Bo ta deseá di hasi algun investigashon pa oumentá bo konosementu di Beibel? Bo ke sa mas di un sierto teksto, persona, lugá òf kos menshoná den Beibel? Òf bo ta puntra bo mes si e Palabra di Dios por yuda bo ku un preokupashon ku bo tin? Si esei ta e kaso, sinti bo liber pa akudí na e biblioteka di Salòn di Reino.

Den dje bo por haña material pa hasi investigashon. Muy probablemente bo no tin tur e publikashonnan bíbliko di Testigunan di Yehova ku ta disponibel den bo idioma. Pero e biblioteka na Salòn di Reino sí tin mayoria di e último publikashonnan. Kisas e tin tambe un variedat di tradukshon di Beibel, un bon dikshonario i otro literatura di konsulta. Sinti bo liber pa hasi uso di nan sea promé òf despues di e reunionnan. Si tin un kòmpiuter den e biblioteka, kisas e tin e Watchtower Library instalá riba dje. Esaki ta un programa ku ta kontené un gran kantidat di nos publikashonnan i un sistema fásil di buska informashon ku ta yuda bo haña un tema, palabra òf teksto di Beibel.

E ta útil pa studiantenan di e Reunion Nos Bida i Sirbishi Kristian. Bo por hasi bon uso di e biblioteka di Salòn di Reino ora bo tin ku prepará parti. E ruman enkargá ku e biblioteka ta e superintendente di e Reunion Nos Bida i Sirbishi Kristian. E tin ku sòru pa e biblioteka tin e último publikashonnan i pa nan ta na òrdu. Sea é òf e Testigu ku ta duna bo estudio di Beibel por mustra bo kon pa buska e informashon ku bo tin mester. Tene kuenta sí ku no tin mag di bai ku niun di e bukinan di biblioteka. I ta mas ku klaru ku nos lo ke kuida e bukinan i no marka nada den nan.

Beibel ta splika ku pa haña “e konosementu di Dios” nos mester ta dispuesto pa busk’é “manera tesoro skondí.” (Proverbionan 2:1-5) E biblioteka di Salòn di Reino por yuda bo kuminsá ku bo búskeda.

• Ki medio pa hasi investigashon tin den e biblioteka di Salòn di Reino?

• Ken por yuda bo hasi bon uso di e biblioteka?