Tabata djabièrnè atardi lat, dia 14 di nisan. Manera solo baha, lo tabata sabat, dia 15 di nisan. Hesus ya tabata morto, pero e dos malechornan na su banda sí tabata na bida ainda. Segun e Lei ku Dios a duna Israel, no tabatin mag di laga kurpa morto “kologá henter anochi na e palu;” nan mester a der’é “riba e mesun dia.”—Deuteronomio 21:22, 23.

Ademas, tabata djabièrnè, dia di Preparashon. Riba e dia ei, e hendenan tabata prepará kuminda i hasi kualke otro kos ku no por a warda pa te despues di sabat. Anto 15 di nisan di e aña ei tabata “un dòbel sabat.” (Huan 19:31) Dikon? Wèl, dia 15 di nisan tabata e promé dia di e Fiesta di Pan sin Zürdeg, un fiesta ku tabata dura shete dia. E promé dia di e fiesta (esta, dia 15 di nisan) semper tabata un sabat, sin importá riba kua dia el a kai. (Levítiko 23:5, 6) Awor, komo ku e aña ei e dia akí a kai riba un sabat semanal, tabata dòbel sabat.

P’esei, e hudiunan a pidi Pilato pa hasi algu pa Hesus i e dos malechornan muri mas lihé. Kiko nan por a hasi? Laga kibra nan pianan. Esei lo a stroba nan di reis nan kurpa i hala rosea. Pues, e sòldánan a kibra pia di e malechornan ku tabata kologá na staka huntu ku Hesus. Pero komo ku a parse ku Hesus tabata morto kaba, nan no a kibra su pianan. Asina e palabranan di Salmo 34:20 a kumpli: “E ta kuida tur su wesunan; ningun di nan no ta wòrdu kibrá.”

 Pa hasi sigur ku Hesus tabata morto, un di e sòldánan a hink’é ku un lansa, banda di su kurason. “Mesora sanger ku awa a basha for di einan.” (Huan 19:34) Asina ei, un otro teksto a kumpli: “Nan lo fiha nan bista riba esun ku nan a hinka.”—Zakarías 12:10, NW.

Hose di e stat di Arimatea, “un hòmber riku” i un miembro respetá di Sanedrin, tambe tabata presente na e lugá di ehekushon. (Mateo 27:57) E Skritura ta bisa ku e tabata “un bon hende i un hòmber hustu,” kende “tambe tabata spera riba e Reino di Dios.” E “tabata un disipel di Hesus, ma na skondí pa motibu ku e tabatin miedu di e hudiunan.” P’esei, e no a apoyá Sanedrin den e sentensia ku nan a dikta den kaso di Hesus. (Lukas 23:50; Marko 15:43; Huan 19:38) Hose a tuma un kurashi i a bai pidi Pilato e kurpa di Hesus. Pilato a manda yama e ofisial di ehérsito ku tabata na enkargo di e ehekushon, i e ofisial a konfirmá ku Hesus tabata morto. E ora ei, Pilato a onra Hose su petishon.

Hose a kumpra lenen fini i limpi, a baha Hesus su kurpa for di e staka i lor’é den e pañanan di lenen pa prepar’é pa dera. Nikodemo, kende a yega di “bini serka Hesus den anochi,” tambe a yuda ku e preparashon pa dera Hesus. (Huan 19:39) El a trese mas o ménos 30 kilo di un meskla kostoso di mira i bálsamo aromátiko. Anto manera tabata e kustumber di e hudiunan di prepará un kurpa pa entiero, nan a lora Hesus su kurpa den paña ku e produktonan akí.

Awor, djis ei serka, Hose tabatin un graf kobá den baranka ku nunka nan a yega di usa. Nan a pone Hesus den e graf ei i a lora un piedra grandi pone na boka di e graf. Nan a hasi tur e kosnan akí lihé lihé promé ku tabata sabat. Maria Magdalena i Maria, mama di Santiago Chikí, tambe lo a yuda prepará e kurpa di Hesus. Despues, nan a pura bai kas “pa prepará yerba di holó dushi i zeta perfumá” pa kaba di prepará Hesus su kurpa despues di sabat.—Lukas 23:56.

E siguiente dia, ku tabata sabat, e saserdotenan prinsipal i e fariseonan a bai serka Pilato i a bis’é: “Nos ta kòrda ku ora e gañadó ei tabata na bida, el a bisa: ‘Despues di tres dia lo mi lanta for di morto.’ P’esei, duna òrdu pa tuma medida di siguridat na e graf te ku e di tres dia, pa su disipelnan no bin hòrta su kurpa i bisa e pueblo: ‘El a lanta for di morto!’ E último engaño akí lo ta pió ku esun promé.” Pilato a bisa nan: “Ata un trupa di sòldá pa boso. Bai i vigil’é lo mihó ku boso por.”—Mateo 27:63-65.

Djadumingu mainta trempan, Maria Magdalena, Maria (mama di Santiago) i algun otro hende muhé a bai na e graf ku nan yerbanan di holó dushi pa kaba di prepará e kurpa di Hesus. Nan tabata puntra otro: “Ken ta bai kita e piedra for di boka di e graf pa nos?” (Marko 16:3) Pero un temblor pisá a tuma lugá; un angel di Dios a lora e piedra grandi kita for di boka di e graf. Ademas, e sòldánan no tabat’ei i e graf tabata bashí!