Un persona ku tin perseveransia no ta entregá ora e hañ’é ku opstákulo òf desepshon. Ta eksperensia ta yuda un hende desaroyá e kualidat ei. Meskos ku un mucha no por siña kana sin ku e ta kai algun biaha, asina tambe e no por bai bon den bida si e no siña enfrentá problema.

Tin mucha ta desanimá ora nan hasi fout, ora nan enfrentá problema òf ora un hende korigí nan. I tin otronan ta gewon entregá. Pero ta importante pa nan komprondé lo siguiente:

• No ta tur kos nos por hasi bon.—Santiago 3:2.

• Nos tur lo enfrentá problema den bida.—Eklesiástes 9:11, NW.

• Si nos no haña korekshon, nunka nos lo por mehorá.—Proverbionan 9:9.

Perseveransia ta yuda bo yu pa enfrentá problema ku éksito den bida.

Ora bo yu no logra algu.

PRINSIPIO DI BEIBEL: “Un hende hustu ta kai shete bes, i ta lanta atrobe.”—Proverbionan 24:16.

Yuda bo yu saka afó si un problema ta serio òf nò. Por ehèmpel, kiko lo e hasi si e haña un mal punto pa un prufwèrk? Lo e entregá i bisa: “Mi no ta hasi nada bon”?

Siña bo yu pa e perseverá; yud’é pensa kon e por mehorá e siguiente biaha. Di e manera ei, lo e purba solushoná su problema i stòp di sinti duele di su mes.

Tene kuidou! No solushoná e problema ei p’e, sino yud’é pa e mes solushoná su problema. Bo por puntr’é: “Kiko bo por hasi pa komprondé e lès mas mihó?”

Ora algu malu sosodé.

PRINSIPIO DI BEIBEL: “Boso no sa kon boso bida lo ta mañan.”—Santiago 4:14.

Ningun hende no sa kiko lo pasa mañan. Un hende por ta riku awe i pober mañan; un hende por ta bon di salú awe i bira malu mañan. Beibel ta bisa: “No ta hende lihé tin e kareda, ni hende fuerte e bataya . . . Pasobra tempu i suseso imprevisto ta kai riba nan tur.”—Eklesiástes 9:11, NW.

 Komo mayor, bo ta hasi tur loke bo por pa protehá bo yu for di peliger. Pero ta imposibel pa proteh’é for di tur problema den bida.

Klaru ku bo yu ainda no sa kiko ke men pèrdè trabou òf pasa den problema finansiero. Tòg bo por siñ’é kon pa enfrentá otro problemanan, por ehèmpel, ora e pèrdè un amigu òf ora un famia fayesé. *

Ora un hende korigí bo yu.

PRINSIPIO DI BEIBEL: “Skucha konseho . . . pa bo por ta sabí pa restu di bo bida.”—Proverbionan 19:20.

Un hende ku ta korigí bo yu, no ta hasi esei pasobra e ke spanta bo yu òf hasié daño. En realidat e ta yud’é kambia un aktitut òf kondukta ku no ta bon.

Si bo siña bo yu pa aseptá korekshon, boso tur dos ta skapa di hopi tristesa den futuro. Un tata ku yama John a bisa: “Si un yu no sinti e konsekuensia di su foutnan, nunka e no ta siña. I konstantemente e lo sali for di panchi kai den kandela, i abo lo tin ku skap’é for di e kandela ei. Esaki ta hasi tantu e bida di e mayornan komo esun di nan yunan hopi duru.”

Kon bo por yuda bo yu aseptá korekshon di buena gana? Sin importá ta ken a korigí bo yu—sea na skol òf otro kaminda—no bisa ku bo yu no meresé e korekshon ei. En bes di esei, bo por puntr’é:

• “Dikon bo ta kere ku e persona a korigí bo?”

• “Kon bo por mehorá?”

• “Kiko lo bo hasi e siguiente biaha ku bo haña bo den e situashon ei?”

Kòrda ku si un hende korigí bo yu, esei lo yuda bo yu, no awor so sino tambe ora e bira grandi.