1-2. Kon mayornan tin ku reakshoná ora nan yu hasi pregunta tokante Yehova i Beibel?

 HOPI mayor ta bisa ku lantamentu di yu no ta wega; e ta eksigí hopi esfuerso. Si bo tin yu, nos sa ku bo ta hasiendo tur bo esfuerso pa yud’é tin un fe fuerte. (Deu. 6:​6, 7) Segun ku bo yu ta krese, e por kuminsá puntra kosnan manera: ‘Dikon Yehova no ke pa nos hasi e kos ei?’

² Komo mayor, un pregunta asina por kue bo fo’i base i bo por kuminsá preokupá pensando ku bo yu su fe ta birando suak. Pero ta nèt e tipo di preguntanan ei ta loke bo yu mester hasi pa e por tin un fe fuerte. (1 Kor. 13:11) Pues, no tin nodi di drenta pániko. Ora bo yu hasi pregunta, probechá di e oportunidat ei pa yud’é pensa mas aleu i asina fortalesé su fe den Yehova i Beibel.

3. Kiko nos lo trata den e artíkulo akí?

³ Den e artíkulo akí, nos ta bai papia tokante kon mayornan por yuda nan yunan (1) haña fe den Yehova i Beibel, (2) mira e balor di e normanan di Beibel i (3) siña kon pa splika nan kreensia na otro hende. Tambe nos lo trata dikon ta bon pa yunan hasi pregunta. Ademas, nos lo sugerí algun aktividat ku mayornan por hasi ku nan yunan ku por habri kaminda pa nan papia tokante Yehova i Beibel.

YUDA BO YU HAÑA FE DEN BEIBEL I DIOS

4. Ki pregunta un yu por tin, i dikon?

⁴ Bo yu lo no tin fe den Dios djis pasó abo tin fe. Meskos ku abo, bo yu no a nase ku fe den Yehova. Pues ku  tempu, bo yu por hasi pregunta mané: ‘Kon mi por sa ku tin un Dios? Di bèrdat mi por kere loke Beibel ta bisa?’ Beibel ta bisa ku ta bon pa nos usa nos “kapasidat di pensa” i pa “hasi sigur di tur kos.” (Rom. 12:1; 1 Tes. 5:21) Pero, kon bo por yuda bo yu fortalesé su fe?

5. Kiko mayornan por hasi pa yuda nan yu haña fe den Beibel? (Romanonan 12:2)

⁵ Animá bo yu pa buska prueba ku loke Beibel ta bisa ta bèrdat. (Lesa Romanonan 12:2.) Ora bo yu hasi bo un pregunta, usa e oportunidat ei pa mustr’é kon e mes por haña e kontesta usando nos publikashonnan, manera Guia pa Buska Informashon den e Publikashonnan di Testigunan di Yehova. Bou di e tópiko “Beibel,” e por buska “Inspirá di Dios” i asina haña prueba ku Beibel no ta djis un buki ku hende a skirbi, mas bien “e palabra di Dios.” (1 Tes. 2:13) Por ehèmpel, e por buska informashon tokante e stat asirio Nínive. Ántes tabatin hende ku tabata kritiká loke Beibel ta bisa di Nínive. Nan tabata bisa ku e stat ei nunka a eksistí. Pero rònt di 1850, arkeólogonan a deskubrí ruina di e stat, probando asina ku loke Beibel a bisa di e stat ta korekto. (Sof. 2:​13-15) Pa mas informashon tokante kon destrukshon di Nínive a kumpli ku profesianan di Beibel, e por wak e artíkulo “Bo Tabata Sa?” den E Toren di Vigilansia di novèmber 2021. Ora bo yu kompará loke nos publikashonnan ta splika ku loke otro buki- òf fuentenan di informashon konfiabel ta splika, lo e haña mas konfiansa ku loke Beibel ta bisa ta bèrdat.

