Apostel Juan a bisa lo siguiente tocante e Evangelio cu el a skirbi di e bida di Hesus: “Esun cu a mira esaki a duna testimonio, y su testimonio ta berdad, y e homber ey sa cu loke e ta bisa ta berdad, pa boso tambe por kere.”—Juan 19:35.

 Un motibo pakico nos por confia e relatonan den e Evangelionan di Mateo, Marco, Lucas y Juan ta cu nan a skirbi esakinan mientras cu hopi hende cu tabata testigo di e sucesonan describi, ainda tabata na bida. Segun algun fuente, e Evangelio di Mateo tabata skirbi rond di aña 41 di prome siglo, apenas un ocho aña despues di e morto di Hesus. Hopi experto ta pensa riba un fecha mas laat cu esaki, pero en general nan ta di acuerdo cu tur e bukinan di e Scritura Griego Cristian ( tambe conoci como e Testament Nobo) a keda skirbi den e prome siglo.

 E hendenan cu a mira Hesus ora e tabata na bida riba Tera, y cu tabata testigo di su morto y resureccion, por a confirma loke tabatin skirbi den e Evangelionan. Tambe nan lo por a indica cualkier inexactitud den e relatonan si tabata necesario. Profesor F. F. Bruce a bisa: “Un di e puntonan fuerte di e predicacion di e apostelnan ta e confianza cu cua nan tabata haci un yamada riba loke nan oyentenan tabata sa; nan no a djis bisa: ‘nos ta testigo di e cosnan aki’, sino cu nan agrega tambe: ‘manera boso mes sa’ (Echonan 2:22).”