Atrapá den un Matrimonio sin Amor

“Den un sociedad yen di divorcio, no solamente tin chens cu mas matrimonio infelis ta caba den divorcio, sino ademas, tin chens cu mas matrimonio ta bira infelis.”—CONSEHO PA FAMIANAN NA MERCA.

HENDE a yega di bisa cu gran parti di felicidad den bida i gran parti di miseria den bida ta bini dje mésun fuente: bo matrimonio. Sí, poco cos den bida tin e potencial di duna asina tantu éxtasis, of asina tantu angustia. Manera e cuadro adhunto ta indicá, hopi pareha ta experenciando masha hopi angustia mes.

Pero estadísticanan di divorcio ta revelá solamente un parti dje problema. Pa cada matrimonio cu sink, cantidad sinfin di otronan ta sigui drif, pero pegá den awa stagná. “Ántes nos tabata un famia felis, pero e último 12 añanan tabata horibel,” un señora casá pa mas cu 30 aña a conta confidencialmente. “Mi esposo no ta interesá den mi sintimentunan. Di berdad e ta mi pió enemigu emocional.” Asina tambe un esposo cu tin casi 25 aña casá, a lamentá: “Mi esposa a bisa mi cu e no stima mi mas. E ta bisa cu si nos por djis sigui biba manera compañero di cuarto cu otro i cada un sigui su caminda separá ora ta trata di tempu liber, lo e por soportá e situacion.”

Ta claro cu algun pareha den situacionnan asina penoso ta pone un fin na nan matrimonio. Sin embargo, pa hopi pareha divorcio no ta un opcion. Di con? Segun dr. Karen Kayser, factornan manera yu, mal nomber den comunidad, finansa, amigu, famia i creencianan religioso kisas ta tene un pareha huntu, maske nan no ta stima otro. E ta bisa: “Siendo cu ta improbabel cu nan lo divorciá legalmente, e parehanan aki ta scoge pa keda cerca un casá for di ken nan ta emocionalmente divorciá.”

Un pareha cu nan relacion a fria tin cu resigná nan mes na un bida infelis? Un matrimonio sin amor ta e único alternativa en bes di divorcio? Experencia ta proba cu por salba hopi matrimonio den problema, i salba nan no solamente dje agonia di kibra cu otro, sino tambe dje miseria di biba huntu sin amor.

[Kuadro na página 3]

DIVORCIO ROND MUNDU

• Australia: Compará cu principio di añanan ’60, e porcentahe di divorcio a bira casi cuater bes mas haltu.

• Cánada cu Hapon: Divorcio ta afectá rond di un tercer parti di matrimonionan.

• Gran Bretania: Segun pronóstico, 4 di cada 10 matrimonio lo caba den divorcio.

• Merca: Desde 1970, parehanan cu casa tin solamente 50 porciento di chens di keda huntu.

• Zimbabwe: Divorcio ta pone fin na rond di 2 di cada 5 matrimonio.