6. Kon mayornan por stimulá e abilidat di pensa di nan yu? Duna un ehèmpel. (Wak e plachi.)

⁶ Stimulá bo yu su abilidat di pensa. Bo tin hopi oportunidat pa kòmbersá ku bo yu tokante Beibel i fe den Dios. Kisas bo por hasi esei ora boso ta wak artefaktonan den buki òf vidio, bishitá un museo, un parke òf un dje sukursalnan di Testigunan di Yehova. Por ehèmpel, ora boso ta bai hasi un tour na un museo, sea en persona òf virtual, yuda bo yu mira kon artefaktonan òf susesonan di historia ta proba ku loke Beibel ta bisa ta bèrdat. Bo yu tabata sa ku Dios su nòmber ta aparesé riba Piedra di Móab, un pida piedra di 3.000 aña bieu? E piedra original ta na Museo Louvre na Fransia. Tambe por wak un réplika den e ekshibishon na “Beibel i e Nòmber Divino” na e Sede Mundial di Testigunan di Yehova  na Warwick, New York. E piedra ta bisa ku Rei Mesa di Móab a rebeldiá kontra Israel. Anto ta esei tambe Beibel ta bisa. (2 Rei. 3:​4, 5) Ora bo yu mira ku su mes wowo ku loke Beibel ta bisa ta bèrdat, bo yu su fe lo bira mas fuerte.—Kompará ku 2 Krónikanan 9:6.

7-8. (a) Kiko nos por siña for di e patronchinan bunita den naturalesa? Duna un ehèmpel. (Wak e plachi.) (b) Ki pregunta por yuda bo yu fortalesé su fe den un Kreador?

⁷ Animá bo yu pensa pa riba e kosnan ku Yehova a krea. Ora bo ta kana den naturalesa òf ta traha den kurá, yuda bo yu mira patronchi interesante ku tin den kreashon. E patronchinan ei ta indiká ku un persona inteligente i sabí a diseñá nan. Por ehèmpel, sientífikonan tin añanan ta studia patronchinan spiral ku tin den hopi kos den naturalesa. E sientífiko Nicola Fameli a splika ku si bo konta e kantidat di spiral ku bo ta haña den sierto kosnan den naturalesa, bo ta deskubrí un sierto patronchi den e sifranan. Esei ta ser yamá sekuensia di Fibonacci. Naturalesa ta yen di patronchi di spiral: forma di algun galaksia, kokolishi, blachi di mata i zòneblum. a

⁸ Na skol, bo yu lo siña tambe tokante otro patronchi ku tin den naturalesa. Por ehèmpel, mayoria di palu tin un patronchi ku ta keda ripití. E tronkon ta partí den brasa, ku ta partí den rama òf taki. E tipo di patronchi ei yama fractal. E patronchi ei ta bini den mas kos den naturalesa. Pero ken a diseñá e patronchinan bunita ei? Mas bo yu pensa riba e kosnan fasinante ku Yehova a traha, probablemente mas konvensí lo e ta ku ta Dios a traha tur kos. (Heb. 3:4) Segun ku bo yu ta bira grandi lo bo por puntr’é: “Si Dios a traha nos, bo no ta kere ku lo el a duna nos tambe guia i instrukshon pa nos mes bon i pa nos ta felis?” Djei, splika bo yu ku Dios a pone e instrukshonnan balioso ei den Beibel.

YUDA BO YU MIRA E BALOR DI E NORMANAN DI BEIBEL

9. Kiko por pone un yu duda den e normanan di Beibel?

⁹ Si bo yu ta duda den e normanan di Beibel, purba di saka afó dikon e ta duda esei. Ègt e no ta di akuerdo ku e normanan den Beibel? Òf kisas djis e no sa kon pa splika su kreensianan na otro hende? Sea kual sea e kaso, loke por yud’é mira dikon ta bon pa nos obedesé Yehova su  instrukshonnan ta di studia e buki Bo Por Disfrutá di Bida pa Semper! b kuné.

