Si. Tanto Bijbel como experencia di bida ta mustra cu Dios ta contesta oracion. Por ehempel, Bijbel ta bisa: “[Dios] lo cumpli cu e deseo di esnan cu ta tem’e; tambe e lo tende nan sclamacion y lo salba nan.” (Salmo 145:19, Beibel Santu) Pero, ta depende di abo mes si Dios lo contesta bo oracion.

Loke Dios ta rekeri di hende cu resa na dje

•   Resa na Dios y no na Hesus, Maria, santo, angel of imagen. Ta Jehova Dios so ta e “Scuchador di orashon.”​—Salmo 65:2, Beibel na papiamentu koriente.

•   Resa di acuerdo cu Dios su boluntad of rekisitonan, manera Bijbel ta indica.​—1 Juan 5:14.

•   Resa den nomber di Hesus y asina mustra respet pa su posicion. E mes a bisa: “Ningun hende no ta yega cerca e Tata si no ta pa medio di mi.”​—Juan 14:6.

•   Haci oracion cu fe y pidi Dios pa mas fe si ta necesario.​—Mateo 21:22; Lucas 17:5.

•   Sea humilde di curason. Bijbel ta bisa: “Sí, maske SEÑOR ta elevá, E ta mira un hende humilde.”​—Salmo 138:6, Beibel na papiamentu koriente.

•   Persevera den oracion. Hesus a bisa: “Sigui pidi, y boso lo ricibi.”​—Lucas 11:9.

Loke no ta importante pa Dios

•   Rasa of nacionalidad. Bijbel ta bisa: “Dios no ta haci distincion di persona, sino ta acepta tur hende di tur nacion cu ta tem’e y ta haci loke ta corecto.”​—Echonan 10:34, 35.

•   Posicion di curpa. Bo por haci oracion na Dios sinta, bo por buig, baha cabes, bay na rudia of para.​—1 Cronicanan 17:16; Nehemias 8:6; Daniel 6:10; Marco 11:25.

•   Na bos halto of den silencio. Dios ta contesta hasta oracion cu bo ta haci den silencio.​—Nehemias 2:1-6.

•   Sea bo problema ta grandi of chikito. Dios ta anima bo pa tira tur bo “inkietud riba dje, pasobra e ta interesa” den bo.​—1 Pedro 5:7.