ABEHA por bula baha sin problema for di kasi tur ángulo. Kon bin?

Pensa un ratu riba lo siguiente: Pa un abeha bula baha un kaminda sin problema, e mester redusí su velosidat te na kasi sero nèt promé ku e baha. Kon e por logra esei? Wèl, ta lógiko ku e mester kalkulá dos kos: velosidat i distansia. Despues e mester adaptá su velosidat teniendo kuenta ku e distansia. Pero esei ta algu hopi difísil pa mayoria di insekto. Dikon? Komo ku nan tin dos wowo hopi serka di otro, nan no por ahustá nan enfoke pa kalkulá nan distansia.

Hende tin un vishon binokular (manera verrekijker), i p’esei nan por kalkulá distansia. Den kaso di un abeha, esaki ta diferente; un opheto ta parse di bira mas grandi segun ku e ta aserká e opheto. I mas serka e yega di e opheto, mas lihé e opheto ta parse di bira grandi. A base di un eksperimento ku investigadónan na e Universidat Nashonal di Australia a hasi, nan a ripará ku abeha ta baha su velosidat pa e grandura di e opheto keda relativamente meskos. Pues, pa ora ku un abeha yega kaminda e ke yega, e ta baha su velosidat te na kasi sero i asina e por ‘aterisá’ sin problema.

E revista Proceedings of the National Academy of Sciences ta bisa: “Lo por implementá e mesun prinsipio simpel di aterisahe akí . . . den e sistema di nabegashon di robòt ku ta bula.”

Kiko bo ta pensa? E kapasidat ku abeha tin pa bula baha for di kualke direkshon a bini di evolushon òf di kreashon?