Kico Ta “e Yabinan di e Reino”?
E contesta cu Bijbel ta duna
“E yabinan di e Reino” ta representa e autoridad pa habri e caminda pa hende “drenta e Reino di Dios.” (Mateo 16:19; Echonan 14:22) a Hesus a duna Pedro “e yabinan di e Reino di cielo.” Esaki ta nifica cu Pedro a ricibi e autoridad pa revela con hende fiel cu ricibi e spirito santo di Dios, por haya e privilegio di drenta e Reino di cielo.
Pa ken Pedro a uza e yabinan?
Pedro a uza e autoridad di Dios pa habri caminda pa tres grupo drenta e Reino:
Hudiu y Hudiu cu a comberti. Djis despues di Hesus su morto, Pedro a anima un multitud di Hudiu creyente pa acepta Hesus como esun cu Dios a scoge pa goberna den e Reino. Pedro a mustra nan loke nan mester a haci pa haya salbacion. Asina el a habri caminda pa nan drenta e Reino, y miles “a acepta su palabra.”—Echonan 2:38-41.
Samaritano. Despues, Dios a manda Pedro bay cerca e Samaritanonan. b El a bolbe uza un yabi di e Reino ora e cu apostel Juan “a pidi den oracion pa e Samaritanonan ricibi spirito santo.” (Echonan 8:14-17) Esey a habri caminda pa e Samaritanonan drenta e Reino.
Hende di otro nacion. Tres aña y mei despues di Hesus su morto, Dios a revela na Pedro cu hende di otro nacion tambe lo haya e oportunidad pa drenta e Reino. Pesey, Pedro a uza un di e yabinan ora el a predica na hende di otro nacion. Asina el a habri porta pa nan ricibi spirito santo, bira cristian y forma parti di e Reino.—Echonan 10:30-35, 44, 45.
Kico kiermen “drenta e Reino”?
Hende cu di berdad ta “drenta e Reino” lo goberna hunto cu Hesus den cielo. Bijbel a profetisa cu nan lo “sinta riba trono” y “como rey, nan lo goberna e Tera.”—Lucas 22:29, 30; Revelacion 5:9, 10.
Ideanan robes tocante e yabinan di e Reino
Idea robes: Ta Pedro ta dicidi ken por drenta cielo.
E berdad: Bijbel ta bisa cu ta Cristo Hesus “mester husga bibo y morto”, y no Pedro. (2 Timoteo 4:1, 8; Juan 5:22) Ademas, Pedro mes a bisa cu Hesus ta esun “cu Dios a decreta pa ta hues di bibo y morto.”—Echonan 10:34, 42.
Idea robes: Cielo a warda Pedro dicidi ki ora pa uza e yabinan di e Reino.
E berdad: Ora Hesus a papia tocante e yabinan di e Reino, el a bisa Pedro: “Kico cu bo mara riba Tera, lo ta mara caba den cielo, y kico cu bo los riba Tera, lo ta di los caba den cielo.” (Mateo 16:19) Algun hende ta kere cu esey ta nifica cu Pedro ta tuma decision pa cielo. Pero e verbonan na Griego original ta mustra net lo contrario, esta cu Pedro ta sigui e decisionnan cu a wordo tuma prome den cielo.
Ademas, otro parti den Bijbel ta mustra cu Pedro a sigui guia di cielo ora el a uza e yabinan di e Reino. Por ehempel, ora el a uza e di tres yabi, ta instruccion di Dios e tabata sigui.—Echonan 10:19, 20.
a Tin bes, Bijbel ta uza e palabra “yabi” como un simbolo di autoridad y responsabilidad.—Isaias 22:20-22; Revelacion 3:7, 8.
b E religion di e Samaritanonan tabata diferente for di esun di e Hudiunan. Pero nan a inclui algun siñansa y practica di e Ley di Moises.
You May Also Like
PREGUNTA CU BIJBEL TA CONTESTA
Kico e Reino di Dios Ta?
Wak dicon e Reino di Dios ta superior na tur otro gobierno.
PREGUNTA CU BIJBEL TA CONTESTA
Ken Ta Bay Cielo?
Hopi hende tin e idea robes cu tur bon hende ta bay cielo. Kico Bijbel ta siña realmente?
