Hesus a logra hopi durante su sirbishi ekstenso na Galilea. Pero e no kier a prediká na Galilea so. El a bisa: “Mi tin ku deklará e bon notisia di e Reino di Dios na e otro statnan tambe.” P’esei, el a bai “prediká den e snoanan di Hudea.” (Lukas 4:43, 44) Esei ta di komprondé pasobra tabata lènte i na Herúsalèm tabatin un fiesta na kaminda.

Pero e Evangelionan no ta duna masha detaye tokante Hesus su aktividatnan na Hudea manera nan ta duna tokante su sirbishi na Galilea. Kisas e hendenan na Hudea generalmente no a mustra interes den Hesus su siñansanan. No opstante, Hesus no a laga esaki strob’é di prediká diligentemente i di hasi bon obra unda ku el a bai.

Djis despues, Hesus tabata riba kaminda pa Herúsalèm, e stat prinsipal di Hudea. El a bai einan pa selebrá e Pasku Hudiu di aña 31 di promé siglo. Den e área drùk banda di e Porta di Karné, tabatin un tanki grandi di awa rondoná ku pasio tur na pilá ku nan tabata yama Bètzata. Hopi hende enfermo, siegu, koho i desabilitá tabata bini na e tanki akí. Dikon? Pasobra nan tabata kere ku un persona por a kura si e baha den e awa ora esaki ta moviendo.

Awor, tabata sabat. Hesus a mira un hòmber drumí na e tanki akí; e hòmber akí tabatin 38 aña malu. Hesus a puntr’é: “Bo ke bira bon?” E hòmber a kontest’é: “Señor, mi no tin ningun hende pa pone mi den e tanki ora e awa move; te ora ku mi ke yega serka, un otro hende a baha den dje promé ku mi.”—Huan 5:6, 7.

Anto loke Hesus a bisa e hòmber despues mester a sorprendé e hòmber i tur otro hende ku a tende. El a bisa e hòmber: “Lanta para, kue bo kama i kana.” (Huan 5:8) E hòmber a hasi presis manera Hesus a bis’é. Sí, asina ku el a kura, el a kue su kama i a kuminsá kana!

Ora e hudiunan a mir’é, nan no a keda kontentu p’e. Nan a kritik’é, bisando: “Ta sabat; bo no tin mag di karga e kama.” E hòmber a bisa nan: “Ta e hende ku a kura mi a bisa mi: ‘Kue bo kama i kana.’” (Huan 5:10, 11) E hudiunan ei no a keda kontentu ku tabatin hende ta kura otronan riba sabat.

Nan a puntra e hòmber: “Ta ken ta e hende ku a bisa bo: ‘Kue bo kama i kana’?” Kon bini nan a hasi e pregunta ei? Pasobra Hesus “a kita bai” den e “gran kantidat di hende” i e hòmber ku el a kura no tabata sa su nòmber. (Huan 5:12, 13) Pero e hòmber a topa Hesus despues. Sí, el a mira Hesus den e tèmpel i a haña sa ku ta e tabata esun ku a kur’é na e tanki.

Anto el a bai buska e hudiunan ku a puntr’é ta ken a kur’é i el a bisa nan ku ta Hesus. Despues di a tende esei, e hudiunan a bai serka Hesus. Pakiko nan a bai serka dje? Ta pa nan por a haña sa ku ki poder e por a hasi e kosnan maravioso ei? Nò, nan a bai serka dje pa kritik’é pasobra el a hasi bon obra riba sabat. Nan a asta kuminsá persiguié!