 4:12) Dios ta duna cada un di nos libertad pa tuma nos mes decisionnan. Pero claro, nos ta keda responsabel pa nos decisionnan.—Deuteronomio 30:19.

Loke Bijbel ta bisa tocante respet

 Bijbel ta bisa cu nos mester “respetá tur hende.” (1 Pedro 2:17, Beibel na papiamentu koriente) Pues, tur hende cu dicidi di sigui e normanan di Bijbel lo trata tur hende cu respet, sea cual sea nan creencia of estilo di bida. (Lucas 6:31) Esaki no kiermen si cu esnan cu ta sigui Bijbel lo bay di acuerdo cu tur creencia of opinion cu otro hende tin ni cu nan lo apoya tur nan decisionnan. Pero esey lo no pone nan trata otro hende malo of cu falta di respet. Mas bien, nan lo haci nan best pa imita e manera cu Hesus a trata hende.

 Por ehempel, un biaha, Hesus a topa un señora cu tabatin un religion cu e no tabata di acuerdo cu ne. Ademas, e señora aki tabata biba cu un hende homber c’e no tabata casa cu ne. Esaki ta un estilo di bida cu Hesus tampoco no tabata di acuerdo cu ne. Toch, el a papia cu e señora aki cu respet.—Juan 4:9, 17-24.

 Mescos cu Hesus, cristiannan ta cla pa splica nan creencia na esnan cu kier scucha, pero, nan ta haci esey cu “respet profundo.” (1 Pedro 3:15) Bijbel ta bisa pa cristiannan no forsa hende pa acepta loke nan ta kere. E ta bisa cu un siguidor di Cristo “no tin nodo di pleita, pero e mester ta amabel cu tur hende”, incluyendo esnan cu tin un otro religion.—2 Timoteo 2:24.

Loke Bijbel ta bisa tocante odio

 Bijbel ta bisa pa nos “haci tur [nos] esfuerso pa ta na paz cu tur hende.” (Hebreonan 12:14) Esnan cu ta haci esfuerso pa ta na paz cu tur hende lo no odia otro hende. Y nan lo haci esfuerso pa ta pacifico, pero sin bay contra di nan propio principionan. (Mateo 5:9) Ademas, Bijbel ta anima cristiannan pa stima nan enemigo y pa nan ta amabel cu hende cu ta trata nan malo.—Mateo 5:44.

 Ta berdad si cu Bijbel ta bisa cu Dios ta “odia” of “detesta” ora hende ta haci cos cu ta rebaha of causa daño na otro hende. (Proverbionan 6:16-19, nota) Den e texto aki, Bijbel ta uza e palabra “odia” pa describi loke Dios ta detesta. Kico esey ta? E cosnan malo cu hende ta haci, y no e hende mes. Bijbel ta siña cu Dios ta cla pa pordona y yuda tur hende cu ta desea di cambia y di sigui su normanan.—Isaias 55:7.

Texto di Bijbel cu ta papia di tolerancia y respet

 Tito 3:2: “[Sea] rasonabel, demostrando pleno suavidad pa cu tur hende.”

 Mateo 7:12: “Tur loke boso kier pa hende haci cu boso, boso tambe mester haci cu nan.”

 Josue 24:15: “Scoge pa boso mes awe kende boso lo sirbi.” (Beibel Santu)

 Echonan 10:34: “Dios no ta haci distincion di persona.”

 Habacuk 1:12, 13: “[Dios] no ta tolera maldad.”

 Romanonan 12:19: “Laga luga pa e rabia di Dios; pasobra ta para skirbi: ‘Venganza ta di mi; ami lo paga bek, Jehova a ta bisa.’”

 Jehova Dios no a duna niun di nos derecho pa tuma venganza. Ya el a dicidi caba ki dia e lo haci husticia. Pa haya sa mas, lesa e articulo “¿Alguna vez se hará justicia en el mundo?”