10. Kon bo por yuda bo yu tin un amistat será ku Yehova?

¹⁰ Animá bo yu pa bira amigu di Yehova. Ora bo ta studia ku bo yu, usa e pregunta- i e plachinan den e buki Bo Por Disfrutá di Bida pa Semper! pa purba di laga bo yu habri i bisa loke e ta pensa. (Pro. 20:5) Por ehèmpel, lès 8 ta kompará Yehova ku un bon amigu ku ta kòrda nos loke nos tin ku hasi pa kos bai bon ku nos i pa nada malu no pasa nos. Despues di analisá 1 Huan 5:​3, bo por puntra bo yu: “Mirando ku Yehova ta asina un bon amigu, ki bo ta pensa di loke e ta pidi nos hasi?” E pregunta ei kisas por parse simpel, pero e por yuda bo yu mira Yehova su leinan komo prueba di Su amor.—Isa. 48:​17, 18.

11. Kon bo por yuda bo yu mira dikon ta bon pa apliká prinsipionan di Beibel? (Proverbionan 2:​10, 11)

¹¹ Papia tokante e benefisio di apliká prinsipionan di Beibel. Ora bo ta lesa Beibel òf e teksto di dia huntu ku bo yu, papia tokante kon prinsipionan di Beibel a yuda boso famia. Por ehèmpel, bo por usa okashonnan asina pa yuda bo yu komprondé ku ta bon pa nos traha duru i semper papia bèrdat. (Heb. 13:18) Bo por splik’é tambe kon konsehonan di Beibel ta yuda nos tin un bida salú i felis. (Pro. 14:​29, 30) Papia tokante e prinsipionan ei probablemente lo yuda bo yu balorá mas ainda e konsehonan di Beibel.—Lesa Proverbionan 2:​10, 11.

12. Kon un tata ta yuda su yu balorá e benefisio di apliká prinsipionan di Beibel?

¹² Steve, ku ta biba na Fransia, ta splika kon e ku su kasá ta yuda Ethan, nan yu tiner, komprondé ku Yehova ta pone lei pasó e stima nos. Steve a bisa: “Nos ta puntra Ethan: ‘Dikon Yehova ke pa nos obedesé e mandamentu akí? Kon esei ta mustra ku e stima nos? Kiko lo pasa si bo no apliká e prinsipio ei?’” Kòmbersashonnan asina a yuda Ethan ta konvensí ku e guia- i normanan di Yehova semper ta pa su mes bon. Steve a sigui bisa: “Nos meta ta pa yuda Ethan mira ku e sabiduria ku tin den Beibel ta hopi mas elevá ku sabiduria di hende.”

13. Kon mayornan por siña nan yu kon pa apliká prinsipio di Beibel? Duna un ehèmpel.

¹³ Siña bo yu apliká prinsipionan di Beibel. Por sosodé ku komo parti di un proyekto di skol, bo yu tin ku lesa un sierto buki. Kisas e buki tin personahenan ku ta inmoral, violento òf ku ta hasi otro kos ku Yehova no gusta. E buki ta duna e idea ku e kosnan ei no ta dje malu ei. Bo por animá bo yu pa kompará komportashon di e personahenan ei ku e prinsipionan di Beibel. (Pro. 22:​24, 25; 1 Kor. 15:33; Flp. 4:8) Esaki por yuda bo yu mira dikon ta bon i sabí pa obedesé Yehova. I si su dosente òf su kompañeronan di klas puntr’é kon el a haña e buki, lo e por papia tokante loke e ta kere aden, esta, su kreensianan.

PREPARÁ BO YU PA DEFENDÉ SU KREENSIANAN

14. Ki tema por ta difísil pa un hóben papia ku otro hende tokante dje, i dikon?

¹⁴ Tin biaha algun hóben tin miedu i bèrgwensa pa defendé nan kreensianan.  Kisas nan ta sinti nan insigur si nan tin ku splika dikon nan no ta kere den evolushon. Dikon? Pasó mayoria di dosente ta papia tokante evolushon mané e ta un echo i no un teoria. Kon bo por yuda bo yu tin konfiansa ku loke e ta kere aden ta bèrdat?

