Bo ta kere cu ta Dios a crea tur cos? Si ta asina, bo no ta e unico; hopi hende (hoben y adulto) ta kere esey. Pero, otronan ta bisa cu bida y e universo a yega na existencia pa medio di evolucion, sin yudansa di un “Ser Supremo.”

 Bo tabata sa? Hopi biaha tanto hende cu ta kere den evolucion como hende cu ta kere den creacion ta lihe pa bisa kico nan ta kere sin sa dicon nan ta kere esey.

•   Tin hende ta kere den creacion djis pasobra nan a siña esey na misa.

•   Hopi hende ta kere den evolucion djis pasobra nan a siña esey na scol.

 E serie di articulonan aki ta bay yuda bo fortalece bo fe den creacion y hacie mas facil pa bo splica otronan pakico bo ta kere den esey. Pero prome, puntra bo mes esaki:

 Dicon e pregunta ey ta importante? Pasobra Bijbel ta bisa cu nos mester uza nos mente, nos “capacidad di pensa.” (Romanonan 12:1) Esaki ta nifica cu nos fe den Dios no mester ta djis basa riba

•  emocion (Mi ta sinti cu mester tin algo mas)

•  influencia di otro hende (Hende rond di mi ta kere den Dios)

•  presion (Mi a lanta den un cas caminda mi mester a kere den Dios)

 Na luga di esey, bo mes mester ta convenci cu Dios ta existi y bo mester tin bon motibo pa kere esey.

 Kico ta convence abo cu Dios ta existi? E blachi di tarea “Pakico Mi Ta Kere Den Dios?” lo yuda bo haci bo fe mas fuerte. Ademas, e comentarionan di e siguiente hobennan por yuda bo.

 “Ora mi scucha mi docente splica con nos curpa ta hinca den otro, mi no ta duda niun rato so cu Dios ta existi. Cada parti di nos curpa tin su propio funcion, hasta e detayenan di mas chikito. Y hopi biaha e funcionnan aki ta tuma luga sin cu nos sa. En berdad e curpa humano ta hopi fascinante!”​—Teresa.

 “Ora mi mira edificionan halto, barco crucero of un auto, mi ta puntra mi mes: Ken por a traha tur e cosnan aki? Por ehempel, pa traha un auto mester di hende inteligente pasobra tur e componentenan chikito tin cu funciona bon pa asina henter e auto por traha bon. Pues, si un auto mester di un diseñador, ta mas cu claro cu hende tambe mester di un diseñador.”​—Richard.

 “Si e hendenan di mas inteligente a tuma cientos di aña pa compronde te hasta e fraccionnan di mas chikito di universo, con un hende por pensa anto cu e universo a bin na existencia sin un mente inteligente?”—Karen.

 “Mas mi a studia ciencia, menos real e idea di evolucion a bira. Por ehempel, mi a pensa tocante naturaleza y con precies tur cos ta hinca den otro y tambe mi a reflexiona riba e caracteristicanan cu ta diferencia un ser humano for di otro, manera e necesidad di sa ken nos ta, di unda nos a bin y unda nos ta bay. Evolucionistanan a purba di splica esaki cu un teoria cu ta basa riba comportacion di bestia, pero nan no a logra splica dicon ser humano ta asina diferente. Ami ta pensa cu bo mester di mas ‘fe’ pa kere den evolucion cu pa kere den un Creador.”​—Anthony.

 Kico si bo compañeronan di scol ta haci bofon di bo pasobra bo ta kere den algo cu bo no por mira? Kico si nan ta bisa cu ciencia a “proba” cu e siñansa di evolucion ta corecto?

 Pa cuminsa, bo mester ta convenci di loke bo ta kere. Bo no mester tin berguensa, y bo no mester laga nan intimida bo. (Romanonan 1:16) Pensa riba lo siguiente:

1.   Bo no ta bo so, tin hopi hende cu ainda ta kere den Dios. Tin hopi hende inteligente y bon educa cu ta kere den Dios. Por ehempel, tin cientifico cu ta kere cu Dios ta existi.

2.   Ora hende bisa cu nan no ta kere den Dios, loke tin bes nan kiermen ta cu nan no ta compronde Dios. En bes di busca prueba pa loke nan ta kere, nan ta haci preguntanan manera, “Si Dios ta existi, dicon e ta permiti sufrimento?” E tipo di rasonamento aki no ta defende e siñansa di evolucion, sino e ta mustra e sintimento di e persona, cu tin algo ta molesti’e.

3.   Tur ser humano tin un “necesidad spiritual.” (Mateo 5:3) Esaki ta encera un necesidad pa kere den Dios. Pues, si un persona ta bisa cu no tin un Dios, e, y no abo, tin e responsabilidad di splica dicon e ta pensa asina.​—Romanonan 1:18-20.

4.   Ta totalmente logico pa kere den Dios. Ta un echo cu bida no por a yega na existencia riba su mes. No tin niun prueba cu ta mustra cu bida por origina di un materia cu no tin bida.

 Awor, ora bo mester splica un hende pakico bo ta kere den Dios, con lo bo haci esey? Wak e siguiente ideanan.

 Si un hende bisa: “Ta hende bobo so ta kere den Dios.”

 Bo por bisa: “Bo no ta haya cu bo ta generalisa? Den un encuesta cu mas cu 1.600 profesor di ciencia di varios di e mihor universidadnan a haci, un tercer parti di nan a bisa cu nan no ta ateista of agnostico. a Lo bo yama e profesornan ey bobo djis pasobra nan ta kere den Dios?”

 Si un hende bisa: “Si Dios ta existi, dicon tin asina tanto sufrimento den mundo?”

 Bo por bisa: “Bo kiermen cu bo no ta compronde dicon Dios no ta actua? [Permiti e persona contesta] Loke a yuda ami compronde dicon Dios ta permiti tanto cos malo sosode, ta un estudio di Bijbel. Lo mi tin gana di mustra bo kico mi a siña. Kico bo ta pensa?”

 E siguiente articulo den e serie aki lo trata dicon e teoria di evolucion no ta duna nos un splicacion satisfactorio pa nos existencia.