Pordona ta nifica despensa un hende cu a ofende nos of cu a faya contra nos. Den Bijbel, e palabra Griego traduci como “pordona” ta nifica literalmente “pasa por halto”, por ehempel, ora un persona no ta exigi e pago pa un debe. Hesus a uza e comparacion ey ora el a siña su siguidornan pa pidi den oracion: “Pordona nos nos picanan, pasobra nos tambe ta pordona tur hende cu debe nos.” (Lucas 11:4) Di igual manera, den e ilustracion di e esclavo cu no a mustra misericordia, Hesus a splica cu ora bo pordona un hende, ta manera bo ta cancela un debe.—Mateo 18:23-35.

 Nos ta pordona otro ora nos no ta warda rencor y ora nos no ta insisti pa e persona paga nos bek pa e daño cu el a causa nos of pa e perdida cu nos a sufri. Bijbel ta siña nos cu e base pa pordon ta amor sin egoismo, ya cu amor “no ta keda corda e malo cu hende a hacie.”—1 Corintionan 13:4, 5.

Pordona no ta nifica:

•   Ignora of aproba loke e persona a haci. Bijbel ta condena hende cu ta considera loke ta malo inofensivo of aceptabel.—Isaias 5:20.

•   Haci manera e persona no a faya. Dios a pordona Rey David pa e picanan serio cu el a comete, pero e no a proteha David di e consecuencianan di su accionnan. Hasta Dios a laga skirbi e foutnan di David pa awe nos por sa di nan.—2 Samuel 12:9-13.

•   Permiti otro hende probecha di bo. Por ehempel, supone cu bo a fia un hende placa, pero el a malgast’e, y awor e no por paga bo bek manera el a priminti. E ta sintie hopi malo y ta pidi bo pa pordon’e. Bo por scoge pa pordon’e ora bo dicidi di no carga rencor, no tir’e na su cara constantemente y hasta cancela e debe por completo. Sinembargo, esey no ta nifica cu bo mester ta cla y dispuesto pa fi’e placa e siguiente biaha cu e pidi bo.—Salmo 37:21; Proverbionan 14:15; 22:3; Galationan 6:7.

•   Pordona sin motibo valido. Dios no ta pordona hende cu ta haci cos pa malo, ta nenga di admiti nan fayo, ta nenga di cambia nan comportacion of ta nenga di pidi hende cu nan a hurt pordon. (Proverbionan 28:13; Echonan 26:20; Hebreonan 10:26) E personanan aki cu no ta arepenti ta bira enemigo di Dios, y e no ta spera di nos cu nos mester pordona hende cu e mes no a pordona.—Salmo 139:21, 22.

   Pero, kico si un hende a trata nos asina cruel y ta nenga di pidi nos pordon of admiti loke el a haci? Bijbel ta conseha: “Stop di rabia y laga furia para.” (Salmo 37:8, Beibel Santu) Aunke nos no ta aproba loke el a haci, nos por scoge si pa no laga rabia domina nos. Mas bien, nos ta confia cu Dios lo ten’e responsabel pa loke el a haci. (Hebreonan 10:30, 31) Ademas, nos por haya consuelo den e promesa cu pronto Dios lo caba cu tur herida emocional cu aworaki ta causa nos asina tanto dolor.—Isaias 65:17; Revelacion 21:4.

•   “Pordona” tur cos cu segun nos ta un fayo. Tin biaha, en bes di pordona un persona cu supuestamente a faya contra nos, nos tin cu admiti cu nos no tin un bon motibo pa sinti nos mes malo. Bijbel ta bisa: “No sea lihe den bo curason pa rabia, pasobra rabia ta biba den pecho di hende bobo.”—Eclesiastes 7:9, Beibel Santu.

Con pa pordona un persona

1.   Corda kico pordon ta encera. Pordona no ta nifica ignora of aproba loke e persona a haci, ni e no ta nifica haci manera e persona no a faya. Simplemente bo ta pasa por halto di su fayo.

2.   Reconoce e beneficionan di pordona. Ora nos no keda rabia of carga rencor, nos lo ta mas calmo, mas salud y mas feliz. (Proverbionan 14:30; Mateo 5:9) Mas importante ainda, pa Dios pordona nos picanan, nos mester pordona otro hende.—Mateo 6:14, 15.

3.   Mustra compasion. Nos tur ta imperfecto. (Santiago 3:2) Mescos cu nos kier pa otro hende pordona nos, nos tambe mester pordona e fayonan di otronan.—Mateo 7:12.

4.   Sea rasonabel. Si e fayo no ta dje grave ey, nos por aplica e siguiente principio di Bijbel: “Sigui soporta otro.”—Colosensenan 3:13.

5.   Pordona lihe. Nos mester trata na pordona e persona mas pronto posibel en bes di laga e rabia bira pio.—Efesionan 4:26, 27.