Si, Dios ta yuda tur esnan cu ta pidi cosnan cu ta na harmonia cu su boluntad. Hasta si antes bo no tabata haci oracion, e ehempelnan di Bijbel di esnan cu a pidi Dios yuda nan lo por anima bo pa haci esey. Por ehempel:

•   “Yuda mi, o SEÑOR mi Dios; salba mi segun bo misericordia.”—Salmo 109:26, Beibel Santu.

•   “Ma ami, ku ta pober, mizerabel, Señor, kòrda riba mi! Bo ta mi yudansa i Salbador, no tarda, mi Dios!”—Salmo 40:17, Beibel na papiamentu koriente.

 Naturalmente, e escritor di e palabranan ey tabatin un fe fuerte den Dios. Pero, Dios ta scucha tur esnan cu ta bin cerca dje cu e motivacion corecto, manera esnan cu tin “curason kibra” of “spirito abati.”—Salmo 34:18, Beibel Santu.

 Kisas bo ta pensa cu Dios ta mucho leu for di bo y cu e no ta interesa den bo problemanan. Sinembargo, Bijbel ta bisa: “Jehová ta den haltu, y E ta mira e umilde; y e orguyoso E ta conoce di leu.” (Salmo 138:6, Salmonan y Proverbionan di Editorial Evangelica) Ademas, Hesus a yega di bisa su discipelnan: “El a conta hasta e drachinan di cabey riba boso cabes.” (Mateo 10:30) Pues, Dios sa cierto detayenan di bo cu abo mes no ta consciente di dje. Pesey, bo por ta sigur cu e lo scucha ora bo expresa bo preocupacionnan den oracion.—1 Pedro 5:7.