15. Kiko por yuda un hóben haña mas konfiansa den loke e ta kere aden?

¹⁵ Yuda bo yu haña mas konfiansa den loke e ta kere aden. Bo yu no mester tin bèrgwensa ku e ta kere den un Kreador. (2 Tim. 1:8) Asta hopi sientífiko ta kere ku bida no por a aparesé djis asina di su mes. Nan ta mira prueba ku un persona inteligente mester a krea e kosnan maravioso i elaborá ku nos ta mira den naturalesa. Esei ta pone ku nan no ta kere den e teoria di evolushon ku skolnan rònt mundu ta siña. Algu ku por yuda bo yu fortalesé su fe i kurashi ta di haña sa loke a konvensé otro rumannan pa kere ku bida ta obra di un Kreador. c

16. Kon mayornan por yuda nan yu defendé su fe den un Kreador? (1 Pedro 3:15) (Wak e plachi.)

¹⁶ Prepará bo yu pa defendé su fe den un Kreador. (Lesa 1 Pedro 3:15.) Kisas ta bon pa trata ku bo yu e artíkulonan “Kreashon òf Evolushon?” den e seri “Loke Hóben Sa Puntra” riba jw.org. Djei, laga bo yu skohe e splikashon ku e ta haña ku lo ta mas útil pa yuda konvensé otronan ku tin un Kreador. Kaba, trein huntu kon e por duna e splikashon. Kòrd’é ku su meta no ta pa diskutí ni pleita ku e muchanan di su klas. Anto si un hende ke papia tokante e tópiko, animá bo yu pa rasoná na un manera simpel i lógiko. Por ehèmpel, un kompañero di su klas por bisa: “Mi ta kere solamente loke mi por mira ku mi mes wowonan, anto nunka m’a mira Dios.” Bo yu por kontest’é: “Imaginá bo ta kanando den un mondi leu for di sivilisashon i bo topa un kas masha bunita. Ki lo bo pensa? Un hende mester a traha e kas di piedra ei, tòg? Meskos ta konta pa nos planeta i tur kos bibu. Un persona mester a traha nan!”

17. Kon mayornan por animá nan yu pa buska oportunidat pa papia di Beibel? Ilustrá.

 ¹⁷ Animá bo yu pa buska oportunidat pa papia di Beibel. (Rom. 10:10) Bo por splika bo yu ku por kompará papiamentu tokante Beibel ku tokamentu di un instrumènt. Na kuminsamentu, un persona tin ku hasi hopi esfuerso pa siña toka melodianan simpel. Pero ku tempu i práktika, esei ta bai mas fásil. Meskos ta pasa ora di papia tokante nos fe; kuminsá ku kòmbersashonnan simpel. Por ehèmpel, un hóben Testigu por puntra un kompañero di skol: “Bo tabata sa ku hopi biaha sientífikonan ta kopia diseño ku nan ta mira den naturalesa? Laga mi mustra bo un vidio interesante.” Despues di a mustra un vidio for di e seri Un Persona A Diseñ’é? e por puntra: “Si un sientífiko ta haña rekonosementu pa kopia algu ku ya ta eksistí den naturalesa, ken tin ku haña rekonosementu pa e diseño original?” Ku algu simpel asina kisas e kompañero por haña gana di siña mas di Yehova.

SIGUI YUDA BO YU FORTALESÉ SU FE

18. Kon mayornan por sigui yuda nan yu haña un fe mas fuerte?

¹⁸ Mayoria di hende den e mundu akí no tin fe den Yehova. (2 Ped. 3:3) P’esei mayornan, segun ku boso ta studia Beibel ku boso yu, anim’é pa buska tópikonan ku lo yud’é haña mas rèspèt pa Beibel i Dios su normanan. Stimulá su abilidat di pensa dor di mustr’é kosnan fasinante ku Yehova a krea. Yud’é komprondé i apresiá e profesianan asombroso di Beibel ku ya a kumpli. I mas ku tur kos, resa huntu ku boso yu i pa boso yu. Ora boso hasi e kosnan ei, boso por tin sigur ku Yehova lo bendishoná loke boso ta hasi pa yuda boso yu haña un fe fuerte.—2 Kró. 15:7.