Drecha Bo Outo na un Manera Safe

Kevin tabata sa di eksperensia kon pa kambia zeta di su outo. E tabata sa kon pa kita e plùk di zeta di e “oil pan,” hasi e krènkes bashí, pone e plùk bèk, i tait e. Pero un biaha, segun ku Kevin tabata drei su yabi ku forsa, e yabi a slep for di e kabes di e bout. Kevin su man a bai dal den un pida metal skèrpi i el a kòrta su plant’i man mal kòrtá te ku e mester a haña vários kosé.

 MESKOS ku Kevin, tin hopi hende ku nan mes ta traha riba nan outo ku regularidat, tin di nan djis pa baha gastu. Pero tin otro bentahanan mas den siña e kosnan básiko relashoná ku mantenshon i drechamentu di outo. Un señora ku yama Kathy a bisa: “Un biaha, durante un biahe largu riba kaminda, mi outo a haña un problema. Komo ku mi a siña drecha mi outo, mi mes por a korigí e problema i sigui ku e biahe.”

Podisé bo tambe tin gana di por mantené i drecha bo outo. Pero kon bo por hasié na un manera safe?

Pensa di Antemano!

Bo promé prioridat mester ta siguridat, esta, traha na un manera safe. * Manera loke a pasa ku Kevin ta ilustrá, ta fásil pa leshoná bo mes ora bo ta traha den un lugá pèrtá òf ora bo ta usa forsa riba un hèrmènt. Kon bo por evitá di leshoná bo mes? Ora bo ta usa un yabi pa sera un bout, hasi sigur ku e yabi ta bon pon’é riba e bout. Puntra bo mes: ‘Si e hèrmènt aki slep, unda mi man lo bai?’ Bo por haña un grado di protekshon dor di bisti hanskun òf dor di mara un lapi rònt di bo man. Pa yuda kontrolá e forsa ku bo ta pone riba e hèrmènt, hal’é na bo si ta posibel, en bes di push’é fo’i bo. Asina tambe, ora bo ta lòs un bout ku ta pegá, bo meta mester ta pa laga e bout drei kada bes djis un kuart rònchi. E prinsipionan aki di premirá algu i kontrolá bo moveshon semper ta válido. No neglishá nan nunka pasobra bo tin purá!

Hopi bes aksidente ta tuma lugá ora ku un persona ta purba usa un hèrmènt pa un kos ku e no a ser trahá p’e. Por  ehèmpel, Tom tabatin difikultat pa kambia e sparplùknan di su outo. Dikon? Pasobra su sòket tabata muchu kòrtiku, i kada bes e tabata slep for di e promé plùk. Finalmente, Tom a pega un ekstenshon entre e sòket i e ratchet (kabes di e sòket). E ora ei el a kambia e sinku plùknan ku a sobra den e mesun kantidat di tempu ku a tum’é pa kambia e promé plùk, anto el a kambia nan na un manera safe! Ki lès esei ta siña nos? Ku ta masha importante pa bo tin e hèrmènt adekuá.

Kos dañino por bai den bo wowo ora ku bo ta traha bou di outo òf ta wak bou di dash-board. Kon bo por prevení esaki? “Bisti un tipo di protekshon pa bo wowo, manera brel di siguridat,” segun Sean, kende tin mas ku dies aña komo mekániko. El a agregá: “Den e garashi kaminda mi ta traha, ta obligatorio pa usa tal ekipo di siguridat.” Tambe bo mester usa algu pa protehá bo wowo ora bo ta traha banda di líkidonan peligroso, manera zür di bateria.

Ora bo ta traha bou di bo outo, semper usa un “kabai” bon diseñá pa wanta e outo, òf un left profeshonal pa hisa e outo òf un buraku reforsá ku ta laga bo drenta bou di e outo. Nunka bai bou di un vehíkulo ku tin solamente un djèk ta want’é. E manual di algun outo ta indiká unda bo mester pone djèk òf kabai pa nan wanta e outo bon. Sin embargo,  kòrda ku un movementu fuerte diripiente—manera ora bo ta pone forsa pa lòs un bout ku ta duru pegá—por pone e outo skùif i slep for di loke ta want’é.

Kon pa Evitá Sorpresanan Peligroso

Algun parti di bo outo por bira hopi kayente i kima bo si bo mishi ku nan. Por ehèmpel, e awa den radiator ta keda kayente pa basta ratu despues ku bo paga e motor. P’esei no habri e tapa di radiator sino te ora ku e tapa ta sufisiente friu ku bo por lòs e ku bo man sin hanskun. Den algun outo, e fèn di radiator ta drei riba koriente i ta sende outomátikamente, asta despues ku paga e motor. Pa evitá leshon, bo tin ku deskonektá e waya di ground for di e bateria, promé ku bo kuminsá traha riba e outo.

