Drentando un Mundu Friu!

UN BEIBI ta nase den un mundu kruel i friu, un mundu yen di strès. Ounke un beibi no por ègt ekspresá ku palabra loke e ta sinti, tin sientífiko ta kere ku asta promé ku nasementu e feto ta konsiente di loke ta pasa.

E buki The Secret Life of the Unborn Child (E Bida Sekreto di e Yu den Barika) ta bisa: “Nos sa ku e yu den barika ta un ser humano konsiente ku ta reakshoná riba estímulo, i ku for di su di seis luna en adelante (i podisé asta mas promé) e ta hiba un bida emoshonal aktivo.” Ounke un beibi kisas no ta kòrda esei, tin sientífiko ta puntra nan mes si de echo e proseso di nasementu—un eksperensia yen di strès—no ta afektá bida di e beibi despues.

Despues ku e beibi nase, e strès ta sigui. Unabes pafó di e matris di su mama, e no ta ser alimentá mas outomátikamente. E kabuya di lombrishi ku tabata transportá oksígeno i supstansianan nutritivo no t’ei mas. Pa sobrebibí, e tin ku kuminsá hala rosea i e mes tin ku ingerí su nutrishon. E mester di un hende pa dun’é kuminda i atendé su otro nesesidatnan físiko.

Tambe e yu resien nasí tin ku desaroyá mentalmente, emoshonalmente i spiritualmente. Pues, un hende tin ku kuida i eduká e chikitin. Ken ta den e mihó posishon pa hasi esei? Kiko e beibi tin mester for di su mayornan? Kon ta e mihó manera pa satisfasé e nesesidatnan aki? E siguiente artíkulonan lo yuda kontestá e preguntanan aki.