Ora bo ta traha riba bo outo, kita renchi i hoya for di bo kurpa, foral si e motor ta sendé. Hoyanan di metal, fuera di keda pegá den partinan di e outo, por kousa un korto sirkuito i bira kayente-kayente! Tambe piesanan ku ta drei òf move por gara manga largu ku ta kologá, dashi, shal, i asta kabei largu.

Asta ora bo ta pensa ku bo trabou ta kla, tin un último regla ku bo tin ku kumpli kuné. “Semper dòbel chèk bo trabou,” segun Dirk, shèf di un garashi hopi drùk. El a sigui bisa: “Un biaha, un mekániko a lubidá di hasi esaki despues ku el a traha riba brek di un outo. E breknan a faya, i e outo a bin dal den mi büró!”

Kon pa Atendé Emergensia

Un dia Tom a ripará ku su outo tabata keinta di mas. Ta un slan a kibra, i e awa di radiator a basha abou. Usando un ròl di duct tape [tape shinishi hanchu] ku semper e tin den outo, Tom a logra drech’é temporalmente dor di tape e slan i basha un meskla di antifreeze ku awa den e radiator. Kaba el a kore bai na un negoshi ku ta bende piesa di outo pa kumpra un slan nobo. Tom su eksperensia ta ilustrá e nesesidat di ta prepará dor di sòru pa bo tin artíkulonan pa drecha kos den bo outo.

Segun ku bo ta kore, sea alerta pa kualke zonidu òf holó straño. Yvonne a ripará ku un holó straño tabata bini for di e motor di outo. Su kasá a habri e tapa di mashin i a mira kon antifreeze tabata spùit sali for di un buraku chikí parti ariba di e slan di radiator. Komo ku nan a detektá e problema promé ku e outo a keinta di mas, Yvonne ku su kasá por a kore bai un garashi.

Kiko bo mester hasi si bo outo daña riba karetera? Promé, purba pone e outo mas leu ku ta posibel for di riba kaya. Pasaheronan, foral mucha, mester keda den outo ku nan faha di siguridat mará. Si bo mester ta pafó di e outo, para mas leu ku ta posibel for di tráfiko. Sende e lusnan di emergensia ku ta flèsh (hazard). Laga e tapa di mashin hisá komo un señal ku bo tin problema ku outo. Kuidadosamente, pone lus òf otro señal di atvertensia.

Si bo bateria di outo a baha, bo por disidí di usa booster cable pa start e outo ku yudansa di un otro vehíkulo. Pero tene kuenta ku bateria di outo ta produsí gas sumamente flamabel. Un chispa por sende e gas aki, produsiendo un eksploshon ku por baña bo ku ásido ku ta kima. P’esei, si abo òf esun ku ta yuda bo no sa sigur kon pa usa booster cable, warda te ora boso haña yudansa.

Manera nos a mira, mantenshon di outo ta un responsabilidat serio. Sea ku bo traha riba bo mes outo pa drech’é den kaso di un emergensia òf simplemente bo ta hasi mantenshon rutinario, semper kòrda ku ta masha importante pa bo ta konsiente di siguridat!

[Nota]

[Komentario na página 15]

Hopi bes aksidente ta tuma lugá ora ku un persona ta purba usa un hèrmènt pa un kos ku e no a ser trahá p’e

[Kuadro/Plachinan na página 13]

Artíkulonan pa Tene den Bo Outo

▪ Spertayer i djèk

▪ Booster cable

▪ Lus di emergensia òf reflektor

▪ Hèrmènt i brel di siguridat

▪ Flèshlait

▪ Èkstra bòter òf bleki di líkido (zeta, awa, antifreeze, zeta di brek)

▪ Duct tape

▪ Fius di reserva

▪ Kabuya pa tou (Nota: Den algun lugá kisas ta solamente kran tin mag di tou bo outo)

▪ Kaha pa tene hèrmènt i bòter òf bleki na òrdu i pará

Podisé bo ta deseá di tene mas artíkulo di drecha kos den bo outo. Sin embargo, algun klup di outo ku ta perkurá servisio di emergensia kantu di kaminda no ta dispuesto pa traha riba un outo ku daña si e doño mes a kuminsá drecha sierto kos. Si bo ta pertenesé na un klup di outo, buska pa sa ki tipo di reparashon ta ser permití.